معروض عليا m11 بـــ 56 الف جنيه لون اسود ماشية 27 الف كيلو فابريكا بره وجوه .... يا ترى السعر ده مناسب ولا كتير ولا ايه
وشكرا
عرض للطباعة
معروض عليا m11 بـــ 56 الف جنيه لون اسود ماشية 27 الف كيلو فابريكا بره وجوه .... يا ترى السعر ده مناسب ولا كتير ولا ايه
وشكرا
العربية زيرو ب 72 + مصروفات تراخيص طبعا
لو مش فارق معاك موضوع الصيني توكل علي الله ... بعد الكشف علي السيارة طبعا
لو بيفرق معاك موضوع " صيني يععععع" ابعد عنها تماما
السعر يفرق فيه
الرخصة فاضل قد ايه
الضمان ساري ولا خرج
اي حاجة فيها عطل
النظافة العامة للسيارة
ربنا يوفقك للخير ان شاء الله و ابقي قولنا عملت ايه
الرخصة فاضل فيها سنة ونص
كشفت عليها في بنزينة وطنية قالي العربية جديدة ياباشا فابريكا بره وجوه
العربية مفيهاش اعطال غير ان الفريون محتاج يتشحن ومع ذلك التكيف معقول
العربية 2010 فأكيد لسه في الضمان
سوقتها حسيت انها تقيله على الارض بس ملاقيتش وقت اطلع على طريق سريع اجربها
بس مقارنة بالعربيات اللي ممكن اجيبها بالسعر ده اعتقد ان دي الافضل شكلا وموضوعا
شوف دفتر الضمان ... لو المتابعات مظبوطة توكل علي الله ....
هوه صاحبها بيبيع ليه؟؟؟؟
العربية في معرض في مدينة نصر
كتيب الضمان ده حبقى اسالهم عليه عشان نسيته خالص
انا غالبا حروح اخلص بكره
الحمد لله استلمت العربية النهارده عاملة 27 الف كيلو موديل 2010
العربية جميلة فعلا واقدر اقول بمنتهى الامانه هي الافضل حتى الان بالنسبة لسعرها اداء العربية وموتورها وعفشتها ... ممتازة والله .................... انا بفكر اروح اعمل صيانة ال 30 الف بدري شوية كنوع من الاطمئنان على العربية ولا ايه؟؟؟
الف مبروك يامان .. ربنا يديك خيرها ويكفيك شرها ويباركلك فيها
متابع
الف مبروك العربية الجميلة ربنا يديلك خيرها ويكفيك شرها
الله يبارك فيكم جميعا
الف الف مليون مبروك وربنا يديك خيرها ويكفيك شرها
وان شاء لله تكون من احسن العربيات وان شاء لله
هتركب عربيه فعلا من اجمل العربيات
وان شاء لله يكون حظك احسن منى وربنا يبارك لك فيها
هي فعلا عربية جميلة جدا حتى الان وحصلي موقف بيها خلاني احبها اكتر واتاكد انها عربية كويسة ... كنت بوصل واحد صاحبي 6 اكتوبر وكنا قاعدين 4 في العربية وكنا الساعه 2 صباحا والطريق فاضي وماشي على 100 وفجأة لقيت مطب قدامي فدوست فراااامل على الاخر وجبت الدواسة والحمد لله العربية مزحفتش نهائي حتى صوت الكاوتش مطلعش وكل اللي في العربية لاحظو الموضوع ده ده بخلاف طبعا العربيات اللي كانت معايا قبل كده وعارف كان بيحصل ايه............ واقصى سرعة وصلتلها بيها حتى الان 140 وثابته جدا بالنسبة للعربيات اللي كانت معايا قبل كده نيو اكسنت 2008 ولانوس 2002
الف مبروك
احب انقل لكم اوائل تجاربي مع العربية ومشاكلها والتوكيل عشان كده محبتش اكتب كتير عن العربية الا لما اجربها فترة معقولة من الوقت واروح التوكيل عشان الصيانة
كما تعلمون انا اشتريت العربية مستعملة عاملة 27 الف كيلو وطبعا مادامت العربية مستعملة بيكون دايما في احتمال ان صاحب العربية الاصلي مهمل مثلا او مش بيعمل الصيانه في مواعيدها او بيسترخص في قطع الغيار عشان كده محبتش اقيم آداء العربية الا لما اروح بنفسي التوكيل وكانت كل مشاكلي مع العربية
1- صوت تزييئ كده خفيف بيصدر من العفشة طول ما العربية ماشية .
2- صوت تزييئ خفيف بيصدر احيانا في المطبات من العجلة الخلفية يمين .
3- لما افرمل على سرعه عالية الدركسيون بيرعش .
4- التكيف كان محتاج شحن فريون .
5- فرامل اليد ضعيفة ومحتاجة تتربط.
المهم اتصلت بتوكيل ابو رواش في الكيلو 32 يوم السبت واخدت معاد 8 صباحا يوم الاحد
ودي كانت اول مرة اطلع على الطريق السريع بالعربية والدنيا كانت صبح بدري والطريق فاضي ...فطلعت على الصحراوي وجيبت بالعربية 180 كم وبجد بسم الله ما شاء اللله العربية ثبات فوق الممتاز وباخد كمان غرز على الواسع على هذه السرعة ودي كانت اول مرة اجيب السرعة دي اساسا مقارنة بالنيو اكسنت 2008 اللي مع والدتي اللي بسوقها كتير وسافرت بيها كتير واللانوس الكوري ال 2002 اللي كانت معايا وعامتا العربيتين دول لما بتزود عن 120 يبقى لازم تمشي في خط مستقيم وتمسك الدركسيون بايدك الاتنين ....وطبعا نتيجية الحركة دي وصلت متأخر الساعه 8:40 وكان طبعا زحمة .... انتظرت حوالي 20 دقيقة ونادى على اسمي واعدت مع المهندس قلتله على المشاكل اللي كانت عندي .....
وطبعا زي ما توقعت صاحب العربية معملش في التوكيل غير صيانة ال 10000 بس والباقي بره ومالوش اي وجود على السيستم عندهم فالمهندس قالي يفضل اننا نعمل صيانة ال 20 الف وال30 الف فيها تغيير زيت الفتيس والفلاتر ومية الرادياتير ودورة التبريد وكام حاجة كده عشان احنا كده منعرفش زيوت العربية دي نظامها ايه وماشي بيهم أد ايه وبالنسبة لمشكلة رعش الفرامل فده محتاج تغيير ديسكات وتيل امامي ... وطبعا عشان اطمن على العربية وافقت على طول كان اجمالي الحساب 2043 جنيه
225 زيت فتيس
562 ديسك امامي
183 طقم تيل امامي
صيانة 20 و30 الف
غسيل دورة التبريد وغيار مياه الرادياتير
55 مياه الراديتير
60 بوجيهات
27 فلتر زيت
42 فلتر هوا
29 فلتر بنزين
دي اسعار بعض قطع الغيار بدون مصنعيات
روحت النهارده الساعه 8 الصبح كنت هناك اخدت العربية يوم الاتنين 11-7-2011 الصبح وطلعت على الطريق تاني
1- صوت التزييئ الاول اختفى وده كان اكتر حاجه منغصة عليا
2- الفتيس اصبح انعم كتير
3- التكيف محتاج خرطوم وهو ليس موجود عندهم وقالي لما يتواجد حيتصلوا بيا
4- الفرامل اتظبطت تماما
5 – سحب العربية اصبح افضل
المرة دي على الطريق جيبت 185 وتعمدت اناور على الطريق واحدف من اليمين خالص وارجع شمال وما شاء الله والله ماسك الدركسيون بايد واحدة ومش حاسس ان انا قلقان
6- الحاجة اللي متظبطتش هي صوت التزييئة الخفيفة اللي بتصدر احيانا في المطبات من العجلة الخلفية
تقييمي الشامل للتوكيل جيد جدا والمعاملة جيدة جدا
تقيمي للعربية
العربية كأداء ممتازة حتى الان
ده ملخص اول تجاربي
ربنا يباركلك فيها ويبغد عنك كل سوء ويفرحك بيها دايما .. وفى انتظار باقى تجاربك ياباشا
روح عند اي بنزينة اغسل العربية من تحت
اطلع عند اي عفشجي
خليه يريح مسامير البارات اللي ماسكة العجل بعد ما يرفع العربية .....او يريح كل المسامير و خلاص "يريح مش يفك علي الاخر "
يحط شحم
يربط تاني
ادعيلي ان شاء الله
الكلام ده انا عملته في اسكندرية وانا عامل 17 الف كيلو و حالا عامل 29 و مفيش تزييق
شكرا على المعلومة القيمة دي وان شاء الله حعمل كده
ربنا يبارك لك فيها وهى عربيه والله ممتازه ومحترمة جدا وان شاء الله ربنا يبارك لك مالكيها
الف الف الف مبرووووووووك عليك العربية الجميلة وربنا يكفيك شرها ويبعد عنك عيون الناس وفى انتظار باقى تجاربك وعايز اعرف منك اية اخبار استهلاك البنزين وهل جربت تملاها نتروجين فى الكوتش بدل الهواء انا نفسى اجبها وان شاء الله هجبها وخصوصا ان الناس بدات تتكلم عليها كويس جدا الفترة دى صحيح اية اخبار الكاسيت معاك تمام والسماعات هل هى فعلا 8 سماعات ولا ..!فى انتظار ردك والف مبروك
العربية ممتازة على الطريق تجيب بيها 180 وانت مستريح سواقتها ناعمة وجميلة والعربية امكانيتها افضل من سعرها اذا قارناها بالعربيات اللي في نفس السعر ... مجربتش املى الاطارات نيتروجين وبالنسبة للبنزين !!! اللتر جوا البلد بيعمل 10 كيلو تقريبا ... والكاسيت معقول جدا بالنسبة للاستخدام العادي وتوزيع صوته جيد وهو فعلا 8 سماعات ولو حتشتري زيرو يبقى اسئل حد من الاخوة اللي اشتراها زيرو ايه اللي المفروض تاخد بالك منه وتعمله
روحت عند بنزينه غسلت العربية كلها وزييت العفشة كلها والحمد لله صوت التزييئ والصوصوة اختفى بنسبة 99% الحمد لله والشكر للاخ
hemaa_82
شكرا على ردك وربنا يحمهالك يارب
تجربة اول سفرية للساحل بالعربية ...كما كنت متوقع العربية ممتازة على الطريق وانا مسافر كنت ماشي متوسط سرعة 140 -150ومشغل التكيف ومعايا المدام والشنط طبعا ووانا راجع متوسط سرعة 160 -170 عشان كده الطريق مخدش مني ساعتين وانا راجع ..... جربت طعم الغرز على 140 و150 بمنتهى الهدوء والسهولة .... مش حتلاقي مشكلة انك تفادي عربية ماشية في حارتك وانت جاي بسرعتك .... استهلاك البنزين كان تقريبا 25 لتر في المشوار ده ...... اللهم لك الحمد
ربنا يحفظ كل اm11
امين
ماشاء الله ربنا يبارك لك فيها
والله انا حبيت العربية دى بسبب حضرتك
تقبل تحياتى
اعلى سرعة وصلتلها 190 على الطريق الصحراوي واعتقد ان وزنها والعجل العريض من اهم اسباب ثباتها
والله بعد لما اشتريت العربية مستعملة وبقالها معايا اهو حوالي 5 آالاف كيلو بجد نفسي اجيبها زيرو وبحاول اعمل كده فعلا وربنا يوسع ارزاقنا جميعا ..... ادعولي
اللهم امين
انا مبحبش اقارن بين العربيات عشان الناس بتزعل بس انا قارنت مقارنات سريعه قبل كده
الانوس اللي كانت معايا كوري موديل 2002 شاريها زيرو وبعتها من 4 سنين عاملة 85 الف كيلو
اللانوس عربية جميلة وحمالة اسية واصبحت معروفة لدى كل الميكانيكية وقطع غيارها متوفرة ومشاكلها قليلة
لو حقارن مثلا بين صالون اللانوس وصالون الـ ام 11 فالمقارنة لصالح الام 11 بجدارة
لو حقارن بين قاعدتك امام الدريكسون بتاع العربية واحساسك بالركوبة فالمقارنة لصالح الام 11 بجدارة ... خصوصا بعد ما اشتريت الـ ام 11 اخدت لفة بعربية لانوس 2010 شيفورليه بتاعت واحد صاحبي حبيت كده اشوف رايي حيكون ايه بعد ما جربت الام 11 ... بصراحة محبتش انكد عليه بس فرق شاسع في الركوبة بين الاتنين
اما بقى من حيث الثبات على الطريق فالانوس بعد ال100 بتحس انها مش ثابته وبعد ال120 بتكون مكلبش في الدركسيون يعني اعتقد ان اقصى سرعة آمنة في اللانوس 120
الام 11 جيبت بيها على الطريق 180بسهولة وباخد غرز وبتخطى السيارات وبحدف يمين وشمال من غير مشاكل واحيانا بعد لما اخد غرزة وابص في العداد اكتشف اني على 150 مثلا وده معناه ان احساسي وانا سايق ان العربية ثابته فخلاني اغير الحارة من غير ما احتاج اهدي
من حيث التقفيل اعتقد ان ده قد يكون احد عيوب الام 11 يعني مثلا الزجاج بيحتك في الجلد اللي بيعزل فبيسبب صوت زقزقة طول ما انت ماشي
العفشة بالرغم من انها احد اسباب ثبات السيارة وانها ناعمة في المطبات الا ان صوتها في المطبات اعلى من المفروض يمكن نتيجة عدم الاهتمام بالتقفيل .... ويمكن عدم الاهتمام بالتقفيل جعل هناك شكوى من بعض ملاك السيارة بعيوب في التقفيل لكن واضح انها ليست عيوبا عامة في هذا الموديل وده معناه ايضا ان هذه المشاكل بسهولة تتحل في الموديلات الجديدة
بالنسبة لتساوي سعرهم فأنا اقول وبمنتهى الامانة مش متخيل اني يبقى معايا 70 الف واروح اشتري لانوس فاضية واسيب الام 11 ...ده راي شخصي قد يتفق معه البعض وقد يختلف
وبالنسبة لتساوي السعر ايضا فاعتقد ان ده راجع لاننا دايما بنخاف من الجديد ونحب نشتغل في المضمون ومعظم التجار بيحب يشتري الحاجه اللي عليها طلب ويعرف يبيعها بسهولة عن الحاجه اللي ممكن تاخد وقت في بيعها حتى لو جودتها اعلى
متشكر جدا على الشرح الوافى ده بس انا قصدت من السؤال ده الرد على البعض اللى بيقول على الصينى انك بتشترى كماليات بس وممكن تبوظ بسرعة
لكن الواضح من كلامك اللى عن تجربة واضحة ان الm11 لو قارنها بعربية بنفس سعرها هى تكسب بمراحل
تسلم ايدك والله احنا كان معنا لانوس ومعنا فيرنا وبعنا الانوس موديل 2000 كانت زيروا وجنا ام11 وهى بالنسبة لى احسن واحده احسن من الفيرنا والانوس ام11 تكسب