الموضوع: المرض المروري الثاني:ما يسمى بالغرز أو التخييط أو التحويص

كلام أحمد علاوي مضبوط جدا أنا مابخدش غرزه أبدا من غير إشاره بالذات أن وضع القياده هنا في السعوديه مختلف خالص عن مصر شوارع متسفلته تمام وعربيات معظمها جديده وسواقين لا عندهم مخ ولا ضمير ولا بيعرفوا يسوقوا كله جري في جري وخلاص فبتلاقي الطريق حواليك مدينة ملاهي لذا لابد أنك تلتزم بموضوع الأشارات ده قبل الغرزه مع تقليب النور العالي للي قدامك .
ولو معجبوش قلب له معاه شوية صلصه عشان الطعم يبقى أحلى
الصيام عامل عمايله معايا ....

طب اللى يكون ماشى فى النص تقريبا وفجأة يطلع من شمالك ميكروباص ويبقى اودامك وياريت كمل ومشى بقى وخلاص لا ده راح مديها فرامل ومنزل زبون وكان هيلبسنى فيه ولكن ربنا ستر والحمد لله ,,, طلع وجيت جنبه وبازعقله راح قالى مانا لقيتك ماشى بتتكلم مع اللى جنبك فقولت اعديك وانزل الزبون ,,,, بصراحة ما عرفتش اقوله ايه وسيبته ومشيت عشان ما اتنرفزش وانا صايم ,,,, حسسنى انه كان على الكنبة عندى فى العربية وشايفنى وانا باكلم اللى جنبى وبعدين اصلا هو باكلم اللى جنبى هو ده سبب عشان يعدينى ويفرمل ادامى

بصراحة ما ينفعش انك تمشى فى مصر على قوانين ,,, للاسف لو طبقت انت القانون انت اللى هتتخنق فبتضطر انك تمشى زى اللى ماشيين عشان تخلص وتعرف تروح بيتكم

أنا فعلا باخد غرز بس ف الحالات اللي تستدعي وبدي اشارات ولو اضطريت أعملها فجأة يبقى بسبب حد فرمل فجأة قدامي وبرضه بتبقى محسوبة

المشاركة الأصلية كتبت بواسطة mohammedaly

بصراحة ما ينفعش انك تمشى فى مصر على قوانين ,,, للاسف لو طبقت انت القانون انت اللى هتتخنق فبتضطر انك تمشى زى اللى ماشيين عشان تخلص وتعرف تروح بيتكم

أنا معاك يا محمد للأسف

با جماعة احنا كام حاجة كدة يتعملوا والدنيا ممكن يبقى فيها أمل تبقى منظمة شوية

*أولا تتظبط الشوارع عشان الناس تعرف تتطبق القوانين ..شوارعنا فيها مطبات وحفر لو الواحد مش بيتفاداها ف طريقه اليومي..مش هيلاقي عربيته ف خلال كام شهر..هتبقى دمار شامل. طبعا مستحيل ان ده يتنفذ لأن أبسط مشكلة وأكترها انتشارا غير الحفر والمطبات اليوترن اللي دايما على الشمال فبتلاقي الناس دايما مضطرة تاخد يمين وساعات فجأة عشان اللي هيلف قدامه بيبقى مش مدي اشارة أصلا ومش معروف هو هيمشي طوالي ولا لأ

*رقابة شديدة على كل الشوارع سواء بالكاميرات ف الشوارع الرئيسية أو بعربية محافظة أو حتى موتوسيكل مرور يبقى يعدي بانتظام ف أماكن معينة

*التشديد ف اخد المخالفات خصوصا على فئة سواقين الميكروباصات والتاكسيات لأنهم ف نظري مشكلة كبيرة..تلاقيه يطلع فجأة ويقف فجأة ولا فاضي وعينه ع الزباين لا عارف هو ماشي ولا هيقف..للأسف تصرفاتهم مش متوقعة أبدا..لازم يتشد عليهم وأنا اللي بشوفوا ان دول بالذات محدش بيكلمهم..بيقف فجأة ف وسط الشارع يركب قدام اتخن تخين و ولا بيحصل حاجة ولو حصل اخره سجارتين ولا جنيه للعسكري اللي واقف وخلاص.

*تطبيق القوانين على الكل من الكبير للصغير..من الأسباب الرئيسية للمخالفات ف نظري ان في فئة من الشعب بتعتبر انها واصلة ومحدش هيكلمها وده للأسف حقيقي..لو القانون اتطبق عليهم محدش هيفكر يخالف

*ندي الأولاد ف المدارس زي ندوات من رجال الشرطة والمرور عن القوانين بتاعة المرور اللي المفروض تحترم ونعودهم على الإلتزام..ويا ريت يشوفوا ده على الواقع عشان يصدقوا..بس على الأقل نزرع فيهم الصح..أنا كنت ف الخليج والندوات دي كانت بتحصل وفي توعية وفي أسبوع المرور. لأن عندنا الفكر السائد هو الفهلوة واللي بيلتزم هو اللي مش بيوصل بيته..لازم ده يتغير.

ربنا يصلح الأحوال.

هو لو الواحد عمل غرز بعد مايبص فى المرايات فيها حاجة يعنى ؟

انا بصراحة مكملتش سنة سواقة بس بقيت بعمل الحوار ده