خدوش في الطابلوه

**hit_mo2000** · 29-04-2008 09:34 AM

عندي شوية خدوش في تابلوه العربيه الجلد و الكونسول .
ايه حل الخدوش والخربشات اللي فيها .. وممكن يتدهن و لا مش ممكن ..
ولكم جزيل الشكر

**sab3aawy** · 29-04-2008 10:35 AM

شوف يا سيدى

لو التابلوه بلاستيك حته واحدة (يعنى الخامة بتاعته مهياش اسفنج مكسى جلد صناعى) يبقى له علاج، لكن الإسفنج المكسى جلد صناعى مالوش علاج سهل

امثلة لتابلوهات العربيات البلاستيك: زى ال128 واللانوس والريو والفيرنا والياريس والجزء العلوى من تابلوه الصنى

امثلة لتابلوهات اسفنج او فوم مكسى جلد صناعى: زى الأكسنت القديمة والريجاتا والشاهين والسيفيا واجازء من تابلوه اللانسر

اما عن العلاج فهو انك بتجيب ولاعة سجاير(عادية من ام جنيه ونص اللى بتطلع شعلة مش النوع الحديث اللى بيولع فى سلك سخن) وتقرب الشعلة لثوانى سريعة من مكان الخدش وتبعدها وهكذا وعينك مع الخدش لحد ما يلم، بس محتاجة حذر شديد فى التعامل علشان البلاستيك ميسيحش ويفضل محتفظ بشكل الفابريكة

لكن بالنسبة للتابلوهات المكسية جلد فالحاجة الوحيدة الى تعمله انك تستعمل معاه UV protectant زى بتاع ارمور اول او سمونيز، وده مش بيصلح اللى باظ لكن بيمنع المزيد

**hit_mo2000** · 29-04-2008 11:16 AM

تسلم يا باشا على الرد ..
انا عربيتي صني 2001 والخدوش اللي فيها زي ما تكون خدوش مفك يعني واحد حاول يخلع الكونسول بغباء شوية وخربشها .. ما فيش حاجه تملا الخدوش دي وبعدين تتدهن ..

والف الف شكر على الاهتمام