الموضوع: شرح تغيير العجلة الخلفية للأستيد

بسم الله الرحمن الرحيم
الاخوة الاعضاء الكرام مالكي الاستيد واللي لسه هايشترو ماشي يا عتريس انتا وجون سامعني
السلام عليكم ورحمة الله وبركاته

انا حصلي موقف الجمعة اللي فاتت وانا مسافر العين السخنة
نزلت لقيت الكاوتش نايم و جبت منفاخ كهربائي ونفخت الكاوتش ورحت لبتاع الكاوتش وقالي لازم حضرتك تفك العجلة وانا اعملها وطبعا انا مش بعرف اعمل حاجة زي دي والكلام ده كان الساعة العاشرة صباحا وصعب تلاقي ميكانيكي موتوسيكلات فاتح الوقت ده او تمشي علي الكاوتش وهو نايم المسافة دي
وطبعا سافرت ورا صحابي علي الموتوسيكل بتاعهم علشان ما انكدش عليهم السفرية
ولما رجعت كنت عرفت ميكانيكي في عباس العقاد اسمه سيد هوندا فاتح بقالوه 16 سنة وبيقولو عليه خبرة وهو مكانه بعد وندر لاند عباس العقاد في معرض سيارات علي اليمين بعد وندرلاند هو جنبه علي طول
المهم عديت عليه لما رجعت كان عنده واحد اسمه محسن وقالي مش هاينفع دلوقت خليها بكرة بعد المغرب يعني يوم السبت قلت ماشي واخدت رقم تليفونه
وتاني يوم السبت الساعة 12 ظهرا كلمته وقلتله ما تيجي دلوقت
انا صعبان عليا منظر الموتوسيكل وهو واقف والكاوتش متني تحتيه وانا عاجز مش عارف اعمل حاجة
انا شفت مرة الكاوتش بيتغير ازاي بس مش عندي جراءة افكه لوحدي من غير ميكانيكي و طبعا محسن قالي الدينا حر خليها بعد لما الشمس تغيب
وبعدين خرجت انا والاولاد واتأخرت عليه لغاية الساعة 9 مساءا وكلمته وماحدش رد عليا ومرديتش بصراحة اروحلو المحل و نمت ورحت الشغل تاني يوم بالسيارة وقررت اني لما ارجع افك العجلة بنفسي وأخاطر وخلاص ماهو مش معقول كل لما يحصل في الموتوسيكل حاجة اروح اجيب الميكانيكي وخاصة حاجة بسيطة زي دي بس المشكلة ماعنديش عدة مفاتيح كل اللي عندي حوالي 2 مفتاح فرنساوي كبير وواحد صغير و رجعت من الشغل وقررت اني اجرب افك الصامولة الكبيرة واشوف لو اتفكت هاكمل ولو لقيت المفتاح هايتني الصامولة وينعمها خلاص امري الي الله وارجع للميكانيكي يوم الاثنين يعني اقعد يوم الجمعة والسبت والاحد والاتنين لغاية لما الميكانيكي يشرف ويمن عليا ويجي وطبعا انا مش عارف حتي مقاسات الصواميل ايه علشان اروح اشتري مفاتيح المهم نزلت وتوكلت علي الله
بسم الله ،،،، الصامولة الكبيرة اللي جنب الشكمان فكت والحمد لله بدون مايحصل فيها حاجة هيا كانت جامدة شوية بس فكت ودي اول خطوة وطبعا ابن البواب كان واقف معايا وقلتله روح هات بلدورة كبيرة يعني طوبة كبيرة من بتاعة الرصف علشان ارفع عليها الموتوسيكل من المنتصف زي ماشفت الميكانيكي بيعمل كده بس هو كان عنده اورمة خشب وتم وضع البلدورة اسف الموتوسيكل في المنتصف المشكلة ان لما الصامولة اتفكت مش عارف الف الصامولة التانية خالص ثابتة زي الحديد وبعدين اكتشفت ان الناحية التانية الصامولة ملحومة في الاكس
بمعني ان الصامولة الكبيرة اللي ناحية الشكمان دي اللي بتفك الاكس والصامولة الناحية التانية ناحية الجنزير دي بقية الاكس طيب انا عايز اطلع الاكس اعمل ايه قررت ادق عليه بالراحي بالشاكوش
بس المشكلة ان الشكمان شبه لازق في طرف الاكس ناحية الصامولة الكبيرة مش عارف ادق عليه خالص نهائي وبعدين عمال اكلم الميكانيكي علشان اسأله الاكس بيدق عليه عمال اكلم اتنين ولا بيردو عليا المهم كلمت واحد صاحبي قالي لازم يدق عليه وكانت كلمة السر
طيب الشكمان مش عارف ادق لغاية لما البواب بيتفرج عليا لاقيته غصب عنه بيدوس علي الكرسي وهو محمل ولقيت الشكمان بينزل لتحت وطرف الاكس بان بس وكانت المفاجأة خليته يقعد هو وابنه علي الموتوسيكل لغاية لما طرف الاكس بان ورحت جايب شاكوش مرزبة تقيلوقعدت ادق براحة مفيش اي نتيجة وخايف ادق جامد يحصل حاجة وبعدين تقلت ايدي شوية واضرب جامد لغاية لما اتحرك شوية من الناحية التانية والحمد لله اتحرك بس واقعدت اضرب جامد لغاية لما السن اختفي ورحت جايب مسمار تخين بتاع الفواعلية اللي بيكسرو الحائط بيه ودقيت جامد بصراحة الاكس كان جامد جدا وصعب في خروجه وقعدت ادق جامد لغاية لما سن الاكس اختفي وبقي في منتصف الجنط ورحت جايب حديدة طويلة ودخلتها وقعدت ادق لغاية لما نص الاكس طلع من الناحية الاخري وبعدين قررت اني ازيت النصف اللي باين من الاكس اللي بره وفعلا جبت زيت وزيت الاكس الحتة اللي باينة ودقيت عليه ودخلته مكانه تاني من ناحية الجنزير يعني دقيت عكسي كأني بركبه وبعدين دقيت من طرف الاكس مكان لما كنت بدق الاول الاكس طلع علي طول
بمعني ان الاكس لما خرج نصفه في الاول كان صعب جدا وكان شكله جدا مخرجش خالص من ساعة لما الموتوسيكل اتعمل فقررت ازيت النصف اللي طلع وادخله تاني علشان يزيت الجنط من جوه ويطلع بسرعة وكانت النتيجة الحمد لله مرضية بعد لما طلع عين امي وقعدت حوالي ساعة افك في الاكس ولميت العمارة عليا كل اللي طالع واللي نازل عمال يتفرج والناس تتبرع بعدة و بعدين عرفت مقاس الصواميل
الصامولة الكبيرة تحتاج مفتاح 24
الصامولة الصغير تحتاج مفتاح 17 بس غالبا مش بتفك منه يادوب بتمسكها بالمفتاح فقط
المهم فرحت جدا لما الاكس طلع
طبعا نسيت اقول اني فكيت الفرامل من ناحية الجنط فقط اقصد ناحية سرة الجنط وفكيت صامولة تانية اللي ماسكة الجنط بيكون مكانها تحت
المهم طلعت العجلة كلها بره بسهولة علشان الموتوسيكل زي ماقلت مرفوع علي بلدورة
وفكيت الفرامل طلعت بسهولة اقصد مكان الفرامل عامل زي غطا الحلة بيتفك بسهولة مش بيكون مربوط في الجنط
وبعدين جيت ناحية السنون اللي بيركب فيها الجنزير اللي ماسكة في العجلة وتمسك الترس الكبير بأيدك وتفكه لأعلي بالراحة مع تحريك خفيف هاتلاقيه طلع في ايدك وهاتلاقيه حاجت كاوتش تخينة راكبة بطريقة معينة كل اتنين لازقين في بعض يطلق عليا جلب الكاوتش احفظ مكانهم وبيركبو ازاي وبكده العجلة بقت حرة طليقة لتذهب لبتاع الكاوتش وفعلا بعد لما غسلت ايدي من شحم الجنيز والزيت اخدت العجلة وانا فرحان وحاسس اني منتصر علي نفسي علشان مش محتاج لحد علشان افك الكاوتش ورحت لبتاع الكاوتش وفك العجلة وكان الحمد لله الداخلي كان اول مرة يتفك مافيهوش اي لحام خالص وطلع عدد اتنين مسمار ولحمت الجنط الداخلي كويس علشان الموضوع صعب ووصيت الولد علشان ياخد باله ويلحم كويس
وعند التركيب ركز معايا انا كده ولا كده هانزل صورة موضحة للعجلة الخلفية والصواميل بس اسمع الشرح مني
والاخطاء اللي وقعت فيها
لما كنت بفك كنت باخد بالي علشان اعرف اركب كل حاجة زي ماهيا
بعد لما الأكس بيخرج خد بالك يوجد عدد اتنين صامولة هي مش صامولة قوي بس زي الصامولة وليها علامة زي شرطة كده ودي فايدتها انك لما بتركب العجلة بتظبط الاول من ناحية الجنزير ويوجد في مكان تركيب الاكس كذا شرطة في الموتوسيكل وانتا بتظبط العجلة والجنزير علشان تتأكد ان الجنزير مشدود وتشوف الصامولة واقفة علي شرطة كام وفي مسمار انتا بتلفه علشان تزق بيه العجلة للأمام او للخلف علشان تشوف الجنزير مشدود ولا مرخي وتشوف الكاوتش وقف عند انهي علامة وتظبط الناحية الاخري برده زيها وبعدين طبعا انا مكنتش عارف اعمل الكلام ده علشان قلب الصامولة والشرطة اللي فيها اختفت فخد بالك كويس من الموضوع ده وبعدين جبت اسبراي شحم وشحمت الاكس كله بعد لما نضفته كويس ودخل زي القطر بسرعة وبسهولة وبعدين وطبعا ركبت مكان الفرامل وكانت فرصة علشان اصنفرها بس ماكنش عندي صنفرة والليل دخل عليا والتعب والارهاق بس نظفتها كويس وازلت الرواسم والتراب الاسود بتاع الفرامل منها وركبتها وركب ترس الجنزير الكبير وركبت الجلب الكاوتش الاول وركبت عليها الترس الكبير بالراحة وبعدين تتأكد ان كل حاجة زي ما فكتها في الاول وبعدين تعمل زي ما قلتلك علشان انا ماكنتش عارف اظبط الشرط بتاعة الجنزير وطبعا لما ركبت الفرامل كانت مش عايزة تشتغل خالص ادوس علي الفرامل ومفيش خالص وقررت كفاية كده وارح للميكانيكي تاني يوم المهم هاعرف اروحله وخلاص وامش بالراحة وطبعا زي ماقلت معرفتش اظبط شرط الجنزير ولا الفرامل وده الجزء التاني اللي هاحكيه لما رحت للميكانيكي ومعرفة تظبط المور دي بعد لما اقوم اعمل شاي علشان تعبت من الكتابة واكون جبت الصور من كتيب الصيانة علشان الشرح اوعي تروح في اي حتة فاصل ونواصل

مصطفى بجد تسلم ايدك ربنا يستر لان العده الكامله فى البيت مش فى الموتسيكل ان شاء الله نجد حل للمشكله دى