تحذير من فرينش موتورز(متسيبش عربيتك هناك)

بسم الله الرحمن الرحيم

الحقيقة عايز الفت نظر الاخوة الكرام من اللي بيحصل من فرينش موتورز عين شمس
طبعا انا ساكن قدام المركز وبشوف مدى استهتار الصنايعية بعربيات الزباين كل يوم تقريبا
مرة تتجرح مرة تتخبط مرة تتشال الخ الخ وكل ده من الصنايعية اللي مش بتهتم بالعربيات حسبي الله ونعم الوكيل فيهم وفي اشكالهم اللي بتدل انهم مجرد بلطجية

لذلك وجب التحذير وياريت اللي يروح هناك يتابع العربية بنافسة وميخلهاش تبات ابدا ابدا لان ببساطة متضمنش هما بيركنو العربيات فين
وعلى فكرة حصل معايا شخصيا شد في الكلام مع الصنايعية بسبب طريقة معاملتهم للعربيات على سبيل المثال انهم مرة كانو راكنين عربية صف تاني قدامي ومش عارف اطلع ومش عارف مين اصلا اللي راكنها وكنت بدوخ السبع دوخات علشان الاقي اللي معاه المفتاح وفي الاخر بكل بجاحة وقلة ادب يقولي ماتزق العربية والمشكلة انه كان مديها غيار ورافع الفرامل



خلي بالكو
اللهم بلغت اللهم فااشهد

شكرااا جزيلا لحضرتك وربنا يرحمنا من الاشكال دى بجد

الحقيقه أنا بتعامل مع فرنش موتورز من فتره طويله

قمه في الأمانه
أحترام العميل
وكيل قوي و من فتره طويله في مجال خدمة رينو
هل يعقل أن يتم أتلاف سياره لعميل بواسطه فني في الوكيل و كأن الموضوع لم يكن ؟

قد يكون أن حدث مشاده بين الأستاذ و فني أو موظف في المكان و هذا وارد و راجع لأسلوب المحادثه

رأيي الشخصي أن حضرتك عندك حق في أنك بتطلب من العملاء ميسبوش عربياتهم هناك و لا يجبوها عشان حضرتك مش بتعرف تركن عربيتك لأن دايما المركز ممتليء بالسيارات....!!!

تحياتي

احترم راي حضرتك
على فكرة لينا اماكن مخصصة للركن امام البيت يعني مش مشكلة
كمان لينا جراج تحت البيت فامش هيا دي المشكلة ولا حاجة
انا قولت التحذير ده لان شايف قدامي وبعيني اللي بيحصل في عربيات الناس لان انا مرضهاش على نفسي

وشكرا على وجهة نظرك

نسيت اقول حاجة
هو مركز فعلا محترم والدليل ان المهندس مصطفى الله يرحمه كان قمة في الاخلاق والذوق وكمان ابنه محترم جدا وفي 2 من الصنايعية كويسين بس لو بصيت على الباقى هتعرف انا بتكلم في ايه
انا مش بقول التحذير علشان الناس تقاطع المركز لاانا بقول كدة علشان لو حد لقى حاجة في العربية ميسكتش على اللي حصل لان في ناس متستحقش تبقى في المركز

تحياتي

جزاك الله خيرا عالنصيحة

الراجل بيقول متسيبهاش
تبات يعنى مش ماتوديهاش
ربنا يسترها

جزاك الله كل خير

والي عاوز ياخد بالنصيحه او ينفض هو حر كله علي دماغه

وفعلا بتحصل فى اماكن كتير ميعرفش الا الي متابع او شغال فيها

ملحوظه .. لا اعرف المكان ولا المركز ولا صاحب الموضوع :)

ممكن العنوان بتاع فرينش موتورز ده

جزاكم الله خيرا يا باشا على النصيحه

فعلا يا جماعة بيبهدلو العربيات جدا.......عربيتى الكليو اللى بعتها اللى إشترتها منى راحت المركز وسابت المفتاح والعربية عشان شوية حاجات يعنى.......
المفتاح المشفر باظ ومش عايز يدور العربية ومافيش غيرة وعايزين يغيروه للست ب1200 جنية عشان الشفرة .......وطبعا فتحو المفتاح وهات يالعب فيه.....
راحت عملتو فى شارع السودان ب200 جنية وكمان بشفرة جديدة عشان هما بوظو القديمة.....
يعنى تسيبلهم المفتاح يبوظوه ويقلولها وقع منك..........+طبعا دبسوها فى رادتير ب1400 جنية عشان خرم فى القديم عشان خدت مطب.....ويقولهها ده نحاس والجو حر والكلام ده.....والعربية بقالها معايا زمن بالرداتير بتاع بلادها ولا الحر عمرة قصر فيها.......مع العلم الرداتير الفرنساوى بره لقيتة ب500 جنية.....
انا عمرى ما إتعاملت معاهم أنا كل تعاملاتى فى صقر قريش جمبى بس هى بقى ساكنة فى أحمد عصمت يعنى جمبهم بس أدى أخرتها.....
فانا بضم صوتى لصوت صاحب الموضوع عشان خلو الست تكره الرينو .....وشكرا

متشكر اوي يارجالة وياريت محدش يفهم اني بقول قاطعو المركز ده
وبالنسبة للعنوان هو في شارع عين شمس العمومي بعد مزلقان عين شمس متفرع من شارع غرب المستوصف - عين شمس الشرقية

شكرا ع التحذير

العفو يافندم

انا بتعامل مع فرنش موتورز من زمان وهما ناس محترمه الله يرحمه مهندس مصطفي الزيني كان قمة الاخلاق والادب وطبعا مهندس خالد ابنه وطبعا بالنسبة للصنيعية انت عارف علي ما المهندس خالد يظبط الدنيا لازم يبقي في تجاوز الخبرة قليلة لكن اتمني ان شاء الله اسمع كل خير عن فرنش موتورز ويكبر المركز ده لانهم عندهم امانة وذمة

ان شاء الله نتمني ليهم كل التوفيق