الموضوع: سؤال مهم بخصوص السفر إلى اوروبا و استخراج الفيزا المعجزة الشنجن

أولا: فرنسا تعتبر بردو سهله نسبياً في استخراج الفيزا الخرافيه (شنجن)

ثانياً: ماينفعش تاخد فيزا لدولة و منها تروح لدولة تانيه لانك ببساطه لا تملك التصريح لدخول حدودها
و الفيزا تدخلك طبعاً اي دولة في الاتحاد الاوروبي بس ده بعد ما تعمل اللازم في السفارة الخاصه بالبلد دي

ثالثا: لازم تحدد الأول سبب السفر ايه... يعني سياحه ولا دراسه ولا هجره ولا شغل......... ؟؟
لانك لو رايح سياحه مثلاً اعتقد مش مطلوب منك كشف حساب من البنك, و كل سبب ليه اوراقه المطلوبه...

رابعاً: بما ان عمك اصلاً في هولندا, يبقى ليه كل التعقيد ده, يبعتلك كارت زيارة و يجيبلك الاذن
و انت تخلص الورق هنا و هيكون الموضوع اسهل بكتير من الأول, بس بردو مطلوب منك بعض الأوراق...

طبعاً كارت الزيارة لا يشمل صديقك, و بالتالي هو مشواره اطول شويه علشان يقدر ياخد الفيزا (و ممكن مايقدرش)

بس خاللي بالك من حاجه مهمه قوي... الاتحاد الاوروبي بكل سفارات دوله مافيهوش هزاااااار خاااااااالص

يعني لو حصلت اي مشكله في ورقك او في الانترفيو (لو هيبقى في) او اكتشفوا مثلاً اي خطأ
في بياناتك او انك مش صادق معاهم في اي شئ, اقدر اقولك تنسى تماماً السفر لأي دولة في الاتحاد الاوروبي

ده اللي اعرفه بشكل عام على حد معلوماتي المتواضعه... والله اعلم

تحيــاتي...

المشاركة الأصلية كتبت بواسطة أحمد كمال

اولا اللي قال لك فيزا اوكرانيا سهلة كان بيشتغلك اشتغالة التنين ......

اوكرانيا ما ينفعش تروحها من غير دعوة (زي السعودية كده) ...... يعني انت لو شغال في شركة كويسة و بتقبض مرتب كويس ممكن تسافر اي بلد في اوروبا او امريكا من غير دعوة و لا ما تكون تعرف حد هناك ...... بس اوكرانيا ما ينفعش !!!

لازم دعوة و لازم أصل الدعوة كمان hard copy يتبعت لك من هناك


فيه بعض شركات السياحة بتعمل لك الدعوة (يعني تبقى هي كفيلك) بس بتكلف حوالي 500 دولار

و برضه لازم تجيب جواب مرتب و جواب من شركتك ...... يعني الدعوة لا تغني عن الكلام ده

و في الاخر برضه تاشيرتهم ما تدخلكش هولندا .....

و خلي بالك .... تاشيرة الشنجن دلوقتي لو اخدتها من البلد س .... لازم تخش الاول البلد س ....... ما ينفعش تاخدها من س و تخش ص الاول ...... لو التاشيرة Multiple entry ممكن تخش بيها البلد س و منها تطلع على ص و لو عايز ترجع س تاني مفيش مشكلة ..........



لا طبعا ماكانش حد غلب يابو غازي ...... لازم كشف حساب طبعا :)

كماااااااااان !!!!! هو انا كنت شاكك في المعلومه بردو, و بالتالي قلت (اعتقد)
بس كده تبقى آآآآآآآآآآآخر رخااااااامه بصراحه يا هندسه, بس معلومه جديده دي :))

بالنسبه للتأشيرة الـ Multi... مش هياخد Multi غير بعد ما ياخد الـ Single الأول
و يسافر عدد مرات معين و بعدين ياخد الـ Multi و ساعتها يقدر يدخل فعلاً اي بلد
من و الى الاتحاد الاوروبي, بس الـ Single مش هتبقى Multi بسهوله ابدااااااااا

ده بردو على حد علمي لاني كنت هطلع الفيزا من سنتين علشان كنت مسافر المانيا
و ده قبل الحادثه مباشرة, و حصل اللي حصل... المهم عرفت شوية معلومات من ناس
كتييير بتسافر تقريباً معظم دول اوروبا بشكل شبه دوري, و ده اللي عرفته منهم...

و منكم نستفيد يا ابو كمـال :))

عن خبرة 11 سنة متواصلة فى السفر ل اوربا وخصوصا فرنسا
اسمع اللى جاى

1- افاده من الكلية لو بتدرس او من شغلك لو بتشتغل انك موجود فى المكان ده
2- كشف حساب بنكى ليك او لوالك او والدتك ويكون كشف حساب حركى (يعنى يبين التعاملات على الحساب- in and out )
3- لو الحساب بأسم والدتك تجيب شهادة ميلادك
4- وثيقة تأمين سفر بمدة الرحلة اللى انت طالعها
5- الفوتشير بتاع حجز الفندق والطيران
6- صورتين 4*6 خلفيه بيضاء

لو حتاخدها من فرنسا يبقى الأول تاخد ميعاد من TLS Contact علشان تروح تقدم الورق هناك الأول
www.tlscontact.com/eg2fr

فى الأنترفيو متوقلش انك ليك قرايبك هناك

والله يا رجالة بتقولوا معلومات مهمه و جديده بالنسبه ليا فعلاً...

انا اعرف ناس خدوا الـ Multi بعد فتره محترمه و دول مش صغيريين, دول ناس عندهم بيزنس
في المانيا و اسبانيا و بيشتغلوا مع مصانع هناك و يعتبروا وكلاء كمان ليهم, و هما بنفسهم اللي قالولي كده !!!

و على حد علمي ان الموضوع صعب علشان تطلع تأشيرة شنجن, و خصوصاً لو لالمانيا... هي الأصعب فيهم

الغريب و من كلامكم ان الموضوع بسيط و شوية ورق و القصه خلصت, في حين ان ناس كتير
وضحتلي الموضوع اكبر من كده و اكثر تعقيداً من كده و كلهم كبار و سافروا كتيييير اوروبا بردو

عموماً... انتوا بردو ادرى مني لان انا مامشيتش بالفعل في خطوات التأشيرة لالمانيا بسبب الحادثه,
و بالتالي انا ماعرفش الاجراءات فعلياً و هل الموضوع سهل ولا صعب من واقع تجربتي الشخصيه...

هل ينفع تاخدها من فرنسا, و تطلع بيها المانيا مثلاً ؟؟؟ سؤال لمحمد بك الطويل و ابوكمال :))

و منكم نستفيد يا رجالة... الواحد يستغل الفرصه و يفهم الصح بقى بما ان الموضوع اتفتح