web developer & designer

**MOUSTAFA_SAAD** · 20-06-2011 07:00 PM

السلام عليكم

كنت بادورعلى شغل زياده عن الوظيفه الحكومى اللى مرتبها يدوبك يكفى المصاريف الشخصيه علشان ازود دخلى شويه بس كنت عاوز حاجه محترمه ويكون ليها مجال كويس فى مصر او فى الخارج لانى بفكر اسافر بشده
واقدر اشتغل فيها فى البيت معظم الوقت لو حبيت لان انا بانطحن فى شغلى فى الجوازات من 8 ص الى 3 او4 م على حسب ما الشغل يخلص وعلى حسب الزحمه ومره والله روحت بيتنا بعد صلاة العشاء كانت بعد اجازة عيد

المهم اناغاوى الكومبيوتر بطريقه رهيبه وبحب اتعلم اى برنامج اعرفه سواء فى التصميم او البرمجه او جميع برامج الاوفيس بس للاسف علشان واخدها هوايه كنت باذاكر مع نفسى واشتغل عليه شويه وطبعا مفيش شغل رسمى فيه فابزهق منه واسيبه وانساه بعد كده

احد اصحابى قالى ان شغل برمجة وتصميم المواقع جميل وممكن يكون معظم شغلك فى البيت وبتشتغل بالقطعه لو عاوز
يعنى لو شغال فى شركه فى الاسكندريه ممكن تديك شغل تعمله عندك وتديهولهم بعد كده مش شرط حضور يومى فى الشركه والسفر كل يوم لان طبعا دمنهور معدومه فى الحاجات دية ومفيش شغل من ده تقريبا عندنا خالص

اتعرفت على واحد عنده مركز كورسات كومبيوتر فى دمنهور وشغال اساسا فى المجال ده من زمان فى اسكندريه
خدت معاه الكورس بداية من شهر 9-2010 ولغاية دلوقتى لسه ماخلصتهوش
بدانا شويه وبعدين جاله استدعى فى الجيش وبعدها العيد الكبير خد فيه شهرين
هو رجع انا روحت فرقه تبع شغلى فى مصر دخلت فى شهر
انا رجعت زميلى اللى معايا فى الكورس راح فرقه برده بس شهرين المره دية
كلنا بقينا موجودين قامت الثوره والناس انشغلت ووقفنا حوالى شهر

يعنى كورس كله اعطال لدرجة انى مليت منه وبقيت عاوز اخلص منه وخلاص وحاسس ان تعبى وفلوسى راحم على الارض وانه فشل وسوء توفيق جديد انضاف لمشاكلى السابقه فى كل حاجه فى حياتى

انا اخدت فيه
html,css,java .s.c.r.i.p.t,php,ajax,jquery,photoshop web,flash basic,mysql

انا خلصته كله وفاضل البروجيكت زائد ال ajax,jquery,photoshop web
وقالى انه حيشرحهم مع البروجيكت زائد شوي تقنيات مهمه فى الشغل حيشرحهم عملى

اللى زود الاحساس بانه راح على الارض ال php اتكعبلت فيها جامد خصوصا لما جه يطبق عملى ويكتب اكوادها فى المشروع
لما يشرحها لوحدها الاقيها كويسه وسهله
لما يجيى يكتب ملف الاندكس والكلاس مثلا الاقى كعبله جامد واكواد كتيره ولازم اشوف الماتيريال علشان انقل منها لانى مش حافظها وموال جامد
زى التجربه دية
project.rar

هو بيقول اننا مانقلقشى لان الموضوع بعد كده حيبقى template جاهز حنعدل فيه وبياكد ان الامور حتمشى معانا حلو
ومش حنبدا من الاول للاخر زى ماعمل معانا فى التجربه اللى انا رافعها وان حيبقى فيه مشاريع جاهزه وحنعدل عليها خصوصا ف حكاية البرمجه والديزاين كمان
وعلى فكره هى مش كامله ده كان مجرد شرح بس لكن المشروع الكامل حنبداء فيه بعد اسبوع

انا مش عارف كلامه صح ولا لا يعنى فعلا الامور ابسط من اللى الواحد متخيله

ولو فيه حد عنده مساعده فى الموضوع ده وماتيريال مهم او نصائح علشان اكمل فيه لانه داخل دماغى فعلا وصعبان عليا تعبى فيه يروح هدر
وياريت لو مكان فى اسكندريه يقبل مبتدىء زيى يشتغل فيه بحيس اكتسب خبره فى المجال ده
وشكرا

**ashrafakl** · 21-06-2011 12:04 AM

السلام عليكم ورحمة الله وبركاته
اهم شئ انك تتعلم ازاي تكتب كو د برنامج لوحدك وتقدر تعدل فيه ولو شوفت كود مكتوب تفهمه لان مشرط تشتغل في مكان يكون الكود مكتوب بتفس الطريقة الي مكتوبه في الكود الي انت وضعته هنا فعلي سيل المثال ممكن تلاقي في مكان ما ناس بتسنخدم zend وده عباره عن framework يتضمن اكواد رئيسة اي classes تستخدمها في برنامجك
فالمفروض انك تصل انك نكون فاهم لغة البرمجة كويس مش الطريقة الي الي كتب بيها المحاضر الكود لان الكود ممكن يكتب بطريق اخري

انت درست object oriented ؟ لو درستها ياتري ادرس لك polymorphism + encapsulation + class relationship?

**MOUSTAFA_SAAD** · 21-06-2011 07:44 AM

انا فعلا باستخدم برنامج ال zend لانه قال ان ده احسن برنامج يكتب كود php لانه من موقع اللغه ذات نفسه وبنستخدم طريقة ال class يمكن الملف اللى انا رفعته واضح فيه استخدام هذه الطريقه

وبالنسبه للكود انا فعلا فاهمه كويس يعنى لو شفته مكتوب بطريقه تانيه اقدر افهمه بس لما حط الاكواد وعمل ملف كامل للموقع حسيت ان العمليه تاهت منى شويه وانها حتبقى صعبه جدا

**Ahmod** · 21-06-2011 10:04 AM

بص يا باشا هو فعلا مجال تصميم المواقع والمنتديات مربح وجميل خاصا لو انت حابه

انا بقالي تقريبا حوالي اربع او خمس سنين شغال في مجال تصميم المواقع واشتغلت في اكتر من شركة رسمية في القاهرة

والمجال فعلا جميل واحسن حاجة فيه انك تقدر تشتغل بالقطعة وان انت ماتبقاش مرتبط بمكان معين بمعنى انا في فترة من الفترات كنت شغال تبع شركة كويتية عن طريق الانترنت استلم الشغل منهم على الايميل وبعد ماخلص اسلمهلهم

شوف الكورسات عمرها ماهتديلك كل حاجة لاني جربت من حوالي ست سنين تقريبا خدت كورس HTML وده الكورس الوحيد اللى خدته

وللاسف اللى اكتشفته بعد كدة ومن اكتر من واحد زميلي اخد كورسات ان الكورسات مجرد بتحطك على بداية السلم بتعرفك الاساسيات وانت بعد كدة تتعامل وتتعلم من الانترنت

فيه مواقع تعليمية كتير اوي هتفيدك في الموضوع ده

اشهر موقع عربي لمجال تصميم المواقع والمنتديات هو ترايدنت وده اللى تقريبا اتعلمت فيه حجات كتير

:: TRAIDNT FORUM :: - Powered by vBulletin

وعندك سوالف سوفت والويب العربي

وفيه مواقع اجنبية اشهرهم

W3Schools Online Web Tutorials

------------

انا لاحظت ان الكورس اللى حضرتك اخدته كان فيه حجات كتير من ضمنها Design وفي نفس الوقت حجات ليها علاقة بال Development

فانا اعتقد ان الكورس طالما فيه كل الحجات دي اكيد كان مدي مجرد نبذة مختصرة عن كل حاجة

المجال ده لو حبيت تشتغل فيه صح الاحسن انك تتخصص في حاجة معينة وتكون انت حاببها

يعني على سبيل المثال لو حضرتك عندك قدرة الابداع والتخيل وبتحب التصميم بشكل عام يبقى تتخص في ال photoshop Design

ويبقى ده هو مجال تخصصك بعيدا بقى عن ال Development

اما لو العكس هتبقى محتاج انك تتخص في التركيب

----------

يعني انا هختصر لحضرتك المجالات اللى كانت موجوة في الشركات اللى اشتغلت فيهم

1 - تصميم

بمعنى يجيلك طلب التصميم وانت ببرنامج الفوتوشوب عليك انك تعمل التصميم بالكامل وبعد كدة بتسلم التصميم على شكل صورة لواحد تاني يشتغل فيه ويركبه وفي بعض الشركات بيبقى المصمم عليه دور التركيب يعني بيصمم وبيركب في نفس الوقت

وده محتاج من حضرتك خبرة كبيرة في الفوتوشوب + برنامج ادوبي فلاش

2 - تركيب

بيكون كل شغلك مقتصر على انك تستلم التصميم على شكل صورة من المصمم وتركبها بحيث تتماشى مع المتصفحات وتشتغل على الاسكربت المراد تركيب التصميم عليه (سواء كان التصميم هيركب على منتدى او مجلة او موقع عادي)

وده بيبقى محتاج من حضرتك انك تكون بتعرف تكتب كود HTML , CSS

لان احيانا بيبقى مطلوب انك تركب الموقع بطريقة DIV

3 - مبرمج (ده طبعا قسم تاني خالص منفصل تماما عن التصميم ) بيبقى مطلوب من حضرتك معرفة في لغة البرمجة سواء PHP او ASP

-------------

هو بيقول اننا مانقلقشى لان الموضوع بعد كده حيبقى template جاهز حنعدل فيه وبياكد ان الامور حتمشى معانا حلو
ومش حنبدا من الاول للاخر زى ماعمل معانا فى التجربه اللى انا رافعها وان حيبقى فيه مشاريع جاهزه وحنعدل عليها خصوصا ف حكاية البرمجه والديزاين كمان
وعلى فكره هى مش كامله ده كان مجرد شرح بس لكن المشروع الكامل حنبداء فيه بعد اسبوع

الكلام ده مش صحيح لان مافيش حد هيدفع فلوس في موقع ويكون عبارة عن تمبلت جاهز

لما حد بيروح يشتري اسكربت او يطلب برمجة لموقعه اكيد بيكون عايزها خاصة ليه من الالف للياء ومش هيقبل انك تديله تمبلت جاهز انت عدلت عليه وتم استخدامه قبل كدة اكتر من مرة !

في النهاية نصيحتي لحضرتك انك تتخصص في مجال معين من الحجات اللى ذكرتهم فوق

وانا تحت امرك في اي حاجة

**Ahmod** · 21-06-2011 10:14 AM

دي امثلة برضوا احطها لحضرتك بحيث توصلك المعلومة بطريقة احسن

مثلا لو هشتغل كمصمم فقط يبقى هستلم البيانات او اوردر الشغل كالتالي

على سبيل المثال

""" تصميم لمنتدى ترافيان العربي - اللون المطلوب ابيض في اخضر - الصور المطلوب استخدامها هيروح مديلك شوية صور

وممكن يديلك موقع يقولك التصميم بتاعه عجبني وعايز فكرة مماثلة ليه""""

في الاخير انت هتسلم التصميم على شكل صورة كالتالي (طبعا دي صورة تصميم يركب على منتديات)

http://www.zozika.net/travian3.jpg

ده كان احد التصاميم اللى اشتغلت فيها من فترة

------------

اما لو هتشتغل مثلا كتركيب فقط

هتستلم التصميم زي الصورة السابقة من المصمم وهيبقى مطلوب منك انك تركبها بحيث يطلع موقع في النهاية

والمفروض انك هتسلمه على الشكل التالي

News

وده كان برضوا احد التصاميم اللى اشتغلت عليها

بس الفرق ان الاول يركب على منتدى والتاني موقع عادي !

**Ahmod** · 21-06-2011 10:37 AM

المشاركة الأصلية كتبت بواسطة samsong

ممكن اسم شركات بتعمل design

الشركات كتير بس ده يتوقف على نوع التصميم اللى حضرتك طالبه

هل حضرتك عايز تصميم لموقع شركة ؟ ام موقع فردي شخصي ؟ ام لمنتدى ؟

**Ahmod** · 21-06-2011 11:32 AM

المشاركة الأصلية كتبت بواسطة casper_Dj30

طب سؤال دلوقتي انا شغال جافا كويس و بعمل شغل j2ee مع داتا بيز و كلام من دة
و نفسي اعمل شغل بالقطعة و نفسي اوصل للسكة دي حد فيكوا يعرف الطريق؟؟؟؟؟؟؟؟؟

احسن طريق عشان تقدر تشتغل بالقطعة وتتعرف

الموقع ده

:: TRAIDNT FORUM :: - Powered by vBulletin

حاول تثبت نفسك فيه وتشارك كتير وتنزل مواضيع وشروحات لحد مالناس ماتعرفك بعدها هتلاقي كتير بيكلموك طلبينك في شغل

انا اغلبية الشركات والشغل اللى اشتغلت فيه جالي من الموقع ده

بس وقتها كنت مشرف اقسام تعليم تصميم الاستايلات كنت ماسك اشراف خمس اقسام فكنت معروف اوي هناك وفضلت مشرف حوالي اربع سنين