الموضوع: صيانة 30000 كم مع كيا سيرفسز المعادي

المشاركة الأصلية كتبت بواسطة revel_sony

السلام عليكم ياحلي منتدي
النهارده عملت صيانه الثلاثين الف الحمدلله

السيارة : كيا سيراتو 2010 خليجي
الموعد : 10 ص
اليــوم : السبت 25 يونيو 2011
المكان: كيا سيرفسز – المعادي

الحكاية بدات لما عداد الكيلومتر وصل لحد 29500 قلت يا واد مبدهاش لما اعمل صيانة ال 30000 في الويك اند ده .. بدأت الرحلة من شارع الهرم متجها الي المعادي .. استقبلني موظف الفرع بابتسامة مهذبة وقالي اؤمر يا فندم .. قلت له عايز اعمل صيانة ال 30000
خرج ورقة كبيرة من الدفتر اللي معاه وقاللي احنا في صيانة ال 30 بنغير الاتي ::
فلتر الزيت والزيت وبنربط العفشة وبنفحص سير المجموعة (الدينامو) والتيل الامامي والخلفي ولو فيه حاجة من دول محتاجة تتغير هنغيرها .. الي جانب ال 27 نقطة التاريخية

سلمته المفتاح وقاللي اتفضل في الاستراحة امامك 8 عربيات
الاستراحة صغيرة نسبيا تكفي 9 افراد فقط فيها تكييف وتليفزيون وولد بيقدم شاي وقهوة وحاجة ساقعة .. ونظافتها ممتازة
انتظرت ساعة ونصف لحد ماعربيتي دخلت .. بس المشكلة اني من الاستراحة مقدرش اشوف عربيتي وهي بتتصلح .. فخرجت مع العامل عشان اتفرج علي العربية وهم شغاليين فيها ووقفت 45 دقيقة وكان كله تمام .. خرجت العربية من الجراج وبدأ يغسل الموتور بالفوم ولقيت الاستاذ اللي قابلني اول ما دخلت المركز بيديني شنطة فيها التيل الامامي فقط وسير المجموعة القديمة الي جانب فلتر التكيف المنتحر ..
سالت علي التيل الخلفي قالي حالته تمامز
وبعدين خرجوا العربية عشان تتغسل من جوة وبرة
التقييم : المكان ممتاز ، الاشخاص ودودين ، التقفيل والجودة جيدة جدا .
التعليق علي العربية بعد الصيانة :
1-صوت الموتور هادي جدا افضل من الاول ،
2-سحب العربية كويس ،
3-الفرامل مش بتمسك كويس اوي عشان التيل لسة جديد بس تعتبر جيدة ،
4-الي جانب ان فرامل اليد بقت بتمسك افضل من الاول بكتيير ،
5-التكيف أفضل نسبيا.

بصراحه الفاتوره في العربيه ومش حافظ اسعار كل قطعه اتغيرت بس تقريبا:
1- زيت شيل 10000 ب 260 جنيه.
2- فلتر زيت ب 35 جنيه.
3- فلتر تكييف 155 جنيه.
4- تشك كامل بال27 نقطه 175 جنيه.
5- سير المجموعه ب 260جنيه تقريبا مش فاكر هوه ده اللي ناسي سعره بصراحه.
6- تيل أمامي ب450 جنيه.
7- غسيل كامل لسياره بالموتور 30 جنيه.

وكل صيانة وانتوا طيبين
واشوفكم كمان 10000 كم علي خير ان شاء الله

هوا سير ايه اللى بيتغير على 30000 ده لا حاول ولا قوة الا بالله العظيم

وسؤال تانى ايه نوعية التيل اللى ركب ف العربية هل هوا الاصلى ؟

وبخصوص التيل بتفرق من واحد لواحد على حسب الاستخدام