يا ترى بتلاقوا وقت للقراءة؟ لو آه طيب بتقروا ايه؟

**OlaOsman** · 28-04-2008 11:08 PM

وحشتني القراءة

بقالي فترة مش بافتح كتاب.. حاسة ان مخي صدى.. خصوصا في الفترة الأخيرة دي من ساعة ما اشتريت العربية و انشغلت بموضوع السواقة.. طبعا ده غير طبعا اني اشتركت في نايل موتورز.. النت عموما بياخد كتير من وقتي.. انما قبل ما انشغل كنت باقرا كتير لمصطفى محمود اللي بدأت أقرا له أصلا من سن إعدادي و عبد الوهاب مطاوع اللي بافكر جديا أنقل مقالاته اللي عجبتني و أثرت فية هنا في المنتدى.. طبعا انا أقصد المقالات اللي من كتابته هو، مش قصص الحياة و المشاكل اللي هو كان بيحلها رحمة الله عليه.

فاروق جويدة برضه من الناس اللي باحب اقرا له و متابعة عموده الأسبوعي في أهرام الجمعة.. مهموم هو جدا بهموم البلد دي :o

مين تاني هنا بيقرا؟ و بيقرا ايه و لمين؟ ممكن نستفيد من بعض بنوعية الكتاب و الكتب اللي ممكن نقراها و نشجع بعض كمان على العودة للقراءة :)

**talent** · 28-04-2008 11:18 PM

انا الصراحه بقرا
اخر كتاب قريته كان مليونير فى دقيقه
كتاب اجنبى مترجم
كان تمنه 249دولار

**aif** · 28-04-2008 11:29 PM

........................No No No

**kimo-nubira** · 29-04-2008 12:53 AM

انا فاكر اخر كتاب قريته تقريبا كان ميكي جيب :d :d

**TaoTao** · 29-04-2008 12:58 AM

أنا اقرا أي حاجة لأي حد في أي فرع من فروع العلم!! بس برضه بقالي كتير ماقريتش ومخي ابتدى يعطل :(

آخر كتاب فرأته وعجبني جدا جدا كتاب "خديعة التطور" للدكتور "هارون يحيى" -اسم حركي أو اسم شهرة لعالمٍ تركي- كتاب ممتاز في الجزء العلمي، آخر فصلين زنق نفسه في الفلسفة وانا مافهمتش اي حاجة- الكتاب حوالي 500 صفحة خلصوا كلهم في يومين من فرط السلاسة والاختصار.

من يومين طلعت كتاب "فجر الإسلام" للدكتور أحمد أمين -بصراحة هو اللي طلعلي مش انا اللي طلعته- انتقيت كام فصل قريتهم ونويت ابتدي اقراه كاملاً، أعيد قراءته بمعنى أصح.

عاوز اقرا الجزء التالت من السيرة الهلالية لـ "عَبرُحمان الأبنودي" بس هأجله شوية.

عاوز اعيد قراءة الدواوين الكبيرة لجرير (حبيب قلبي) والفرزدق، والأشعار الجاهلية بس مش فاضي والحاجت دي قريتها ايام ماكنت عضو في مكتبة مبارك، مش موجودة في البيت، بافكر جدياً في إعادة الاشتراك عشان ارجع اقرا إجباري.

موضوع نكسة يونيو فكرني بكتاب الانفجار اللي عاوز اقراه تاني (اللي قريته قبل امتحان الاحتمالات زمان أيام الكلية)

ضاعت مني نسخة كتاب "ثلاثة رجال في قارب" النسخة العربية لـ "جيروم ك. جيروم" كتاب آخر مسخرة وباحبه جدا، بجد لو حد بيحب القصص يقرا القصة دي، تفطس من الضحك وبتستعرض نماذج غريبة من البشر وبنلاقيهم كلهم في حياتنا. نفسي الاقي الكتاب تاني او اشتري نسخة جديدة.

طبعا التسالي الصغيرة باقزقزها في السريع زي -إحم إحم- "رجل المستحيل" و "ملف المستقبل" و "ما وراء الطبيعة" لو كنت زهقان باسحب واحدة في السريع ونص ساعة زمن تكون خلصانة.

**ashour** · 29-04-2008 02:53 AM

السلام عليكم
فعلا بقى عشان الواحد يلاقى وقت للقرأة بقى صعب جدا
بس الحمدلله بحاول على قد مقدر أبقى مخصص ساعة على الاقل فى اليوم.
بحب أقرا لهيكل و بشكل عام بحب اقراء فى التاريخ و السياسة.

**Chicco** · 29-04-2008 03:03 AM

موضوع هايل يا علا ...سبقتيني :o... كان نفسي أعمل موضوع عن الكتب يلخص فيه كل مشارك كتاب عجبه
القراءة مهم جدا بالنسبة لي.. بس للاسف وقتي مضغوط جدا ...نفسي ألاقي وقت أكتر ....حاليا مشتبك مع ٣ كتب نفسي أخلصهم..... الأول كتاب الفتنة الكبرى لطه حسين (لسة في الجزء الاول الخاص بسيدنا عثمان ) المشكلة إن الواحد لازم يركز أوي و هو بيقرأ لطه حسين ....الأسلوب أكتر من رائع بس عايز دماغ مصحصحة
التاني قصة فلسفية لكاتب برازيلي اسمها "The Alchemist" إسم الكاتب باولو كويليو... بتتكلم عن قصة رمزية تصف مطاردة الانسان لأحلامه و تتطرق لمعني الحياه و الحب و السفر بطريقة في منتهى البساطة و العمق في نفس الوقت
التالت مصيبة اسمها "Guns، Germs & Steel" لكاتب أمريكي إسمه جاريد ديموند عن تاريخ الحضارة الانسانية و تطورها من قديم الأزل للوقت الحالي لسة بأقول يا هادي فيه
أخر كتاب خلصته كان " History of God لكارين ارمسترنج و ديه كاتبة متخصصة في دراسة الاديان و بتتبع تاريخ الأديان السماوية التلاتة بطريقة أكاديمية بحتة

**محمد المشد** · 29-04-2008 03:07 AM

نعم القراءة شىء هام فى حياة كل انسان والقراءة غذاء للعقل والروح 000 ونعم الراى للاخت علا بأن اختارت القراءة للاساتذة الكرام عبد الوهاب مطاوع رحمه الله ، والذى كان منارة للحق والصدق وكانت صفحتة وردودة عظيمة بمقدار خلقة وطيبتة ، وان كان خيرى رمضان لم يستطع ملء الفراغ الكبير الذى تركة وان كان يحاول ، وايضا فاروق جويدة ( جويدة بعد مشكلتة وازمتة مع القضاء غير فاروق جويدة قبل ذلك ) حيث انه اصبح مهموم بمشاكل البسطاء وهموم البلد كل اسبوع قصة وحكاية جديدة للفساد ، وايضا من الافاضل والاستاتذة الكبار الذين تعلمت منهم الكثير استاذنا محمد حسنين هيكل ( ميزان الذهب ) والاساتذة رحمه الله عليهم محمد الغزالى وخالد محمد خالد من العباقرة
ولى قرات فى السياسة والتاريخ والدين لكتاب كبار جزاهم الله كل خير لما افادونا به

**Karim_Monir** · 29-04-2008 10:22 AM

مواضيعك في الصميم يا علا
انا دودة كتب بقى
من النوع اللي لو مسكت كتاب وشدني ممكن افضل قاعد بال 10 ساعات بدون مبالغة اقراه
ومن زمان قوي كنت بروح معرض الكتاب بميزانية محترمة افضل احوش فيها طول السنة
اليومين دول وقعت على مكتبة سوفت كوبي اكثر من رائعة وبقرى دلوقتي كتاب اثار ضجة رهيبة ولقيت فيه حقايق غريبة

أعتماد خورشيد شاهدة على انحرافات صلاح نصر
اعتماد خورشيد دي للي ما يعرفهاش ام شريهان ومرات احمد خورشيد
والكتاب اتطبع من 6 طبعات في 3 شهور فقط سنة 88 وبعد كدة اختفي من الاسواق وانا لقيت نسخة سوفت كوبي

وكمان بقاللي فترة بحاول اقرى روجيه جارودى..الاساطير المؤسسة للسياسة الاسرائيلة
بس مش لاقيلة وقت عشان محتاج تركيز
بحب كتابات هيكل قوي وقصص ارنست هيمنجواي بس مترجمة عشان لغتي مش قوية قوي كدة
وفي ادب الرعب بمووت في ستيفن كينج بس ساعات في كلاكيع كتير قوي وبعشق قصة ميزري قوي
مصطفي محمود قريت معظم كتبة تقريبا
بحب قصص على احمد بكثير وجمال الغيطاني ويحي حقي باسلوبة الغريب ومحمد حسين هيكل
وطبعا في ناس كتير قوي بتتلخبط بين محمد حسين هيكل وحسنين هيكل
ومحمد عبد الحليم عبد الله
العقاد بتعب منه قوي
ونجيب محفوظ كمان مش كل كتاباتة بتعجبني

-

الموضوع: يا ترى بتلاقوا وقت للقراءة؟ لو آه طيب بتقروا ايه؟

LinkBack

أدوات الموضوع

عرض

-

-

-

-

-

المواضيع المتشابهه

بيـان رقم 8 : للنهوض المستمر بالقسم برجاء دخول الاعضاء للقراءة والمشاركة معنا

ربنا سترها وكان زمانكوا بتقروا عليا الفاتحة

طريقة جديدة للقراءة مش هاتقدر تمسك نفسك من الضحك . ؟ !

المنتدى للقراءة فقط ولا اية

رشحولي كتب للقراءة

الكلمات الدلالية لهذا الموضوع

المفضلات

المفضلات

ضوابط المشاركة