اسباب خرط الماتور

**essamenen** · 22-06-2011 11:26 PM

انا عندى استفسار متخصص بعض الشيئ
لما الواحد بيعمل عمره للماتور الميكانبكى بيقله ان لازم تخرط مجارى البستم وذلك لانها وسعت او تسلخت من نقص الزييت .
السؤال هو الخلوص بين السلندر او البستم و فتحه الشميز الى بيتحرك فى داخلها البستم بتكون كام ولما بتوسع الى حد كام لازم نخرط مجارى البستم . فى صنايعه بتقول تعدى ورقه جرنال بس انا كن عاوز اعرف كام بالضبط لان ورقه الجرنال ديه كلمه مطاطه
وجزاكم الله خيرا

**ahmedtunning** · 22-06-2011 11:52 PM

متااااااااابع

**ahmedhawas** · 23-06-2011 02:13 AM

متهيألي بتفرق من عربية للتانية (أو من مواتير قديمة لمواتير جديدة ) لان المواتير الجديدة أصبحت هذه الخلوصات أقل عن مثيلتها في المواتيرالقديمة.
والموضوع ده بالذات ....كبير أوي (لو عايز الشغل الصح !!)
كمثال لو بنتكلم على موتورعربية موديل حديث: بالنسبة للأسطوانات هتشيك على 3 حاجات:
1- أقصى حد للتاكل في قطر الأسطوانة : 0.2 مم تقريبا - لو تعديته : تخرط الاسطوانات أو تغير البلوك
2- عدم دائرية الأسطوانات : وهو الفرق بين القطرين العموديين للأسطوانة في منتنصفها
3- التاكل المايل :وهو الفرق بين قطري الأسطوانة في النقطة الميتة العليا والنقطة الميتة السفلى
والنقطتين 2 و 3 لايتعدوا 0.015 مم - ولو تعدوا الكلام ده لازم تخرط يا معلم (عشان البستم ميرنش - بلغتهم)

المهم لما تخرط لمقاس أكبر لازم تاخد بالك من توافر البساتم الأكبر وتكون جايبها معاك (والمقاس الأكبر ده بيتحدد تبعا لمعدل التاكل).
وتشوف الكتالوج الخلوص بين البستم والسلندر كام بالنسبة للمقاس ده(الفرق بين القطر الداخلي للاسطوانة والقطر الخارجي للبستم) من 0.01الى 0.0.4 مم؛ مثلا.
إذن : القطر اللي هيخرط عليه = قطر البستم الجديد + خلوص البستم/ سلندر ، واوعى تنسى السبعات والتمانيات
لازم تعمل "Honing" (بعد الخرط تعمل سبعات في تمانيات - بلغتهم) (زي خدوش رفيعة أوي أوي أوي بتتعمل في الجدار الداخلي للسلندر عشان توصل للخلوص بتاع بستم/سلندر ، وعشان الخدوش دي بتعتبر جيوب للتزييت- وطبعا في مكنة بتعمل الكلام ده)
YouTube - ‪Cylinder Bore Honing - Engine Building Video - Hone Piston Wall‬&rlm;

ملحوظة: الأرقام اللي فوق مش قاعدة لكل المواتير - وزي ما قولتلك المواتير الجديدة غير القديمة
ملحوظة أخرى : (ودي تبع شغل الخراط يا باشا)
أقصى فييد (قصدي تغذية) لقلم المخرطة متزيدش عن 0.05 مم في المرة الواحدة- يعني لو هيخرط 0.2 مم يخرطها على أربع مرات.
ال3 قرايات بتوع السلندرات يعيد عليهم بعد مايخلص ولما يعيد عليهم يكون البلوك هيدي وبرد ، وإلا يبأى احنا بنعك (وحذاري من التبريد الفجائي وطبعا كلنا عارفين ليه).

وفي النهاية صعب تلاقي حد بيعمل الكلام ده صح (ولو التوكيل نفسه) عشان كده هاتلك موتور استيراد وابعد عن الشر وغنيله
لانك في النهاية - هتلاقي الموضوع صرف كتير والميزانية فتحت منك - ولو عمرت متتوقعش منه الكتير !!

والله أعلم.

**ahmedhawas** · 23-06-2011 03:35 AM

وبالنسبة لمجاري البستم (مكان تركيب الشنابر) فهي فعلا بتوسع وبتعمل بوش
(بتحط الشبر بالجنب في المجرى بتاعه .. بدون ما تركبه وتزنق الفيللر جايش معاه - والكلام ده لشنابر الضغط بس ، أما شنبر الزيت فملوش يا باشا)
مثلا:
الشنبر اللي فوق من 40 الى 80 شغال (يعني من 0.04 ال 0.08 مم)
والشنبر اللي تحته(0.03 ال0.07 شغال)
وكل موتور وله قراياته يا زعيم !!!!

والصح انك تغير البستم - مش تخرط فيه
ولما تركب الشنابر متنساش قراية ال end gap لكل شنبر ، مع مراعاة انهم ميكونوش تحت بعض عند تركيبهم عالبستم

والله أعلم.

**mrastra** · 23-06-2011 09:59 AM

ahmedhawas
استاااااااااااااااااااااا اااااااذ

**essamenen** · 23-06-2011 02:10 PM

معلومات فعلا قيمه لان فى صنايعيه بتبقى عارفه الموضوع ده وبتعمل طقم شمبر بس, سبب العمره وجود خلوص وبوش فى اى جزء من الاجزاء الى حضرتك قلتها بس كان الهدف من سؤالى هو الكشف المبدئى لما يتفك وش السلندر فممكن تعرف الحاله العامه مبدئيا بدون فك باقى الاجزاء ونسبه الخلوص الى خضرتك بتقول عليها بتكون فى كاتلوج المصع مش موجوده فى كاتالوج المستخدم وده كان بينزل فى العربيات القديمه انا معايا كاتلوج الريجاتا وذاكر فيه كل المقاسات فعلا كاتالوج قيم بس انا عربيتى 131 نفس الماتورتفريبا من cc وقطر البستم وطول المشوار