الموضوع: تقرير صيانة ال 15 الف عقبال عندكم

السلام عليكم
اخواني الاحباب من كام اسبوع وانا حاسس ان العربية مش مريحاني و حاسس ان صوت التكييف فيه صفارة غريبة
حتي اني اتصلت بأخويا و حبيبي عمدة قسم كيا الاستاذ وائل ( ابو ليلي ) ليفيدني في موضوع الصفارة دي و بعدين كل ما اشوف عداد ال كم الاقي نفسي يا دوب 13 الف اقول لمراتي مش عاوزة تسافري في حته بعيدة انا جاهز طيب مش عاوزة نروح اي مكان نزور ابعد اقارب لينا تقول لي سبحان الله ايه الحصل انت عاوز تسافر وخلاص لا يا سيدي مش فاضية بعد اسبوعين كده ان شاء الله وعليك خير الكلام مريحنيش اتصل بأخواتي يا جماعة الخير محدش عاوز يروح مشوار بعيد شوية هههههههههههه
فلما كان الكل مشغول لقيت مفيش امامي غير اني اروح علي 13400 كم فقط
حجزت علي الثلاثاء الساعة 9.30 و الاستاذة سألتني لو عاوز انبه علي حاجة غير الصيانة فأبلغتها عن صوت الصفارة و كتبته و كان عندي الباب اليمين الخلفي لا يفتح من الداخل فقلت لها انها تكتب الحكاية دي فأخبرتني ان الباب ممكن يكون معمول له لوك
فقلت لها ضاحكا لا لا هوه انا اول مرة اركب عربية الباب فعلا مفوت فطلبت مني بكل ادب و احترام حتي لا تظهر لي جهلي بأن اقف جانبا و اتوجه للباب و افتحه و انظر في كتف الباب نفسه و فعلا فعلت و يا ريتني ما فعلت
و كنت عاوز استأذنها و اغلق الخط هههههههههههه من الكسوف طبعا ( معلش و الله اول مرة اشوف في حياتي هذا اللوك ) فرفعت الزرار الصغير و اشي خيال يا ناس ههههههههههه بس هموت واعرف مين نزله لوحده دونا عن الباب الشمال الخلفي و لا مثلا هما الاولاد مش هينطو الا من اليمين المهم رحت التوكيل النهاردة الصبح متأخر عن ميعادي حوالي 10 دقائق و بمجرد ما جلست استقبلني م.احمد
بكل ابتسامة كالمعتاد و لما فتش في العربية و سألني هل بها ياقوت او مرجاااااااان فطمنته اني سبت الجواهر في البيت ههههههه و اخبرته علي صفارة التكييف و سجل عنده و قال لي انه هيغير زيت 5 حسب طلبي كالمعتاد
و انهم هيربطو العفشة و يشيكو علي الفرامل بدون فك و هواء علي الفلتر و نظافة للكبوت و ضغط الكاوتش و غسيل و لو تم احتياج حاجة تتغير للتكييف ناسي اسمها بصراحة و ان التكلفة كانت هتبقي 320 جنية
استلم العربية و طلعت علي فوق الساعة بقت 9.50 تماما و كنت بشاهد العربية اول لما ابتدو فيها و شفت الفني ماسك التكييف في ايده و ماسك في ايده التانية حاجة بيضاء مش واضحة و بيفرجها لزملاءه طبعا انا قلت الحاجة دي لا تخصني و اكملو شغل و اخد الشغل حوالي ربع ساعة فقط و دخلت العربية للغسيل و خدت حوالي نصف ساعة و لما نزلت للاستلام اكتشفت ان الحاجة البيضاء دي كانت منديل ورق دخل للتكييف ( محدش يسأل ازاي ) لان المهندس احمد نفسه معرفش و اخر حاجة توصلنا ليها ان التكييف جاله برد فأتصرف و سحبله منديل
و كان الحساب الاجمالي 308 بالضريبة بس مخدتش المنديل
التقييم العام شكرا ديهاتسو
شكرا لكافة الاستاف في ابو رواش
شكرا لكم لصبركم علي قصتي الرخمة

م.حاتم السباعي