ازاى اروح سوق العصر ودمياط من موقف العاشر ؟

**mezokg** · 26-06-2011 01:32 AM

السلام عليكم ورحمه الله وبركاته
يا جماعه انا عايز اروح سوق العصر بتاع الكمبيوتر والاجهزه الرقميه
وهل سوق العصر ده مكان ولا مول وهو فين بالظبط وازاى اروحل موصلات من موقف العاشر

وممكن حد يقولى ازاى اروح دمياط من موقف العاشر او من المرج
وعايز اروح دمياط علشان ازور السيد البدوى واجيب مشبك بجد والله
ممكن حد يقولى ازاى اروح

**mohamed_selim** · 26-06-2011 12:18 PM

سوق العصر فى روكسى .... اسهل حاجه اركب للمرج و خد مترو الانفاق لمحطة سراى القبه و من هناك تاكسى ب 3 جنيه

دمياط برضه روح المرج و خد من هناك بيجو

**aymansaad** · 26-06-2011 11:06 PM

الاحخ محمد سليم مفيش دمياط من موقف المرج بس موقف (السويس و الاسماعيلية وبور سعيد والشرم ) فهو ممكن يركب الى الاسماعيلية او بور سعيد ويركب من هناك الى دمياط
فالافضل يركب اتوبيس دمياط من الترجمان

**AboELsoud** · 26-06-2011 11:12 PM

سوق العصر مول كمبيوتر زي ما تفضل العضو و شرح و هو تحديدا في شارع الخليفه المأمون

لو رايح تجيب حاجه للكمبيوتر في وراه مولين تانيين اسمهم سوق الكمبيوتر او (السخاوي) و دول اسعاهم احسن و ارخص و المحلات اكتر

**mohamed_selim** · 27-06-2011 11:15 AM

المشاركة الأصلية كتبت بواسطة aymansaad

الاحخ محمد سليم مفيش دمياط من موقف المرج بس موقف (السويس و الاسماعيلية وبور سعيد والشرم ) فهو ممكن يركب الى الاسماعيلية او بور سعيد ويركب من هناك الى دمياط
فالافضل يركب اتوبيس دمياط من الترجمان

شكرا للتوضيح .. انا عارف ان فى هناك بورسعيد و اسماعيليه و فايد و السويس .... فأكيد هيكون دمياط معاهم ... بس واضح ان مفيش :)

**mezokg** · 27-06-2011 11:26 PM

المشاركة الأصلية كتبت بواسطة mohamed_selim

سوق العصر فى روكسى .... اسهل حاجه اركب للمرج و خد مترو الانفاق لمحطة سراى القبه و من هناك تاكسى ب 3 جنيه

دمياط برضه روح المرج و خد من هناك بيجو

الف الف الف شكر

**mezokg** · 27-06-2011 11:28 PM

المشاركة الأصلية كتبت بواسطة aboelsoud

سوق العصر مول كمبيوتر زي ما تفضل العضو و شرح و هو تحديدا في شارع الخليفه المأمون

لو رايح تجيب حاجه للكمبيوتر في وراه مولين تانيين اسمهم سوق الكمبيوتر او (السخاوي) و دول اسعاهم احسن و ارخص و المحلات اكتر

الف شكر وانا الى كنت فاكر ان سوق العصر التوب فى الكمبيوتر شكرا على المعلومه

**mezokg** · 27-06-2011 11:31 PM

المشاركة الأصلية كتبت بواسطة mohamed_selim

شكرا للتوضيح .. انا عارف ان فى هناك بورسعيد و اسماعيليه و فايد و السويس .... فأكيد هيكون دمياط معاهم ... بس واضح ان مفيش :)

الف شكر على الرد ولو مفيهاش غلاسه ممكن تقولى ازاى اروح موقف الترجمان انا اعرف انه جمب جرنال الاهرام مش كده برده

**hersha** · 28-06-2011 01:03 AM

اسهل حاجه اركب للمرج و خد مترو الانفاق لمحطة سراى القبه و من هناك تاكسى ب 3 جنيه

حراااام عليك هتلفف الراجل اللفة دي كلها ليه؟؟

الموضوع أبسط من كدة.. لو لاقيت من موقف العاشر مايكروباصات أو ميني باصات بتقول رمسيس جسر السويس أركبها وخليها تنزلك إشارة روكسي.. من هناك تتمشي 10 دقايق لحد المول - شخصيا بحب المشي - أو تاخد تاكسي

فيه أتوبيسات 330 و 940 برده بيعدوا من قدام المول ..

وفيه أسرع حاجة واللي مش هتستناها أصلا .. تركب من موقف العاشر أي حاجة رايحة ألف مسكن , ميكروباص ميني باص أتوبيس.. حاجات كتيرة بتروح ألف مسكن من موقف العاشر.. ومن ألف مسكن تاخد الترام .. أو تاكسي .. وبرده هينزلك قدام المول ...

بالنسبة بقى لدمياط.. ف لسة موصل واحد صاحبي رايح دمياط.. وصلته موقف عبود ومن عبود عربيات ميكروباص بتروح دمياط .. وفيه برده أتوبيسات بس مواعيد وكدة ..

عبود تروحها ازاي ؟ ممكن مثلا تاخد أي حاجة رايحة رمسيس ومن رمسيس ميكروباصات كتيرة بتقول عبوووود عبووووود !!

اعمل حساب اخوك ف المشبك بقى احسن انتة فتحت نفسي !! ;d