مسمار في جنب الكاوتش!

**nono533223** · 25-06-2011 04:09 PM

السلام عليكم
لو سمحتم يا جماعة كنت عايز رايكم في موضوع غريب شوية انا امبارح كنت بمسح العربية وبالصدفة لقيت حاجة غريبة طالعة من جنب الكاوتش دققت لقيته مسمار رفيع شوية بس داخل مسافة كبيرة من جنب الكاوتش الغريب انه مش عند المكان اللي بيلامس الطريق فا مش عارف دخل كده ازاي انا شيلته و حطيط مياه لقيت طبعا هوا طالع بس بسيط فاافضل حل اعمله ايه ؟ انا ديه اول عربية و اول مسمار ههه الحمد لله فا معنديش فكرة انا سمعت عن الخوابير بس الخرم رفيع اعتقد لو خابور هيوسعوا اكتر كمان مكانوا غريب ياريت تفيدوني افضل حاجة ايه لاني بسافر كتير و طبعا الكاوتش مهم جدا يكون سليم و انا من اسكندرية فا يريت لو تقولولي افضل مكان جزاكم الله خيرا

**nono533223** · 25-06-2011 04:25 PM

سؤال كمان معلش هل الافضل كنت سيبت المسمار زي ما هوا و خلاص احسن و اني شيلته دا غلط ؟

**Xlance2010** · 25-06-2011 04:38 PM

أولا الحمد لله على كل حال فقد قدر الله وماشاء فعل والموضوع بسيط جدا فلا تشغل بالك ويمكن عمل بادج وليس خابور فالبادج يتم عمله من داخل فردة الكاوتش بخلاف الخابور حيث يتم توسيع الثقب ووضع الخابور الكاوتش يعنى عامل الكاوتش بيستسهل يحل الفردة فعلشان كده بيشتغل بالخابور وحاول تتعامل مع محل كاوتش يكون ثقة وقريب منك وربنا يرزقك الخير حيث كنت ولك ارق تحياتى - المدون / طارق الجيزاوى

**Super_Star_h** · 25-06-2011 07:54 PM

لما تلاقى مسامير بعد كده سيبها زي ما هى لغايت ما تروح لبتاع الكاوتش
عشان العجله متريحش على الارض
ولما تعمل خرم قوله اعمله بلزق من جوه مش عايز خوابير
وعادي ولا يهمك انا عندي خرمين فى فرده واحده وعاملهم قبل كده
وبسافر وبروح هنا وهنا عادي مافيش خطر
ولو قلقان انقلها بدل الفرده اللى ورا احسن

**dr_mohamed16** · 25-06-2011 09:29 PM

هو فعلا البيدجات احسن من الخوابير ؟

**nono533223** · 26-06-2011 12:55 AM

المشاركة الأصلية كتبت بواسطة xlance2010

أولا الحمد لله على كل حال فقد قدر الله وماشاء فعل والموضوع بسيط جدا فلا تشغل بالك ويمكن عمل بادج وليس خابور فالبادج يتم عمله من داخل فردة الكاوتش بخلاف الخابور حيث يتم توسيع الثقب ووضع الخابور الكاوتش يعنى عامل الكاوتش بيستسهل يحل الفردة فعلشان كده بيشتغل بالخابور وحاول تتعامل مع محل كاوتش يكون ثقة وقريب منك وربنا يرزقك الخير حيث كنت ولك ارق تحياتى - المدون / طارق الجيزاوى

المشاركة الأصلية كتبت بواسطة super_star_h

لما تلاقى مسامير بعد كده سيبها زي ما هى لغايت ما تروح لبتاع الكاوتش
عشان العجله متريحش على الارض
ولما تعمل خرم قوله اعمله بلزق من جوه مش عايز خوابير
وعادي ولا يهمك انا عندي خرمين فى فرده واحده وعاملهم قبل كده
وبسافر وبروح هنا وهنا عادي مافيش خطر
ولو قلقان انقلها بدل الفرده اللى ورا احسن

متشكرر جداا علي الرد افدتوني جدا انا كده ان شاء الله هعمله بالزق از البادج يعني و انقلها مكان العجلة اللي ورا احسن فعلا , جزاكم الله خيرا

**cheetos_892005** · 26-06-2011 01:05 AM

اه البادج احسن من الخوابير مليون مره

متدبش خابور في عجله جديده هتجيب اجلها

بس البادج بيفك للاسف بعد فتره ...

الحل الاحسن المكوه

**georgedada82** · 26-06-2011 05:33 AM

ربنا يسامحه عادل رصيف محافظ اسكندرية خلي بالكم الاسكندرانية اللي ييجي يركن ما يلزقش الكاوتش في الرصيف لان الرصفان الجديدة المصبوبة مكان الخشب بتاع الصب بيبقي فيه مسامير انا مرة شايل 3 من فردة واحدة