خلي بالك وانت بتغسل عربيتك من تحت
قولت احذر الناس وكله ياخد باله لما يجي يغسل العربية من تحت
النهاردة روحت اغسل العربية علشان كان بقالها كتير قوي متغسلتش وقولت اغسلها من تحت بالمرة
طبعا عارف ومتاكد ان غلط المية تيجي على فتيس او موتور واللي كنت خايف منه حصل بالرغم من التحذير الكتير والزن على دماغ الصنايعي انه يخلي باله كويس
بعد مالعربية خلصت قولت ادور العربية وانا حاطط قلبي في ايدي
دور يامعلم...... الحمد لله دارت
اتحرك يامعلم ..... اتحركت والحمد لله بس على ال r بس ومش عايزة تتحرك على الd
طبعا فضلت مبلم ومش عارف اعمل ايه روحت بطلت ودورت مفيش اي حاجة قولت يبقى حصل اللي في دماغي
روحت جايب الصنايعي من قفاه وهزقته وبستفته جامد ومسحت بكرامته الارض وطبعا شتيمة وتهزيق والناس اتلمت وكل ده علشان الباشا ضرب المسدس في الفتيس
طبعا قعدت احاول واحاول واحاول لحد ماجيه في بالي اجرب حاجة
روحت جايب ال 3 مفيش حاجة
جبت ال 2 لقيت العربية اتحركت ونزلت كمان على ال l لقيتها بتتحرك عادي روحت طالع على الd لقيتها ماشية قولت يخربيت العفاريت
المهم وانا برجع لورا تاني جبت ال r وجاي اطلع لقدام طبعا لازم اجيب ال 2 وبعد كدة اجيب d
مشيت وقولت ان شاء الله تنشف وترجع زي الاول روحت جاري بالعربية اتاريها مفيهاش غير اول وتاني
روحت في سري قعدت ادعي على الصنايعي واشتمه لحد ماوصلت البيت برجع وانا بركن وبجيب الd لقيته زي الفل طبعا حمدت ربنا على كل شيء
اعذروني اني طولت شوية بس قولت احذر الناس تخلي بالها وتروح لحد كويس يغسل العربية من تحت