تشترى عربية فى الوقت الحالى ولا نستنى شوية ولا شقة فى المدن الجديدة؟

**epnmasr** · 18-06-2011 11:59 PM

صلي إستخاره فالله سبحانه وتعالى يعلم الغيب وإن شاء الله أي إختيار بعد صلاة الإستخاره مش هتندم عليه و ده المهم عدم الندم

**M.Alaa92** · 19-06-2011 12:04 AM

انا من رايى ان حضرتك تنقل فى الشقة احسن و حقول لحضرتك لية الشقق سعرها بيزيد و العربيات سعرها بيقل بالتالى الشقة = استثمار
و كمان اولاد حضرتك لما يتربو فى منطقة غير المرج سلوكهم حيبقى احسن عشان عدم الاختلاط بالشباب المنحط التفكير و لما اولادك يكبرو حيحتاج يبقى عندهم اصدقاء فبالتالى اصدقاء المدن الجديدة افضل من انو يصاحب صبى ميكانيكى صح ولا انا غلطان؟؟ و كمان الامراض اللى حيتعرضولها و حضرتك بتقول فى بشاير حساسية و فى الاخر لو جبت عربية فى الظروف السودة دى ممكن لاقدر الله تتسرق و يبقى خسرت فلوسك و ممكن لو فضل فلوس بعد شراء الشقة ممكن تجيب عربية بالفلوس اللى فاضلة او تدفعهم مقدم و تجيب واحدة زيرو
ارجو انى اكون افدتك

**ahmed2y** · 19-06-2011 12:08 AM

طبعا اشترى شقة عربية اية والماروتى مدام كويسة احسن من المواصلات وبتقضى الغرض زى ما قالك الشباب

اشترى شقة عشان ولادك بعدين يعيشو فى مكان احسن

**ramy87** · 19-06-2011 04:57 AM

المشاركة الأصلية كتبت بواسطة خالد

سمعت كتيييير على العربيات اللى بتتسرق دلوقتى وأنا معايا ماروتى والحمد لله زى الفل ، بس كنت عاوز أغير وأجيب كيا كارينز
بس بصراحة خايف جدأً من السرقة
نصيحتكم ليا : هل أشترى دلوقتى وأتوكل على الله ، ولا أستنى شوية لما الأمور الأمنية تتظبط ؟
السؤال التانى : أنا ساكن فى منطقة شعبية وحشة جداً ، وكنت عاوز أنقل للمدن الجديدة ، برضه تنصحونى أشترى شقة أحسن ولا العربية الكارينز ، علماً بانى قاعد فى بيت العيلة وليا فى البيت شقتين ومابدفعش إيجار ، وعندى جراج خاص فى العمارة من تحت
محتااااااااااااااااار جداً
عربية ولا شقة ، ولو عربية دلوقتى ولا أستنى ؟، وبرضه الشقة ، المدن الجديدة ولا خليك فى الحتة الشعبية وسط أخواتك وعيلتك كلهم وآهى أمان برضه ؟

1. نصيحة خليك مع أهلك امان دلوقتي لحد ما الدنيا تتظبط و الأمن يرجع زي الاول

2 . عربية جديدة دلوقتي أبعد نهائي عشان الحرامية شغالين بالأضافة إن المرور دلوقتي زي ال... و إللي عايز يعمل حاجة بيعملها حتى لو عايز يمشي بالعرض
فممكن عربيتك تتإذي و لا هتعرف تاخد حق و لا باطل من الناس

3. يا تستثثمر فلوسك في شقة في مكان كويس و بعدين تعزل فيها بعد ما الأمور تهدى او تبعيها و تكسب الفرق
يا إما تشيلها في البنك
بالتوفيق

**MOUSTAFA_SAAD** · 19-06-2011 07:39 AM

انت ساكن فى منطقه شعبيه جدا
يعنى الناس عارفينك جداجدا
يعنى امان جدا جدا جدا
يبقى خليك فيها دلوقتى بدل المدن الجديده الفاضيه اللى مفيش فيها امان فى الوقت لحالى
طالما الماروتى نضيفه وكويسه خليها معاك دلوقتى ينه كمان لما نشوف حال البلد رايح على فين
ده غير انه بيت عيله وعندك فيه جراج كمان
راى خليك فى عربيتك وبيتك

**mohkhattab** · 19-06-2011 10:33 AM

المشاركة الأصلية كتبت بواسطة د.محمود صلاح

في حتتك ووسط إخواتك وعيلتك أفضل طبعا .. وخللي الماروتي معاك ما تبدلهاش خالص تغنيك عن سؤال اللئيم .. ومش وقت زيرو خاااالص الأيام دي ..

ده رأيي

المشاركة الأصلية كتبت بواسطة romio4lovee

خلينا نفكر في الوضعين

انت قاعد في بيت العيلة + معاك عربية صغيرة ودي ميزة لانك بتقول ساكن في منطقة شعبية فابالتالي العربية الغالية هتجيبلك مشاكل بالذات في المناطق الشعبية و غير كدا عيون الناس مقولكش + انك مبتدفعش ايجار و في جراج للعربية تحت .

لو انت بقي جبت شقة برة اولا هتدفع ايجار + ايجار جراج

ولو جبت كارينز في المنطقة الشعبية مش بعيد تتسرق لا قدر الله او ع الاقل تتخربش و يبهدلوهالك و الخبطة في الماروتي مش زي الخربوش في الكارينز..

الخلاصة وجودك في بيت العيلة موفرلك ايجار الشقة و مكان للعربية تطمن عليها فيه + ان ماروتي مناسبة تماما للمنطقة الي انت ساكن فيها .
فا الافضل تسيب الفلوس ومتتصرفش فيها سواء شقة او عربية.. و تستني علي رزقك السنة الجاية ع الاقل لما وضع البلد يستقر وخصوصا الامني.
وبوم ماتنوي وتلاقي الدنيا تمام حواليك تقوم تجيب الكارينز وتسكن في منطقة برة من المدن الجديدة وتاجر الشقق تجيبلك دخل..

انا راى متوافق مع اراء العضويين الافاضل

**تامر.محمد** · 19-06-2011 10:38 AM

رأيي تجيب شقة في مكان كويس , بس تكون تمليك مش ايجار , و حسب الحالة الأمنية في المنطقة اللي ساكن فيها , لو كويسة يبقى تنقل في الشقة الجديدة بعد تحسن الأحوال الأمنية ان شاء الله
لو الحالة الامنية في منطقتك سيئة يبقى انقل على طول

**tigernet** · 19-06-2011 02:11 PM

المشاركة الأصلية كتبت بواسطة د.محمود صلاح

في حتتك ووسط إخواتك وعيلتك أفضل طبعا .. وخللي الماروتي معاك ما تبدلهاش خالص تغنيك عن سؤال اللئيم .. ومش وقت زيرو خاااالص الأيام دي ..

ده رأيي

+1111111111111111111111

**Amr Axel** · 19-06-2011 03:24 PM

بص يا ريس انا ليا اكتر من وجهة نظر

1-اولهم تجيب شقة و حتي لو مش هتسكن اهي تبقي للزمن و ممكن تنفع بعد كده بص لقدام يعني و طالما معاك عربية زي الفل خلاص خليك بيها و توفر فلوس كمان من الشقة

2- تجيب برده شقة و بسعر كويس و تغير العربية لعربية افضل و يكون سعرها برده معقول زي اللوجان و الحاجات ديه

3- انك تخلي الفلوس معاك و لا تجيب عربية و لا شقة و تخليهم معاك احتياطي لأي ظروف محدش عارف بكرة في ايه و تفضل وسط اخواتك

و انا بالنسبة ليا اميل لأول جواب و فيما بعد لما تحب تنقل من المنطقة يكون عندك حاجة قبل ما الاسعار تعلي عن كده بجانب ملكك في بيت العيلة
و بعدها ابقي فكر في العربية واحدة واحدة تكون الدنيا هديت و لو عايز تبيع الشقة فيما بعد و تحقق ربح ماشي او تخليها و تاجرها لحد ما تنقل او متنقلش ماشي
من الاخر هتبقي ضربت اكتر من عصفور بحجر واحد و عملت مصلحة حلوة ومخسرتش حاجة

و اهم حاجة ادرس اي قرار هتتخذه من جميع الجوانب و اتاكد و صلي استخارة

و لأن برده حضرتك عارف وضعك اكتر مننا احنا بنقول وجهة نظرنا بناءا ع حالتنا و زي ما شايفين الافضل
لكن في الاول و الاخر حضرتك اللي هتدفع و تتحمل الاثار المترتبة ع ذلك صح و لا ايه ؟ :)

و بالتوفيق ان شاء الله

-

الموضوع: تشترى عربية فى الوقت الحالى ولا نستنى شوية ولا شقة فى المدن الجديدة؟

LinkBack

أدوات الموضوع

عرض

-

-

-

-

-

-

المواضيع المتشابهه

عايز اسعر عربيتى فى الوقت الحالى يا رجاله

عايز أرائكم فى شراء عربيه جديده أو مستعمله فى الوقت الحالى

اية اخبار التيدا فى الوقت الحالى

هل ترى أن سعر اللوجان المغربية مشجع للشراء فى الوقت الحالى

الكلمات الدلالية لهذا الموضوع

المفضلات

المفضلات

ضوابط المشاركة