الموضوع: تعالوا نكون من هذا القليل

من فترة كنت باشوف مسلسل ER و كان المشهد بين زوج و زوجة انفصلوا و بعدين رجعوا لبعض تاني.. و همه بيتكلموا قال حاجة فضحكت هي ضحكة طلعت منها عفوية اوي، انما هو بص لها و قال لها طول عمري باحب ضحتك دي.. لما كنا متجوزين I took it for granted يعني لما كانت معاه و بيشوفها كل يوم "إعتاد" على سماع الضحكة دي.. انما لما بعدت عنه و سمعها تاني حس أد ايه هو كان مفتقدها.

انا تأملت في المشهد ده كتير و قلت سبحان الله.. كام نعمة ربنا أنعم علينا بيها انما احنا We take it for granted و اتعودنا على وجودها في حياتنا و ده بيخلينا مش بنحس بقيمتها الحقيقية؟ :(

طيب ما تيجوا هنا مع بعض نحمد ربنا على نعمه اللي اتعودنا عليها، عشان نبقى شكرنا نعم ربنا و ربنا يبارك فيها قبل ما نكتشف وجودها بعض ما تضيع مننا و كمان عشان يسري علينا الوصف الشريف: و قليل من عبادي الشكور.. تعالوا نكون من هذا القليل.

الحمد لله يا رب أن وهبتني أمي.. و الحمد لله ان امي هي امي مش امي حد تاني غير أمي.. حد فاهم حاجة؟ :o
باحس بنعمة ربنا علية أوي لما أشوف حد من صحباتي مامتها متوفية.. أد ايه اليتم ده حاجة صعبة.. يا رب خللي لي أمي.

الحمد لله على نعمة الصحة.. و حطوا تحت دي 50 ألف خط.. فعلا لما الواحد يقول انا كويس صحيا دي تسوى كتير.. ده الواحد شوكة تدخل في صباعه تجننه و لا وجع ضرس ما ينيموش الليل و اسمنا برضه عارفين ان الموضوع ده ديته مشوار لدكتور السنان.. انما مش بنبقى طايقين.. فما بالك بالأمراض الخطيرة ربنا يعافينا كلنا و يعافي من نحب يا رب.

يا رب لك الحمد على الصداقة.. ياااااااااااااه.. لما يكون لك حد صديق صدوق.. عمرك ما زوقت كلامك معاه و لا حسبت حساب لحسن فلان ده يزعل او يفهمني غلط.. مش بتحمل هم إلا و يشيله معاك.. بيحبك و بيديك و مش بيحسب هو إداك أد ايه و أخد منك أد ايه.. الحمد لله على نعمة صديقتي الأنتيم و عشرة عمري و توأم روحي وئام :)

يااااااااااه.. انا على فكرة حسيت براحة اوي و انا باتذكر نعم ربنا علية.. يا رب لك الحمد كما ينبغي لجلال وجهك و عظيم إكرامك.

الحمد لله علي كل شئ
الحمد لله اني بشوف و بسمع و بتكلم و بتذوق و بشم
الحمد لله اني اتولدت مسلم
الحمد لله ان عندي شغلي و من يوم ما اتخرجت ما قعدتش
الحمد لله ان عندي عربيه و اتنين و بركبهم كل يوم و بسوقهم .
الحمد لله انه اكرمني بوالدي و والدتي و اللي كنت بتقطع عليهم و انا في الغربه و بتصل بيهم لمجرد بس اني عاوز اسمع صوتهم.
الحمد لله علي كل حاجه حلوه في حياتي
و برضه الحمد لله علي اي حاجه سيئه و الحمد لله ان ربنا مش كاتبلي الاسوأ.

.........
لو حفتكر يبقي انا عاوز منتدي لوحدي اكتب فيه لان نعم ربنا كتير اوي عليا .
ربنا لا تزغ قلوبنا بعد اذ هديتنا و هب لنا من لدنك رحمه