كيف تختار سيارتك عندما تشتري
السلام عليكم ورحمة الله وبركاته
فيه مواصفات لكل سيارة وعلى أساس أولويات كل ميزه بنقوم بالإختيار بين السيارات المختلفة
1- الشكل الخارجي
2- الشكل الداخلي
3- المواصفات التكميلية ( تكييف - إي بي إس - خلافه )
4- الماركة
5- بلد المنشأ
6- السعر
7- الحجم
8- توافر قطع الغيار
9- أسعار قطع الغيار
10- سهولة الصيانة ومعرفة الفنيين بها
11- نوع البنزين المستخدم
12- استهلاك البنزين
13- حجم الموتور ورسوم الترخيص
14- سعر إعادة البيع
15- نوعية الفتيس
16- الثبات وعوامل الأمان
يمكن هذه تقريبا هي المواصفات اللي على أساسها بيختار الواحد سيارته
لكن كيف نرتب أولويات هذه المواصفات
أكيد ده يرجع من شخص لآخر
بالنسبة لي أنا أهم حاجة عندي بالترتيب :
1- الثبات وعاومل الأمان - وطبعا كل شئ بأمر الله - لكن ليطمئن قلبي
2- سهولة الصيانة ومعرفة الفنيين بها - علشان ما أعطلش نفسي كل شوية
3- توافر قطع الغيار - والمهم عندي توافرها ومش مهم عندي سعرها لأن قطع الغيار مش كل يوم هأبدلهم
4- السعر - وأنا بأستغرب لما واحد يشتري عربية مستعملة بمائة ألف علشان قطع الغيار رخيصه - طيب ما تشتري واحدة تانية بخمسين ألف وتحط الخمسين التانية في بنك إسلامي ولا مشروع والأرباح هتغطي قطع الغيار واستهلاك البنزين والصيانة وهتحتفظلك بفلوسك
5- الشكل الخارجي - لأني لو الشكل مشمهم عندي يبقى أحسنلي أركب تاكسي
6- الشكل الداخلي - نفس السبب السابق - وفي رأيي إن الواحد لو مش مرتاح في العربية من جوه يبقى بيرهق نفسه كتير وينزل من العربية يبقى عاوز يرتاح مش يكمل شغله - بتبقى معاناه الصراحة
7- نوع البنزين - يعني لو سيارة بتمشي بتمانين ولا غاز يبقى تستهلك زي ما تستهلك مش فارقة كتير وأكيد أوفر من بنزين تسعين فما فوق
آخر حاجات افكر فيها هي أسعار قطع الغيار - المهم تكون متوفرة وخلاص - وسعر إعادة البيع لأن في كل الحالات السيارة الغالية بتخسر فيها والرخيصة بتخسر فيها
منتظر آراؤكم - سواء مستعمل أو جديد