السلام عليكم و رحمه الله و بركاته
في موقف حصل مع قريب ليا في مصر و لما عرفته حبيت انقله ليكم فورا
الموضوع باختصار كان قريبي ماشي راكب عجله في شارع العشرين الرئيسي المتفرع من شارع فيصل
طبعا عارفين الشارع دا شارع حيوي و رئيسي
المهم
ههه كان راكب عجله يعني واضح انه علي اد حاله بس هتقول ايه
فجأه
لقي واحد بيخبط فيه و هوا ماشي بيزقه يعني المهم صاحبنا وقف
لقي واحد تاني بيجري عليه و راح مسكه و قاله خبط اخويا و راح مطلع مطواه
الاخ التاني الي المفروض انه اتخبط جري عليه هوا كمان و راح برضوا مطلع مطواه
طلع الي في جيبك ... حاضر حاضر ... وراح مطلع لهم المحفظه , خدوها و فتحوها ملقوش فيها الا 50 جنيه راحوا خدوها و كتر خيرهم قالولوا مش هندوخك علي البطاقه و راحوا مدينوا المحفظه تاني
هاااا في ايه تاني .. و الله ما في غير الموبيل و صيني يعني مش غالي
المهم بردوا خدوا الموبيل و راحوا مطلعين منه الشريحه و الميموري كارد و ادهملوا و خدوا الموبيل
انت ساكن فين ؟
ساكن في ش العشرين بس ادام شويه
طيب يلي اتكل علي الله و متمشيش باليل تاني
المهم خد بعضوا و مشي و هوا فرحااان جدا انهم مخدوش منه العجله
ايه رئيكم بقي في شهامه الحراميه دول
الحمد لله اني مش في مصر و لا عايشت الحجات دي بنفسي
حسبي الله و نعم الوكيل