السيرك القومي بحي عين شمس
اه والله فعلا سيرك
اللي خلاني اكتب العنوان ده هو حالة المرور اللي اشبه بسيرك بيشترك فيه جميع انواع المركبات والسيارات وحته الكارو
للاسف كله داخل في بعض مع انعدام رجال المرور للاسف
المنطقة بجد بقت لا تطاق
ميكروباصات وتكاتك وعربجية راكبين كارو ونص نقل واتوبيسات وملاكي وكل ده ماشي عكس او جاي في وشك اوي واقف في نص الطريق
والمزلقان عندنا بيقف بالنص ساعة وساعات بالساعة علشان يدوبك اتحرك بس وطبعا اللي ساكن هناك اكيد عارف ومجرب
امبارح واحد صحبي كان جاي من المطرية وسواق ميكروباص زنق عليه وكان هيدخله في رصيف
طبعا جيه جمبو واتكلم معاه كالعادة بشوية عتاب نظرا ان الحالة الامنية متسمحش بشتيمة او تهزيق الايام دي راح السواق وبكل بساطة نزلو بسلاح اشبه بالسيف طبعا صحبي ده كلم واحد صحبي تاني قاله حصل كدة كدة كدة كدة وطبعا كل السواقين زمايل الميروباصاوي وقفو في صفو وعايزين يجاملو
صحبي ده مكدبش خبر راح لم كل اللي قدر عليه وجاب الاسلحة الحلوة والناس الجدعان وراح طالع على المزلقان
السواقين اللي كانو عاملية فيها رجالة كله طبعا جاب ورا ومشي ومفضلش غير السواق اللي ضايق صحبي ده وعايز اقولكو ان السواق ده تقريبا مات من كتر الضرب فيه لدرجة ان واحد صحبي كان بيحكيلي ان السواق ده اتلعب عليه (ثبت صنم) في اكتر من كدة؟؟ السواق هو كمان جاب ورا وبقي يقول حرام عليكو وانا معملتش حاجة ومن ده كتير
المهم ان كل ده من الزحمة الشديدة جدا عندنا بسبب العربجية اللي بيجو يرمو الدبش في الطريق اللي يدوبك بيعدي عربيتين بالعفية
طبعا زهقنا شكاوي وخناقات مع الناس دي ولكن بلا جدوا ومش عارفين نعمل ايه او نتصرف ازاي المنطقة بجد بقت لاتطاق
اللي حصل ده يدل على كذا حاجة من الحاجات اللي البلد فيها
اولا مفيش امن
ثانيا مفيش نظام
ثالثا مفيش مسئولين
رابعا مفيش دم ولا انسانية ولا بقى في جدعنة عند الناس
خامسا بقى وده الاهم اني هنزل ان شاء الله في اول مظاهرة ضد عصام شرف والعيساوي اللي بتطالب انهم يتكلو ويسلموها لحد اشد بكتير منهم
بجد اتخنقت من حال البلد ومن البلد ومن الناس اللي في البلد
وحسبي الله ونعم الوكيل وربنا ياخد البلطجية والمسئولين اللي معندهمش ضمير
طبعا هما مش خسرانين حاجة لما واحد زي حلاتي يتزنق في الزحمة ويضيع عليها امتحانين وهما الطريق بيتفتحلهم وبيوصلو في معادهم زي اي بني ادم محترم عايش في بلد محترمة
لو في اي جهة اقدر اقدم فيها شكوى ياريت ياجماعة تبلغوني لاني بجد عندي حالة احباط رهيبة بسبب اللي بيحصل ده ومليش نفس اعمل ايه حاجة
والسلام ختام