البطارية اتسرقت

**romieh** · 21-06-2011 12:32 PM

امبارح الصبح قولت اروح الشغل بالعربية لانى بقالى فاترة راكنها وخفت البطارية تنام

روحت الشغل فى امان الله وركنت العربية مطرح مابركنها كل مرة

بعد لما خلصت الشغل نزلت علشان اروح

افتح العربية مالقتش السنتر اشتغل

قولت يمكن السنتر بتاع باب السواق باظ

دخلت العربية وحاولت افتح السنتر بتاع الباب اللى جنبى برضه مافتحش

دخلت المفتاح فى الكونتكت واديته نص تكه مالقتش كهرباء خالص

قومت فاتح الكبوت علشان اشوف البطارية فيها حاجة وكانت الصاعقة

البطارية مش موجودة

اول لما شوفتها مش موجودة ارتحت نفسيا جدا جدا

علشان حسيت ساعتها انه الحمد لله ان العربية نفسها موجودة فى ظل التواجد الامنى الفظيع اللى فى مصر

الجميل فى الموضوع انه كان سايبلى المسمار والحديدة اللى بربط بيهم البطارية فى مكانهم (كتر خيره)

طبعا قفلت العربية وروحت

وبالليل اتصرفت فى بطارية ورحت جبت العربية علشان ما اسبهاش فى مكانها

ودلوقتى انا هانزل النهاردة اشترى بطارية جافة جديدة للعربية

الغريب بقى انى وقفت مندهش ازاى هو فتح الكبوت من غير مايفتح العربية

بس بعد شوية لقيت اثار خدوش وكحت فى البوية على طرف الكبوت من عند السواق

اقعدت احاول اتخيل هو عمل ايه ولقيت الموضوع سهل خالص

الباشا حط حاجة زى عتلة مثلا علشان يفرق الكبوت عن جسم العربية

وبعدين دخل حاجة جوا الحوض وشدت السلك بتاع الكبوت قام فاتح معاه زى السكينة فى الحلاوة

المشكلة دلوقتى انى لقيت الموضوع ده سهل جدا وممكن يتكرر بسهولة

فا انا عايز اعرف اولا هى دى مشكلة عامة فى الشاهين والدوجان ولا دى عندى بس

(على فكرة الكبوت بتاعى مش الاصلى بتاع العربية ولكنه استيراد)

ثانيا عايز اعرف اعمل ايه كدعامة علشان الكبوت مايقدرش يفرق عن جسم العربية وهوا مقفول

واخيرا لو حد يعرف اسعار البطاريات ال 55 امبير جافة جديدة (من غير القديمة طبعا) واجيبها منين

**ABO_MAREM** · 21-06-2011 01:05 PM

ربنا يعوض عليك والحمد لله ان العربيه متسرقتش

**graffittiii** · 21-06-2011 02:04 PM

طب والإنذار ماعملش أي منكش ولا نونو عليه حتي ؟؟؟
عامة الحكاية مش حكاية كبوت بيتفتح إزاي لان واحد صحبي إتسرقت بطاريته برده مع أن الكبوت بتاعة بيتفتح من ناحية الزجاج (128 ) ... بس خلي بالك لان الشاهين عربية محفوظة للناس ...
بالنسبة لأسعار البطاريات بص ع المشاركات دي كده ...
http://www.nilemotors.net/Nile/227760-55.html

**Elawany13** · 21-06-2011 02:07 PM

لا حول ولا قوة إلا بالله
ربنا ينتقم من أولاد الحرام
المفروض فيه زرار لو الكبوت اتفتح الإنذار يشتغل
فيه ناس كتير مش مهتمه بيه
رغم انه اهم مكان فى العربية
الحرامى بيفتح الكبوت ويفصل السارينه ويفتح العربيه براحته
انا كان عندى الزرار ده راكب بس مصدى ومش شغال
اشتريت 2 زرار بعشرين جنيه
ركبت واحد على الكبوت
وركبت واحد للشنطة ورا
بحيث لو الكبوت اتفتح او الشنطة اتفتح سارينه الإنذار تشتغل

**Elawany13** · 21-06-2011 02:20 PM

المشاركة الأصلية كتبت بواسطة medododo

الله يعوض عليك
فكرتني بموقف في العربية القديمة الحرامي سرق الكاسيت
ولفلي شريط لحام على سلوك الكاسيت عشان ميحصلش قفله في العربية
حسبي الله ونعم الوكيل

الله على حراميه زمان
هوه فيه زيهم دلوقتى
قمة الأمانة والإخلاص فى عملهم

**No Comment** · 21-06-2011 02:35 PM

معلش قدر الله وما شاء فعل ... فعلاً بقى ملاحظ الايام اللى فاتت دى فى حرامية على قدها كدة بتسرق بطاريات او حتى غطيان فقط .
اتسرق غطى اخويا امبارح ... معلش قضاء اخف من قضاء .

المشاركة الأصلية كتبت بواسطة medododo

ولفلي شريط لحام على سلوك الكاسيت عشان ميحصلش قفله في العربية

ههههههههههه ... ضحكتنى أضحك الله سنك .
لا بجد كان حرامية زمان عندهم حبة ضمير ... مش زى حرامية اليومين دول بقوا فاجرين أوى .

**romieh** · 21-06-2011 02:54 PM

ربنا يعوض عليك والحمد لله ان العربيه متسرقتش

الحمد لله

طب والإنذار ماعملش أي منكش ولا نونو عليه حتي ؟؟؟
عامة الحكاية مش حكاية كبوت بيتفتح إزاي لان واحد صحبي إتسرقت بطاريته برده مع أن الكبوت بتاعة بيتفتح من ناحية الزجاج (128 ) ... بس خلي بالك لان الشاهين عربية محفوظة للناس ...

ماهو للأسف انا مش عندى انذار لانى مش بحب الازعاج

بس ان شاء الله كده لازم اركب انذار

على فكرة الشاهين برضه الكبوت بتاعها بيتفتح من ناحية القزاز

بس هى فعلا الشاهين محفوظة للناس واكيد الحرامية دول عارفين يفتحوها ازاى

لا حول ولا قوة إلا بالله
ربنا ينتقم من أولاد الحرام
المفروض فيه زرار لو الكبوت اتفتح الإنذار يشتغل
فيه ناس كتير مش مهتمه بيه
رغم انه اهم مكان فى العربية
الحرامى بيفتح الكبوت ويفصل السارينه ويفتح العربيه براحته
انا كان عندى الزرار ده راكب بس مصدى ومش شغال
اشتريت 2 زرار بعشرين جنيه
ركبت واحد على الكبوت
وركبت واحد للشنطة ورا
بحيث لو الكبوت اتفتح او الشنطة اتفتح سارينه الإنذار تشتغل

طيب هو الزرار ده اوبشن فى العربية أصلا ولا ده حاجة فى جهاز الانذار

علشان لما اركب الانذار اقول للكهربائى يعملهولى

المشاركة الأصلية كتبت بواسطة medododo

الله يعوض عليك
فكرتني بموقف في العربية القديمة الحرامي سرق الكاسيت
ولفلي شريط لحام على سلوك الكاسيت عشان ميحصلش قفله في العربية
حسبي الله ونعم الوكيل

ماهى الحرامية دلوقتى بقت عندها ضمير مش زى زمان

-

الموضوع: البطارية اتسرقت

LinkBack

أدوات الموضوع

عرض

-

-

-

المواضيع المتشابهه

إحذر ..! البطارية السائلة تتلف بعد تغيير مياه البطارية

هام .. حد سمع عن صنى اتسرقت ؟؟؟؟؟؟؟

اتسرقت

مغامرات لمبة البطارية ولمبة البطارية ...؟

البطارية اتسرقت

الكلمات الدلالية لهذا الموضوع

المفضلات

المفضلات

ضوابط المشاركة