الحمد لله عدنا الى قواعدنا سالمين بعد تجربتين حلوين
بعد مشقة 10 ايام مصيف بينهم 8 مرات رايح جاى بين القاهره والساحل الشمالى ، عدت اليوم والحمد لله ، وحشتونى جدا يا هونداوية كلكم.
لو تفتكرو كان فيه التجربة اللى انا عملتها بخصوص تعديل الدواسة والتى كان ينقصها التجربة على الطريق السريع ، والحمد لله النتيجة ممتاذة ، التسارع بقى افضل كتير من الاول ، والنقطة الاهم انى كان عندى مشكلة فى التسارع بعد الـ 170 السرعة كانت بتزيد ببطئ شديد ، ولكن بعد التعديل بقيت كانى طالع من الـ 120 للـ 140 ، بس السرعة القصوى تقريبا زى ما هى ـ 228 بس الفرق فى الزمن اللى حققت قيه السرعة دى ، وطبعا مش عايز اقول على كم العربيات اللى اتعلم عليها كالعادة، بجد كل يوم بيزيد عشقى للهوندا .
وعملت حاجة تانية جديده بس للاسف شيلتها تانى، كنت عند الشركة اللى بتورد جهاز ال دى فى دى للتوكيل من اسبوعين كدة ، وانا قاعد بالصدفة لاقيت وفد صينى موجود هناك ، قالولى ان دى شركة هتورد للتوكيلات الـ smart key “ وجايبين اجهزه للالنترا والتيوتا و الفورد وكام عربية تانية ، وده نظام دخول السيارة وتدويرها بدون مفتاح” ، المهم طبعا الشيطان اشتغل كالعادة وطلبت جهاز، وعملولى خصم اكتر من 50% عشان عربيتى هتكون اول عربية هوندا فى مصر يركبلها السيستم ده ، وهيستغلوها فى عمل عرض امام توكيل هوندا اثناء التركيب، وكان الموعد يوم الخميس الماضى ، طبعا سيبت الاسرة فى الساحل ورحتلهم العبور ، وبدأ التركيب :
مكونات الجهاز :
الوحده الرئيسية : ودى بيتحط فيها الفيشة بتاعة الكونتكت بدون اى قطع او لحام طبعا لانها معمولة للهوندا ، وبيخرج منها عدة فيش
اكرة الباب الخارجية ببصمة اليد
زر استارت ودة ليه مكان فى التابلوة على الشمال جنب مفتاح النور
ارييال بيركب بين السقف والفرش
حساس صدمات
وحدة رفع للزجاج
التركيب :
.... طبعا كل التركيب بدون اى قطع او لحام فى اى سلك الموضوع كله فيش .
قعدنا نركب فى الجهاز من الساعة 11 صباحا الى الساعة 8 مساء ، وده لسببين الاول ان كان الراجل الصينى اللى بيركب والناس كلها واقفة تتعلم منه وبيطلبة منه اعادة كل خطوة عشان يكتبو ويصورا ، والسبب التانى انه بعد ما الجهاز ركب اكتشفت ان الموديل ده مفيهوش تدوير من الريموت ، ومفيهوش مفتاح ادخال الرقم السرى فى حالى فقد الريموت ، فخليتهم شالوه تانى وركبنا بتاع التويوتا على نفس ضفيرة جهاز الهوندا مع تعديل بسيط من اختراعى.
النتيجة بعد التركيب :
الجهاز عبارة عن عن ريموت صغير موجود فى جيبك و اول ما تقرب من العربية الـسنتر بيفتح
تركب العربية وتدوس زر استارت دوسة واحد يفتحلك اول سنة فى الكونتاكت “بتاعت الكاسيت”
تدوس فرامل و زر استارت العربية تدور
دوسة طويلة لو عايز تبطلها
اول ما تبعد عن العربية تقفل السنتر + الزجاج لوحدها
ده بالاضافة انك ممكن تدورها بالريموت عن بعد .
الحساب يوم الحساب :
جيت بعد كده ادفع الفلوس ، كانت ماكينة الفيزا بتاعتهم مش شغالة ، فالناس مشكورين قالولى لما ترجع بالسلامة ابقى هتلنا الفلوس ومشيت.
العوده الى الاسكنرية والتجربة العملية :
خدت بعضى ورجعت تانى على الاسكندرية ، وفى الطريق الساعة التاسعه مساء كانت المفاجأه ، العربية مش عايزه تدور ، طبعا فكيت الدنيا اللى ركبت دى كلها اراجع على سلك سلك وفيشة فيشة كله تمام وبعد عناء اكثر من ساعة فى الضلمة وعلى الصحراوى فى الاخر طلع ان فى سلك ارضى مكانش مربوط كويس فك وهو اللى طلع عينى ، المهم ربطة وكملت وكله بقى تمام، وانا ماشى بفتح الزجاج اللى جنبى لاقيتة بيقول احلى كلام وبيطلع وينزل مع نفسه ، وهب نزل ومش عايز يطلع ، وقفت تانى وفكيت زراير الزجاج وركبتها تانى اشتغل وقفل ، ومرضيتش افتحة تانى لغاية ما وصلت عشان ميعملش معايا نفس الحركة .
طبعا بعد ما وصلت حسيت ان اللى انا عملته ده ملوش لازمة وفلوس راحت فى الارض ومشاكل ممكن توقفنى فى اى وقت ، و قعدت يومين فى حيره شديده واخيرا خدت القرار امبارح باليل فكيت الجهاز كله وحطيه فى شنطة و وانا جاى من اسكنرية النهارده راجعتهلهم واستريحت .
اللذيذ فى الموضوع ان كان فى ما لا يقل عن 80 عربييه النترا 2012 الشكل الجديد واقفين بيركبو الجهاز ده هناك !!!!
معلش طولت عليكو بس قولت احكيلكو تجربتى .
