الموضوع: اشتريت لانوس 2 و محتاج مساعدة من فضلكم

المشاركة الأصلية كتبت بواسطة MITSUKERO

السلام عليكم :

الحمد لله اشتريت لانوس 2 اخيرا و بعد بحث لمدة 3 شهور (علي الرغم من اني مش هركبها !!! بس عند ربنا بقي) المهم ربنا وفقني و عندي شوية اسألة لرجالة دايو :

انا طول فترة البحث و انا كل شوية بدخل علي المنتدي هنا و اقري كل المواضيع و بجد معجب جدا بمنتدي دايو تقريبا هو و ميتسوبيشي و مرسيدس اكتر منتديات بشوفها المهم في حاجات مش لاقي اجابة عليها و هي :

بالنسبة لطقم الكاتينة : سألت في توكيل شيفورلية اللي في الطيران لانه كان قريب مني و الراجل بيجيب شهادة المخالفات من مرور رابعة فقولت بالمرة (العربية دايو لانوس 2001) فقالي ان الكاتينة طقم علي بعضة ب 1000 جنيه و مكون من سير كاتينة و شداد كاتينة و سير دينامو و شداد سير دينامو و سير تكييف و طرمبة مياة .

دول هاتهم من نافع اللي في شارع دمشق, او ابو الحسن اللي في سراي الزعفران , هاتجيبهم هما هما تقريبا و ارخص كتير


هل فعلا لازم اغير الحاجات دي كلها ؟ و هو طرمبة المياة بتتغير مع الكاتينة كل 40 الف كيلو بس ؟

اه غيرهم احسن لأنك ما تعرفش صاحبها غيرهم اخر مرة امتى و الحاجات دي لو حاجة منهم باظت هاتعمل لك مشاكل كتير

بالمناسبة منصور معندوش قطع غيار اصلي دلوقتي تقريبا و ده خلاني مستغرب جدا و في حاجات كتير جدا مش موجودة اساسا ل اوبل و لانوس و افيو ناس حوليا كتير سألوه علي حاجاة و كل حاجة مفيش !!

انا ما رحتش عنده خالص لكني لما كنت باسأل عند ابو غالي اللي في جسر السويس كنت بالاقي , كمان ممكن تسأل على الحاجة استيراد في الحرفيين

صاحب العربية كان بيعمل صيانه كل 5000 كيلو في العباسية و للاسف مش معاه غير كام فاتورة من اخر كام صيانه و مش فاكر غير الكاتينة امتي لانه بيودي العربية التوكيل وخلاص و مبيفهمشي في العربيات اوي و بالتالي عايز اغيرها كنوع من الامان و عايز اعرف اجيبها من التوكيل ولا من برة و اغير فعلا الطرمبة ولا مش لازم ؟ و لو من برة هل فيه نوع تم تجربته و مضمون ؟

الطرمبة مش لازم بس يستحسن , انا لما جبت عربيتي ماحدش قال لي اغيرها فما غيرتهاش , بعدها بحوالي سنة باظت لوحدها , بقت العربية اول ما تدور ترمي المياه كلها في الارض و مؤشر الحرارة ما يعلاش , و كنت معرض ان العربية تجيب وش سلندر , و لما غيرتها اكتشفت انها مبهدلة سير الكاتينة و بلية الكاتينة و غيرتهم هما كمان

العربية عاملة 145 الف كيلو و انا فكرت بما ان الراجل بيعمل صيانه في التوكيل يبقي اكيد غير الكاتينة 3 مرات مرة علي 40 الف و مرة علي 80 الف و مرة علي 120 الف و بالتالي المرة القادمة علي 160 الف بس خايف يكون في اي حاجة غلط في حساباتي و يحصل لاقدر الله مشكلة.

هل مكن التوكيل بتاع العباسية يبقي متسجل عنده تاريخ العربية و يقولي اخر مرة متغيرة امتي ؟ هل نظام تاريخ العربية الكامل معمول به في توكيل دايو ؟

مفروض في التوكيلات بيعملوا ملف لكل عربية بتدخل

بجد الموضوع محير خصوصا ان طرمبة المياه المفروض انها معمرة في كل العربيات و كمان موضوع شداد الدينامو ده غريب برضة اول مرة اسمع عن سير دينامو الشداد بتاعه بيتغير معاه والراجل قالي ان التوكيل قالة المرة الجاية هتغير "كاتينة ثرموستات" !!! انا مش فاهم ايه كاتينة ثرموستات دي خالص و هو الغريب ان ابن الراجل قالي انه غير طرمبة المياه قبل كده مع الصيانه زمان من حوالي سنتين لانهم قالوا له ان كده صح و هو بيعمل تقريبا 15 الف كيلو في السنه يبقي مغيرها من 30 الف كيلو تقريبا

انا ما اعرفش شداد الدينامو ده , يمكن يقصد بلية الدينامو , دي بتبقى جوة الدينامو و لما بتبوظ بتعمل صوت خشانة
انا كمان ما اعرفش بصراحة كاتينة الثرموستات

تاني سؤال : عندي المراية الكهرباء اليمين بتعلق خفيف مع التوجية بالكهرباء: هل لازم اغيرها ولا بتتصلح ؟ و لو بتتصلح بكام و فين و هل هتعيش ؟ و سعرها جديد كام تقريبا ؟

اظن هاتبقى فيها حاجة عايزة يترش عليها WD40 بس

تالت سؤال : فانوس الشبورة الشمال مش بينور هل بيتصلح ولا بيتغير ؟ و مش عارف توكيل ايه اللي بيسيب لمبة الشبورة محروقة و لمبة الاستوب الخلفي اللي علي التابلوه محروقة و لمبة السهاري بتاعت الفانوس الشمال الامامي محروقة و حاجة غريبة العربية اخر صيانه من شهر بالظبط و الفاتورة معايا !!! و الراجل دافع 800 جنية يعني مكانتشي هتفرق معاهم لما يغير الحاجات دي بس مش عارف ايه ده !!

غريبة بصراحة
عموما الفوج لازم يتبص عليه ممكن ببساطة تكون اللمبة محروقة و تتغير و خلاص

رابع سؤال : الزجاج اليمين بيميل بدرجة بسيطة جدا اثناء الغلق فقط و بالتالي بيتقل و لو مسكت الزجاج بأيدي منغير ما اشدة لفوق ولا حاجة و خليتة في وضع عدل بيطلع بسرعة هل الموضوع ده بيتعالج ولا لا ؟ و فين و طريقة علاجة ؟

بيتعالج بس مش عارف عند بتوع القزاز ولا الكهربائي

خامس سؤال : هل اركب ريموت للعربية ولا بيأثر علي الكنترول يونت زي بعض العربيات الحديثة ؟ و لو ينفع احسن نوع ايه ينفع مع الانوس ؟

ممكن تركب انذار بريموته , انا لسه مركب spy و كان مكلفني حوالي 300 جنيه

انا عارف اني طولت عليكم بس والله من عشمي فيكم لان المنتدي بتاع دايو بالذات نشيط جدا بسم الله ماشاء الله و الناس هنا بتتكلم بعلم و بأحترام و اتمني تقبلوني ضيف عليكم و تساعدوني لان فعلا اول مرة اشتري عربية كوري و محتاس جدا علي الرغم من ان المنتدي هون عليا كتير و بقي عندي معرفة كويسة بس محتاج مساعدتكم لانكم اكثر خبرة بكتيييير

انا زيك بالظبط
ارجو اني اكون افدتك :)
شكرا ليكم جدا و مستني الردود

الاستاذ تامر تكرم بالرد كاملاً عليك
نصيحة غير البلية والكاتينة والسيور والزيوت بالكامل
موضوع الزجاج الي بيميل هناك صامولتان رجلاش للموتور بتاع الزجاج هتلاقي واحدة منهم مهوية او مفكوكة خالص

المشاركة الأصلية كتبت بواسطة mitsukero

استاذ طارق : سعدت بمشاركتك جدا ايوه كده الواحد يحس ان ليه اخوات بجد

بالنسبة للزيوت : صاحب العربية لسه مغير زيت 10000 يوم 5- 5 اللي فات و عمل الف كيلو بس و انا هنزلة ان شاء الله علي 9000 مش 10000

لو متاكد مفيش مشكلة من عدم التغير والالتزام بالتغيير في الميعاد

المشاركة الأصلية كتبت بواسطة mitsukero

انا اللي كان محيرني موضوع طرمبة المياة و شكلي هغيرها عشان اريح دماغي بس شداد ايدينامو ده اعمل فيه ايه ؟ انا اساسا مش عارف ايه شداد الدينامو ده !! انا معايا لانسر عاملة 400 الف كيلو عمري ما غيرت حاجة اسمها شداد دينامو و غيرت طرمبة مياه مرة واحدة بس علي 300 الف كيلو فهل فعلا الفرق بين الياباني و الكوري كبير كده ؟

في اللانوس يوصي بتغيير الطرمبة علي 80000 كم
موضوع شداد الديناموا معلش انا مش فاهمه اوي انا اعرف شداد سير التكيف وبلية شداد الكاتينة اما شداد الدينامو دا انا مش واخد بالي اوي قصدك ايه بيه

المشاركة الأصلية كتبت بواسطة mitsukero

انا برضو فيه مشكلة نسيت اقولها : زرار الباب اليمين بتاع نور الصالون مش شغال ايه الحل ؟

استاذنا محمد ( ظاظا ) رد عليك

المشاركة الأصلية كتبت بواسطة mitsukero

انا عارف اني بسأل كتير بس شوية كده و هقلل اسألتي عقبال ما اتعود علي العربية

شكرا لاهتمامكم جدا

كلنا اخوة وكلنا نتعلم من بعضنا واهلاً ومرحباً بك بيننا