صوت تزييق في عفشة السيتي.......
السلام عليكم جميعا.......
زي ما إنتوا عارفين معايا سيتي 2010 lx ، يادوب لسه عاملة 3900 كيلوا فقط. وطبعا لسه فرحان بالعربية فبحسوك عليها وناقص إني أنزل منها وأشيلها على كتافي وأمشي بيها.
من حوالي شهر كده بقيت أسمع صوت طقطقة بيجي من ناحية الباب الشمال وأنا سايق في حتة مدربكة، رغم إني ببقى ماشي تاتا تاتا، دا أنا حتى ما بسيبشي العربية تمشي على سرعة السلانسية.
المهم من حوالي أسبوعين بعد ما رجعت البيت وجيت نازل منها سمعت صوت تزييق معدن جاي من ورا شمال، قلت بلاش حسوكة ومافيش حاجة وطنشت. وبعد حوالي 5 أيام الصوت بقى واضح وضح الشمس، خصوصا لما بضغط على الشنطة لتحت أو للجنب.
كلمت المهندس إسلام اللي في توكيل التجمع الخامس وفضيت نفسي يوم السبت اللي فات وركنت العربية في البيت لحد ما روحت له إمبارح.
قلت له على الصوتين دول وقلت له مش عارف هل هما مرتبطين ببعض ولا لأ؟
قال لي تعالى نجرب، روحنا وقعدنا نهز في الشنطة، ولا الهوا، ولا في أي صوت خالص. طلعنا نجربها، وطبعا عشان ما فيش شارع مدربك جنب التوكيل، فا الصوت اللي من جوا ما ظهرشي خالص.
المهندس إسلام قال: برضه حنكشف عليها عشان نطمن.
وبعد 3 ساعات إنتظار من 9 ص إلى 12 ظهرا، قال لي: العربية ما فيهاش حاجة، يمكن يكون شوية تراب هما اللي عملوا كده. طبعا ما قدرتش أعارضه خصوصا إن الصوت ما ظهرشي خالص. ودفعت 60 جنيه ونص وأخدت العربية وامشيت.
أول ما رجعت المنوفية وركنت العربية وجيت بنزل، سمعت الصوت تاني. والنهاردة الصبح وأنا جاي أركب برضه سمعت الصوت اللي من ورا شمال، وأنا ماشي في حتة مدربكة كان الصوت اللي من جوا واضح جدا.
مش عارف في إيه؟؟؟؟؟؟؟؟
ولو فيه، الصوت بيروح وييجي. وبيقولوا في التوكيل إن العربية ما فيهاش حاجة......
حد ممكن يساعدني، أنا حتجنن، لأني ما بحبش تبقى حاجة مش مظبوطة، لازم كل حاجة تبقى على أكمل وجه.
والسلم ختام