أخى العزيز
أقل من 18 الف درهم مرتب ، لا تقبل..... لو هتاخد معاك عيلتك
الاختلاف الرئيسي بين كل امارة والتانية هو ايجار السكن ، انما باقى المصاريف واحدة او قريبة من بعض زى الأكل والشرب والمدارس ....الخ
انا هتكلم عن نموذج أبوظبي اللى تعتبر اغلى معيشة على مستوى الخليج والشرق الاوسط
تكلفة السكن لشقة غرفتين ومجلس (صالة كبيرة مقفولة) وده تسع لاسرة من 4 -5 أفراد طبعا تكييف مركزى
ايجاره فى ضواحى ابوظبي ( 30 -40 دقيقة بالسيارة ) حوال 60 -65 الف درهم سنوى يعنى 5 الاف شهرى
لو شقة داخل جزيرة أبوظبي
غرفتين وصالة (90 -100 الف) سنوي
غرفة وصالة (70 -80 الف ) سنوى
التأمين الصحى إجبارى فى أبوظبي يعنى مش هتدفع حق علاج بس تأكد ان الشركة هتديلك تامين صحى يشمل عائلتك (الزوجة والاولاد ) لو انت واخدهم معاك لان ده هيفرق جامد
الأكل والشرب لعائلة مكونة من 4 اقراد حيبقى فى حدود من 3 -5 الاف درهم وده يعتمد على الاسرة نفسها
المواصلات والسيارة : ممكن تجيب سيارة قسط تدفع من 1000 -1500 درهم شهرى حسب تمن السيارة وعدد سنين القسط
نعيد الحسبة
5000 سكن + 3000 ل 5000 مصاريف شامل الفسح + 1500 قسط السيارة + 1000متفرقات (ملابس ....)
يبقى هتصرف من 10500 ل 12500 درهم شهرى
طبعا احنا كل ده محسبتش المدارس
لو الشغل هيتكفل بمصاريف المدارس يبقى خير وبركه
لو المدارس عليك فتكلفة المدرسة للطفل بتختلف من مدرسة للتانية ولكن المتوسط حوالى 25 الف درهم فى السنة لان المدارس بتبدا من 10 ل 50 الف درهم فى السنة
لو عندك طفلين فى المدارس يبقى نضيف كمان 4 الاف درهم للمصروف الشهرى
يبقى وصلنا ل 14500 ل 16500 درهم فى الشهر
تعال بقا نحسب الحسبة لو انت لوحدك (عازب)
سكن استديو مع واحد (1500 درهم ) + 2000 درهم مصاريف شخصية + 1500 درهم قسط السيارة+ 500 متفرقات
يعنى هتصرف فى الشهر من 5 - 6 فى الشهر وده طبعا مش هتحرم نفسك من اى حاجة
اهم حاجة تسال عليها
المرتب كام فى الشهر ؟؟
هل التأمين الصحى شامل اسرتك فى حالة لو انت هتاخد معاك الاسرة؟؟
الاجازة السنوية كام يوم ؟؟
هل فيه تذاكر طيران سنوية ولا المرتب هيبقى شامل تذاكر الطيران؟؟
لو عندك اولاد هل الشركة هتساهم فى مصاريف الدراسة ولا لا ؟؟
مواعيد العمل والاجازة الاسبوعية؟؟
هل لو اشتغلت اوفر تايم هيتحسب لان فيه شركات مش بتحسب الاوفر تايم؟؟
هل فيه عمولة لو شغلك بيعتمد على المبيعات والعمولات؟؟
هل الشغل بيوفرلك سيارة ومخصص شهرى للبنزين ولا لا؟؟
لو فيه اى استفسار تانى انا تحت امرك
المفضلات