الاخوة اعضاء نايل موتورز وبالاخص الاوبتراوية ارجو المساعدة باعطاء الرأى والنصيحة فى الاستشارة التالية :
فانا عندى سيارة اوبترا موديل سنة 2009 مانيوال والحمد لله محافظ وبخاف عليها ولا كانها زى بنت من بناتى " مع العلم انى لا زلت غير متزوج " والمحافظة هنا من حيث الاهتمام بمواعيد الصيانة الدورية والكشف الدورى على السيارة ومعالجة اى عيب او خلل ينشأ اثناء استخدامى للسيارة . ذهبت بالامس بعد الحجز طبعا الى منصور شيفرولية فى الكيلو 4 ونصف طريق مصر اسكندرية عشان اعمل صيانة ال 45000 كم وكنت بالظبط عامل حسابى على 1000 جنية على الاكثر على اساس انى هغير زيت موبيل 1 واحتمال اغير تيل الفرامل كمان ! استقبلنى مهندس قبل ما ادخل البوابة وسالنى انت حاجز ولا لا ورقم حجزى كام وطبعا دى اول مره تحصل وكان واضح ان الجو مشدود جدا فى مركز الخدمة لانى لقيت مهندسين كبار فى وسط حارات استقبال السيارات وبيزعقوا للعمال والمهندسين المتكاسيلن لدرجة ان مهندسين الاستقبال بنفسهم هما اللى كانوا بيلبسوا الكراسى والدركسيون العوازل !!!! ولما سالت قالولى ان الجو المكهرب ده سببه الناس اللى بتيجى تعمل صيانة من غير حجز ودى بتعمل زحمة غير عادية فبالتالى الناس اللى بتحجز قبل ما تيجى بدأت تشتكى ومن هنا كان الجو المشدود ،،،، ما علينا سالنى مهندس الصيانة هتغير زيت قولتلة ايوة ويا ريت تغسلى الموتور بالفوم وتعملى كمان صليبة عجل " طبعا انا اتعلمت ان لو مطلبتش الحاجات دى منهم محدش هيسأل فيا وهسيبو الموتور بترابة ولا هيعملو تبديل للاطارات مع انها كلها بنود اساسية فى كتيب الصيانة" وطبعا المهندس قالى ان غسيل الموتور بالفوم هيكلفك 30 جنية زيادة قولتلة مفيش مشكلة . المفاجأة كانت لما مهندس الصيانة بلغنى ان المفروض طقيم سيور المحرك يتغير فى الصيانة دى وطقم السيور ده يشمل ( سير كاتينة – سير محرك – شداد سير كاتينة – بلى كاتينة – شداد سير محرك – بلى محرك – طلمبة مياه – ترموستات ) طبعا انا حطيت ايدى على قلبى وقولتلة طيب الحاجات دى هتتكلف كام ؟ راح رد عليا وقالى الحاجات دى مع تغيير الزيت والمصنعية هتوصل لحوالى 3000 جنية طبعا انا لما سمعت الرقم ده لقيت الدنيا بتلف بيا ولوهلة حسيت انه بيهزر فرجعت سالتة تانى فرد عليا بقولك 3000 جنية يا استاذ كريم طبعا انا حسيت ان الدنيا اسودت فى عين ولقيت نفسى بقوله ليييييييييييييييه دا خراب بيوت دا انا راكب عربية كورى امال لو كانت المانى كان حصل ايه !!! فى دقايق بدات افوق من الصدمة وافتكرت ان فى كتيب الضمان فى الجدول الخاص بالصيانة ان محدد 55000 كم لاستبدال سير الكاتينة وسير المحرك مش 45000 كم !!!!! طبعا قولتلة الكلام ده قالى مليش دعوة بكتاب الضمان احنا فى اخر اجتماع مع مهندسين جنرال موتورز قالولنا ننصح عملائنا باستبدال سيرالمحرك والكاتينة فى صيانة ال 45000 كم !! قولتلة وان استشيط غضبا يعنى انت عايز تفهمنى ان كل اللى بييجى يعمل صيانة ال 45000 بيدفع 3000 جنية ؟؟ والله دا خراب بيوت .... رد عليا قالى اه كلهم بيدفعوا المبلغ ده يا افندم طبعا حتى لو كنت وافقت من حيث المبدأ انه يغير الحاجات دى فى الصيانة مكانش هينفع عشان مكانش معايا المبلغ والفيزا اللى معايا online بس !! طلبت انى اخد راى مهندس تانى فى الصيانة كنت اعرفة قبل كدة فحضر المهندس فشرحتلة وقولتلة يا باشمهندس كتاب الضمان بتاعكو بيقول ان استبدال سير الكاتينة والمحرك بيكون عند 55000 كم انتو ليه عايزينى اغيرة من دلوقتى ؟؟؟ رد عليا وقالى ده الاصح وفتح ليا الكبوت وحب يورينى ان فى شقوق بسيطة فى سير المحرك !!!! انا بنفسى دخلت راسى جوه الكبوت عشان اتاكد من الشقوق اللى بيقول عليها لقيت ان السير زى الفل والموضوع وما فيه ان فى تفاتيح بسيطة جدا فى بطانة السير لا تصل بتاتا لدرجة شقوق !!! فى الاخر وصلنا لاتفاق انى ممكن أؤجل استبدال السيور حتى صيانة ال 50000 كم .. قلت الحمد لله على الاقل ابقى مستعد والحق اظبط الميزانية لانى بعمل صيانة كل 5000 فى خلال 4 شهور مثلا ... طبعا فؤجت ان المهندس كاتبلى فى امر الشغل ان السيارة تحتاج تغيير طقم سيور محرك وتؤجل حسب طلب العميل .. اضطريت انى ارجعلة تانى واقوله يا باشمهندس انت كدة بتلبسنى فى الحيط يعنى لا قدر الله لو حصل اى حاجة فى العربية فى خلال ال 5000 كم الجايين حتى لو كان عيب تصنيع هتقولوا انه ده بسبب تاجيل استبدال السيور رغم ان كتاب الضمان بيقول ان استبدالها بيكون عند 55000 كم ولا انتوا عايزين تشيلوا اى مسئولية من عليكم وخلاص والعميل يخبط دماغة فى الحيط !!!! قاللى والله يا استاذ احنا نصحنا حضرتك انك تغيرها ونصيحتنا دى بناءا على الحاجات اللى بنشوفها بتجيلنا فى الصيانة وكمان راح قاللى انت عارف لو سير الكاتينة اتقطع هيجيبلك وش سلندر وده ممكن يكلفك 10000 جنية وطبعا احنا اخلينا مسئوليتنا ونصحناك تغير السيور من الان !!! انا سمعت الكلمتين دول بطنى كركبت وبدات اضرب اخماس فى اسداس ومبقتش عارف اخد قرار للحظات فكرت انى اروح اسحب فلوس من اى ماكينة ATM وقالولى فى واحدة قريبة فى فندق الواحة على الطريق الصحراوى واستبدل السيور وخلاص لكنى رجعت تانى وقولت 3000 جنية حرااااااام ده افتراء ... جاتلى فكرة انى ادخل مركز قطع الغيار واسال على اسعار السيور والبلى والشدادات بالتفصيل وبعدين اقارن اسعارهم باسعار بره ... لكنى لما دخلت مركز قطع الغيار قالى على سعرهم كلهم اللى هو 1200 جنية يضاف الية 200 جنية سعر الترموستات يبقى الاجمالى 1400 جنية " وطبعا مرضيش يقولى على تفصيلة الاسعار عشان هما عارفين الحركات القرعة دى بتاعة العملاء "... قولت للموظف بتاع قطع الغيار ان المهندسين بره بيقولولى ان التكلفة 3000 جنية مش 1400 جنية يبقى الفرق ده جه منين ؟؟ قالى ده مصنعية يا افندم اصل تغيير السيور ده موضوع كبير !!! انا اندهشت وقولتلة هو ممكن المصنعية تكون اغلى من قطع الغيار ؟؟؟؟ طب ازاى دى ؟؟ طبعا شكلة اتخنق منى لانه قالى ممكن تسالهم بره وهما هيفيدوك ...... بعد هذه القصة الطويلة ارجو من اعضاء المنتدى الكرام افادتى ونصيحتى فى احد القرارات الاتية :
1- اعمل موضوع السيور ده عند اى ميكانيكى واشترى قطع الغيار من برة لانى سالت على قطع الغيار بره ولقيتها مش هتكلفنى اكتر من 800 جنيه تقريبا؟ بس ده طبعا هيخرجنى برة الضمان اللى هو هينتهى عند 60000 كم ؟
2- اغير سير الكاتينة وسير المحرك فقط فى التوكيل لان بعض الاصدقاء نصحونى انه لا داعى لتغيير طقم الشدادات والبلى والترموستات وطلمبة المياة حيث ان السيارة لا زالت جديدة وعمرها لم يتعدى سنتين ونصف ؟؟ وهل سيوافق مهندسى الصيانة على تغيير السيور فقط بدون الشدادات ؟
3- انتظر حتى صيانة ال 55000 كم واعملهم كلهم فى التوكيل بالتكلفة السالف ذكرها ويبقى بردة لسه قدامى 10 شهور؟ وهل ده ممكن يكون فى خطر على سلامة المحرك ؟
ارجو الافـــــــــــــــــــــ ــــــــادة ولكم جزيل الشكر ......
المفضلات