امبارح بالليل خال مراتى عمل حادثة و التفاصيل اللى عرفتها مش كاملة علشان لسه مش متماك اعصابه بس مبدئيا محتاج رأيكم بخصوص عربيته.
اللى حصل ان شاب مسطول بيجرى على 120 فى شبرا عند مدرسة التوفيقية بعربية النترا جديدة و هوب راح خابط يمين عربية رائد شرطة راح حدف شمال و لبس فى عربية خال مراتى الأكسيل من ورا، الشنطة اتعجنت بالكامل و دخلت على الكنبة، الحمد لله الأصابات كانت اغلبها كدمات جامدة و مراته كتفها اتشرخ شرخ بسيط.
طبعا راحوا القسم و عملوا الأجراءات المعتادة و كمان الولد اللى خبطهم اتحول مستشفى علشان يعملوله تحليل و بصراحة مش قادر اتعاطف معاه مع انه فى القسم و النهاردة فى النيابة اقواله كانت واحدة و قال انه كان ماشى 120 و مكنش فى وعيه بصراحة مستغربها جدا بس واضح انه ولد عبيط و اهله جم لخال مراتى النهاردة و قال انهم ناس طيبين و العربية مكنتش بتاعته و كانت بتاعة اخت صاحبته اللى كانت راكبة معاه، خال مراتى الطيب اتنازل لما والدة الولد و اخوه اترجوه و بالرغم من كده النيابة حبست الولد النهاردة.
المهم العربية راحت لناس معرفة خال مراتى فى القللى و قالوا انهم هيجربوا يعملوا زراجين الأول قبل ما يتكلموا فى تغير نص او حاجة من دى، و بيقولوا لو الشاسية مش هيتعدل كويس، هيجيبوا شاسية استيراد؟!!! بصراحة اول مرة اسمعها بس انا خبرتى قليلة و ياريت لو مفيهاش تتقيل تقولولى رأيكم فى الكلام ده
المفضلات