تجربتى مع تصليح موتور فيستا 1300 ,,, ميزات وعيب عايز اعرف حله :((
بسم الله الرحمن الرحيم
فى الاول طبعا بسلم عليكم كلكم
ابدأ فى الموضوع , من فترة كده العربية بقت تاكل زيت جامد جدا جدا جدا ومع كل مشوار كانت بتطلع ريحة زيت محروق كده فقلت مستناش واوديها للميكانيكى يعملها طقم شنبر على حد علمى ان هو ده المسئول عن ان الزيت ينقص وكده , المهم الميكانيكى فتح الموتور لقى فعلا طقم شنبر وطقم صباب دول العيبين الاساسيين , وطبعا انتوا عارفين كلوا بيجر بعضه , الوش اتخرط وغيرت سير كاتينة و سير ادارة وبليتين دينامو وتيرموستات حرارة واسطوانة دبرياج و طرمبة بنزين " الموتور فقط"
المهم طبعا انا كنت بعانى قبل الكلام ده من كذا عيب وهما كالأتى :
1-صوت الموتور العالى " وطبعا بيتقال ان صوت موتور الفيستا كده "
2-نقص الزيت بطريقة بشعة
3-خنقة غريبة جدا جدا جدا بمعنى , ان مع اول النقلة العربية تسحب لكن فى نفس النقلة بعد شوية العربية تخنق
4-الروايح اللى كانت بتطلع منها بعد كل مشوار
5-سخونة جامدة جدا اللى دايما بتوصل لبين ال m وال a " وطبعا الكل بيقول طبيعى "
بعد ما استلمت العربية لاحظت ان صوت الموتور كان عالى , الميكانيكى قالى العيب فى الشكمان وان العلبة اللى ورا خالص بايظة وورهالى , المهم تانى يوم روحت فعلا كانت العلبة اللى ورا بايظة فغيرتها بالماسورة من تحت عصاية الفتيس كده للاخر خالص , بعد ما خلصت بجد كل اللى بيتقال على ان صوت موتور الفيستا اصلا عالى والكلام ده كلام مش صح مبقاش له صوت خالص لدرجة انا مبقتش عارف فى الاول خالص هى كانت بتبقى دايرة ولا لأ , ادى مشكلة قبل الكلام اللى عملته فيها اتحلت
نقصان الزيت انا عملت من ساعة الحوار ده تقريبا 800 كيلو والزيت منقصش خالص لحد دلوقتى مع انه قبل الحوار ده كان ممكن فى المسافة دى ياكل كيلو
الروايح اختفت خالص الحمد لله . بالنسبة للسخونة بقى ودى المشكلة الكبيرة فضلت زى ما هى و بعد ما عملت الكلام ده الميكانيكى قالى انا مش هينفع اسيبهالك كده الحرارة مش عجبانى قلتله هما اللى صانعين العربية وهما اللى عارفينها قالى احنا مش زيهم والعربيات دى مش بتتعمل للجو بتاعنا هنا فاقترح عليا انى اركب ترموستات 128 فى طبة ماية فى وش السلندر ولو حبيت اشيلها اشيل الترموستات واركب الطبة وكأن مفيش حاجة حصلت , المهم مشيت من عنده وقلتله بعدين وكنت مش موافق على الموضوع ده وراحت العربية نطرت المية من جزء كده زى الكوع مع ان الحرارة كانت لسه تحت والماية بتغلى روحت متصل بيه لحملى الجزء ده مؤقتا لحد الورشة وروحت قايلوا يعملى الفكرة , وعملها فى كام ساعة وبجد من ساعتها الحرارة بقت تيجى عند الربع الاول والروحة تشتغل بقت منتظمة يعنى تشتغل عند حرارة معينة ومتفصل عند حرارة معينة مش زى الاصلى بتاعها , وبعد الموضوع ده بقيت اقدر افتح قربة الماية وانا مدور عادى جدا من غير ما الماية تغلى فى وشى زى ما كانت بتعمل دايما :))
يبقى كده اربع عيوب اتحلوا ناقص العيب الاخير اللى فاضل واللى معكننى وهو الخنقة ومش عارف حلها ايه لان الاداء وحش اوى علما بأن العيب كان موجود قبل ما اعمل الشغل فى الموتور , الميكانيكى كان قالى اشيل علبة البيئة هى اللى عاملة كده بس بتاع الشكمانات قالى لأ متشلهاش " علما انها متركبة بقالها 13 سنة :) " , مع تنظيف الرشاشات والبوابة اللى مش عارف منضهمش ليه والموتور مفكوك :((
فهل العيب ممكن يكون من الحاجات اللى فوق ده ولا لأ , لانه عيب غريب ساعات يجى وساعات يروح والاقى اداء من العربية مش ممكن من سحب وتسارع وكده فا مش عارف ايه العيب اللى يخلى الخنقة ساعات كتير تيجى وساعات تروح فياريت تفيدونى واسف على الاطالة :)
