حد يقول لعصام شرف يقعد في البيت

**aminibrahim** · 22-06-2011 03:24 PM

حرام انا مش طايقه الجرايم زادت كمين في العريش وملثمين --اليوم السابع

بلطجه ونهب -- سرقه واغتصاب --خراب

100 يوم ما عملش حاجه غير انه عمال بيلف ولا حد معبره

حقيقي انا شوفته امبارح علي دريم واتخنقت منه

مع احترامي للناس الي بتحبه بس بصراحه شخصيه ضعيفه

يا جماعه البلد عايزه واحد قوي قوي

حد يعر صفحته ع الفيس بوك عايز ابعتله اقوله كفايه

**mohmdomar** · 22-06-2011 03:40 PM

دي معادلة صعب جدا انها تحقق مع انسان مصري ان الشخص يبقي قوي وفي نفس الوقت ديموقراطي
لو كانت شحصيته قوية كان حيفرض رأيه علي اللي حواليه وكان حيستفرد باتخاذ القرارات
هي دي طبيعة المصريين يا كدا يا كدا
بصراحة احنا محتاجين حد اجنبي يمسكنا دا الحل الوحيد
لو دورت في التاريخ حتلاقي ان ايام المجد بتاعة مصر كان حاكم اجبني هو اللي كان متولينا
محمد علي وصلاح الدين

**Everlasting** · 22-06-2011 03:55 PM

د. عصام شـــــو!!
د. عصام شرف بيلعب على مشاعر عواطف الشعب المصري ابتداءً من خطبته الشهيرة في ميدان التحرير مروراً بذهابه إلى مطعم الفول والفلافل في المهندسين، وحتى حمله حذاء سيده خلعته على باب مكتبه، نهاية بصورته وهو يتقدم رؤساء الدول العظمي، بالإضافة لكاريزمته، وشكله المريح ووجه الطيب والبشوش كل دا زاد من شعبيته وسط معظم الطبقات (وهي دي طبيعة الشعب المصري). للدرجة التي طالب البعض بترشحه لرئاسة الجمهورية (ممكن ليه لا! ومش بعيد ينجح باكتساح بنفس طريقة الاستفتاء!!!)
للأسف عصام شرف خيب ظني وظن الكثيرين مثلي!!، نجح نجاحاً باهراً في الاستعراض وفشل فشل ذريعاً في إدارة أمور البلاد أو على الأقل المساهمة في إدارتها. المحصلة النهائية (صفــــــــر) وعليه أن يتذكر وعده بنزوله وسط الجماهير مجدداً في حال فشلت حكومته في مهمتها.

**human** · 22-06-2011 03:58 PM

انا مش شايف مشكله بصراحه

طبيعى الشرطة تنضرب و هو مش هينزل يمسك عصايه و يضرب الناس

**aminibrahim** · 22-06-2011 04:14 PM

المشاركة الأصلية كتبت بواسطة human12

انا مش شايف مشكله بصراحه

طبيعى الشرطة تنضرب و هو مش هينزل يمسك عصايه و يضرب الناس

لأ لأ لأ مش طبيعي حضرتك لأن ده هجوم مسلح

لازم يكون راجل بفكر لن كده البلد بتغرق ولازم يكون في اتخاز قرارت مهمه ومناقشات مع المجلس العسكر ي

بانه يتم تنزيل قوات خاصه --لأن الي هجم علي كمين ويقتل نقيب و2 عساكر وقدام بنك اسكندريه

عايز ايه بعد كده -- دي امور مافيش فيها تفاهم دي فيها تمشيط واعدام

مش قاعد في البيت وعمال يلعب علي مشاعرنا

هو انت حضرتك مستني علي ما تحصل حاجه في شارعكو

**otefa** · 22-06-2011 04:15 PM

ربنا يوفقه ويكون ضميره على مصلحة البلد بجد
وهانت كلها شهرين ومجلس شعب وحكومة جديدة ويبقى فيه محاسبة

**Karim_Monir** · 22-06-2011 04:24 PM

البلد في حالة فوضى عارمة
لا شرف ولا غيره هاينجخ بدون مايكون فيه مقومات ادارة
مفيش كادر سياسي ينفع
مفيش شرطة ولا كوادر شرطة تنفع تمسك
هانقعد سنين على مانعدي الازمة