الموضوع: انا تعبت مش ادر اعيش

الفضفضة كويسة وشئ مرغوب فيه لكل شخص بدل الانفجار. بس بالراحة يا افرام وشوف مصر مالها وانت يا مصرى عملت ايه عشان تحسنها.

يعنى فيه ناس بترمى زبالة فى الشارع وبترمى من شباك عربيتها كانزات وزبالة وحاجات كتير وبرده لسة فيه ناس بتصحى 7 الصبح تكنس الشوارع عشان تبقى نضيفة ولكن للاسف فيه مصريين مبيحافظوش على ده.

ايه الحل : مش هينفع نمشى ورا كل واحد نلم زبالته ولكن ينفع فى الصلاة فى مسجد او كنيسة نقول لا بلاش كدة ونحافظ عليها لينا نضيفة.

الفيديو جميل وبيقول واقع معظم الاحياء فى مصر ولكن فى امريكا اسواء منها بكتير وده واقع انا عشته لما كنت هناك وكنت سالتهم ايه اخبار البرونكس وشارع فلادلفيا فى نيويورك وشارع الم الشهير طبعا.

امريكا اللى عاوز تروحها او تموت بلد جميلة ولكن لو هتقدر تعيش وسط مجتمع بيعرف طريقة الشخص الواحد ويلا نفسى ومليش دعوة بحد يبقى تروح وتقدم على هجرة من بكرة ولو هتعرف تبقى عضو منتج مفيد لامريكا يبقى تروح تقدم على هجرة.

وامريكا مين اللى مفيهاش تعصب دينى او عرقى : معظم الامريكان مش هيتكلموا عنه بصوت عالى لانه ممنوع الكلام عنه هناك.ولكن كنت سالتهم عن الكلوكس وبقايا الطائفة ديه هناك واللى بتعمله فى السود.

او اسالهم عن الاميش اللى بيجوزوا بنات لاخوات وممنوع التليفزيون لان التكنولوجيا شر ومن الشيطان.

افرام لو حابب تقارن مصر بامريكا يبقى لازم تقارن كل حاجة صح واقرا ودور كتير عن امريكا وغيرها.

الميزة اللى عجبتنى فى امريكا القانون اللى بيمشى على الكل معظم الوقت وصدقنى عندهم كوسا برده .

اهدى يا افرام ومتضايقش وتتعب من اول (معلش هسميها خضة) فى حياتك وتقول الدنيا وقفت وهعمل ايه. طب هتعمل ايه لما تبقى مسافر برا مصر وعلى طريق سريع واتنين سكرانين ببندقية شوت جن يوقفك ويقلبك ويرميك فى الصحرا.

هتعمل ايه لو اتسرقت الساعة 8 بلليل فى نيويورك المدينة التى لا تنام زى ما بيقولوا اودام ماكدزنالدز وتتهري ضرب بعصاية بيسبول لحد ما تتكسح وبعد ما تتضرب واللى ضربك مشى الناس تطلع تتصل بالبوليس وتقولك انت كويس.

كل مكان فيه الكويس والوحش.معلش بقى ده حال ناس كتير يبصوا على الوحش.

ولا يا افرام فيه مصريين محسسين نفسهم او حاسين انهم قليلين عشان كدة بيحسوا انهم بيتعاملوا بطريقة قليلة فى بلدهم.ولكن المصرى اللى شايفها سودا كدة لازم يفكر ولو حتى بشئ بسيط يحليها فى عينه على الاقل عشان اللى جاى من برا يشوفها انضف بلد لانه عايش فيها.

لو انا مكانك وبتسالك ليه بيستحموا فى المجارى كنت هرد عليها واقولها وليه فى امريكا بيستحموا فى اقذر نهر فى العالم(المسيسبى المعروف بطينته السودا)

افرام حاول تبعد شوية عن كلام الجرايد والتليفزيون واراء شخصية وحاول تعرف انت بنفسك.يعنى انت مسيحى واكيد فيه فى منطقتك مسيحين و مسلمين.حد من المسلمين قالك بكرهك ولا متروحش الكنيسة ولا هنهدها ولا ولا ولا .

الاخوان والسلفيين قالوا هنقتل غير المسلم فى مصر واحنا بس اللى هنقعد فيها ونبقى دولة منغلقة ومش عاوزين حاجة من حد؟

طيب حد قابلك فى الشارع او ايام اللجان الشعبية ومسلم وقال لا ده بيت مسيحى مش هحميه.؟

طيب فيه حد قالك غير دينك لتموت؟

افرام بالراحة ومتسمعش لحد وتقرا وخلاص.لا دور انت بنفسك واقرا انت اللى تشوفه عينك وعايشه وسيبك من كلام الجرايد اللى عاوزة تبيع والمذيعة اللى عاوزة تبقى مشهورة ومعروفة علطول.