الموضوع: يرضيكم اللى عملوه مودرن الدقى معايا .. هو ده المنتظر من نيسان

السلام عليكم اخوانى الكرام صقور نيسان

العنوان يخض .. صح ... هههههه

قبل ما حكى مشكلتى .. لابد ان اتوجه بالشكر الى توكيل نيسان على اهتمامه بعملائه ومحاولته لحل مشاكل سيارات العملاء .. وان كنا نطمح منهم المزيد والمزيد من الاهتمام لثقتنا الكبيرة بانهم قادرين تحقيق ذلك

وبصراحة انا مهما غيرت من هنا ورايح عربيتى للاحدث .. حتكون نيسان بردوا .. لاهتمامهم بالعملاء بل وايضا اهتمامهم بحل مشاكل السيارات وارضاء كافة العملاء سواء العاقلين منهم والموسوسين

بخص بالذكر المهندسين الصيانة فى توكيل موردن فرع الدقى

- المهندس رانى .. اللى اجتهد وفضل وراء مشكلتى لغاية ما وصل الى حلها .. وهو مهندس شاطر واكتف جدا وكل المهندسين اللى هناك ,و لانى شوفتهم بعينى بيجربوا عربيات صنى وبيشوفوا فراملها ويطلعوا يجربوا العربيات .. ناس بتاعت شغل والمهندسين اللى فيه ناس قدام جدا لانه من اوئل مراكز خدمة نيسان

- ومدير الورشة المهندس محمد عبد النبى

- وخدمة العملاء الاستاذة هبة مودرن ابو رواش اللى كانت متابعة اول باول معايا وعلى تفانيها وذوقها الكبير .. فعلا هى مثال لخدمة العملاء المميزة لاخلاصها فى شغلها بضمير عالى جدا

- وايضا الاستاذة خلود من cr اتو ايجبت اللى كانت معايا اول باول للاطمئنان على مشكلتى وان تم حلها على خير ام لا

بصراحة فعلا احنا معانا نعمة كبيرة
هى توكيل نيسان ومراكز خدمته

وان كنت معترف ان هناك بعض التقصير من اى مركز خدمة .. ولكن فى النهاية توكيل نيسان يعتبر افضل توكيل سيارات فى مصر

ندخل بقا فى موضوعى ومشكلتى وحكايتها

انا عربيتى نيسان تيدا سيدان موديل 2009 شاريها عاملة حوالى 19 الف كيلو

فيها صوت بسمعه وهو كالاتى :

لما العربية تكون باردة وراكنها لفترة كبيرة بالساعات .. واجى ادور العربية واسخنها وامشى بيها على السلانسيه لمسافة كيلو بعد كدا مبيظهرش ابداااا وفى مسافة الكيلو دى بيكون الصوت موجود فيها متقطع

واحيانا لما بيكون فى رمل خفيف مع مطب فى نفس الوقت

الصوت عبارة عن رنة بسمعها طالعة من ناحية الطابلوه .. الرنة دى عاملة زى الشوكة الرنانة , او صوت سلكة مشدودة لما بتشدها او بتخبطها بتسمع صوت رنتها .. هو ده الصوت

المهم لفيت على ميكانيكية كتير بره التوكيل .. مرة واحدة يقولى ده الانجكشن وفيه مشكلة .. ومرة واحد يقولى مستر الفرامل ! المهم سعمت حاجات كتير .. لو كنت سلمت بيها كان زمانى غرقت وصرفت كتير .. ومش حعرف اخد حق ولا باطل مع اى مكيانيكى ممكن اتسوح معاه

المهم لفيت على مراكز الخدمة فى اواخر السنة اللى فاتت منهم كان السبع مرة تشخيصهم كان .. انه نحط عوازل فوم على السوست بتاعت المساعد عشان بتخبط فى الطبق بتاع المساعد
ومرة غيرت المساعدين
وفى الاخر وصلوا فى النهاية انه علبة شكمان خلفية وعلبة البيئة , والصوت بيجى منهم لان ممكن يكون في حاجة فى المصافى اللى موجودة فيهم وفى حاجة مكسورة او الفحم مكسر
كل ده كلامهم

وقالولى علبة البيئة وحنبعت نجيبها لانها مش موجودة ولما تيجى او تتوفر حنكلمك وتابع معانا

قولت ما بدهاش .. وطالما ان نيسان ليها مراكز خدمة كثيرة فاجرب عند مركز اخر وقولت لما اطلع على مودرن الدقى جنب شغلى لان شغلى فى التليفزيون وقريب منهم , بدل شحطت المعادى
واقدر اسيب العربية هناك واروح واجى باى موصلات والعملية تبقا سهلة , وكمان بدل ما اوديها مودرن ابوراوش واتسوح فى المواصلات بردوا

المهم ودتها فى شهر يناير اللى فات وسبت العربية يومين وكلمونى قالولى نفس تشخيص السبع بالظبط
بس اهتموا بالشكوى وقالولى اول ما حتيجى حنبلغك ونتصل بيك

عدت شهور حصل فيها الثورة بعد موضوعى على طول .. وكمان هوبا دخلنا فى كارثة نيسان فى اليابان والكوارث اللى حصلت عندهم .. فكان لازم تتاخر الحاجة .. ومش معقول اقف واهلل ليهم فكفاية اللى هما فيه فى اليابان واللى احنا فيه فى مصر

انا فى موضوعى على فكرة ماخدتش الموضوع باى نرفزة وكنت بتعامل فيه بشخصى مع الناس وبدون تدخل لاى معرفة او طرف لحد عشان يخدمنى

لان مشكلتى مستخبية مش حاجة سهلة وظاهرة عشان تتحل بسهولة واى حد يقدر يحط ايده على العيب
فكان لازم اصبر .. وقولت لو حصل اى عجز لحل المشكلة حشوف اخرتها وواخلى المعارف فى الاخر عشان ابعت العربية المصنع

المهم

جت الحاجة من شهر وروحت ركبتها وجيت خارج من التوكيل لقيت نفس الصوت .. قولت للمهندس اهو لسه موجود تانى .. قالى معلش سيب لنا العربية تانى وفضلت عندهم اسبوع .. وطبعا الاسبوع ده متغرم مواصلات ايه .. لوز اللوز
لانى احيانا بروح شغل فى مدينة الانتاج الاعلامى ودى محتاجة عربية , فكنت احيانا بضطر اخد تاكسى , وتخيلوا المشوار وتكاليفه ,, مروحتش الا مرتين ,, ولو كنت روحت اكتر من كدا كان اتخرب بيتى

المهم نرجع للموضوع تانى

طبعا كنت بتابع معاهم فى التليفون فبيقولولى احنا بنسهر فى عربيتك كل يوم .. وفاكين الاكصدامات وفرش الابواب كمان

قولت فى قرار نفسى لو حصل حاجة وبوظوا حاجة سهل ان اخد حقى لان مش رايح ورشة فى الشارع وارفع قضية واخد تعويض يمكن توصل الى عربية مورانو ههههه

المهم الدنيا طولت ,, قولتلهم لا كدا حرام ادونى عربية اتحرك بيها ,, قالولى احنا خلاص حنبعت نجيب جهاز من المصنع .. جهاز تحديد اصوات ,, ولو لسه ما اكتشفناش الصوت حنبلغ المصنع يديك عربية

المهم جابو الجهاز ووصلوه فى العربية .. هو عاملة زى المغناطيس وبيتوصل فى كذا مكان فى العربية , ولما اتحركوا بالعربية فى جهاز معاهم بيعطى موشر يحدد الصوت جى من اى اتجاه واى مكان

وفعلا الاشارات اشارات ناحية كنترول الابى اس ,,

وطلعت المشكلة منه وهو اللى بيعمل الصوت ده

ولما روحت اخد العربية .. قولتلهم طيب مش ممكن يكون من حاجة تانى .. قالولى تعالى نوريك

شالوا فيشة الاى بى اس السودا اللى راكبة فى الكنترول كله وجربنا مفيش صوت الرنة اللى بتظهر .. واول ما حطوا فيشة الكنترول تانى واشتغل .. جيت امشى لقيت الصوت .. فالمهندس قالى ها اتاكدت ولالا .. فالحمد لله اتاكدت انه من الكنترول

طبعا وحدات الكنترول دى مش موجودة فى مصر فى المصنع , فبياخده رقم الشاسيه وبيبعتوا يجبوه من اليابان .. لان فى قطع غيار معينة فى السيارة بتيجى برقم الشاسيه منه الكنترول ده

وادينى مستنى لما يردوا عليه ويقولولى انه جه عشان اروح اركبه
حتى لو خلص فترة الضمان .. لانه مثبوت عندهم عيب صناعة .. وكلها شهرين باذن الله

طبعا قولتلهم فى مودرن ليه جهاز كشف الاصوات ده مش موجود فى مراكز الخدمة ,, فقالولى انه غالى جدا ,, ومش موجود الا معاهم فى المصنع بس .. وبيجى مهندس من المصنع بيه وبيكشف وبيرجع بيه تانى

ودى كانت مشكلتى والحمد لله
وتم اكتشاف العيب منين واللى كان مدوخنى

وفعلا كان عيب صعب وعايز مثابرة من الجميع

وشكر عميق لمودرن فرع الدقى على الاهتمام وحل المشكلة واكتشافها

اسف على الاطالة ولعل فيها الافادة

تحياتى للجميع

ربنا يباركلك في العربية و تكون دي اخر المشاكل ان شاء الله