الموضوع: صيانة ال 10000 فى روكسى

السلام عليكم، النهاردة استقربت وعملت صيانة ال 10000 فى التوكيل فرع روكسى، هناك عاملين موضوع ال night shift وبالتالى أخدت ميعاد على الساعة 6 مساء ورحت بالفعل فى ميعادى واستلموا العربية وحبيت اقول لهم على شوية حاجات صغيرة مضيقانى زى تزييق دواسة الفرامل والكرسى بتاعى والتكييف وفوجئت ان حل المشاكل ما بينفعش فى مواعيد بالليل فيما عدا تزييق الفرامل قالى دى حاجة بسيطة وهنشوفها وتنضيف فلتر التكييف، وكان ميعاد الاستلام بعد ساعة وربع ودى كانت الحسنة الوحيدة اللى حصلت فيما عدا ذلك :
1- تزييق دواسة الفرامل زى ما هو
2- العربية طالعة زى الزفت من جوه وبره (زى ما دخلت يعنى :)) ).... بس يعنى ما هانش عليهم يدلقوا عليها شوية مية .... أنا فاكر فى صيانة الألف فى أبو رواش العربية كانت طالعة بتبرق من برة وجوه
3- سالتهم هتغسلوا الماتور قالى ده حاجة اضافية وبـ 30 جنيه
4- بعد ما العربية طلعت دخت ربع ساعة علشان الاقى حد يختم لى كتالوج الصيانة
5- مافيش أى احساس بأى تغيير فى العربية فيما عدا فرامل اليد حاسس انها بقت مسافتها أقصر مش عارف عملوا فيها إيه بس هى كويسة ماعليش عليها ملاحظات

المهم الصيانة اتكلفت 392.5 جنيه بالتمام والكمال وكتر خيرهم ومش عارف أودى جمايلهم فين سابولى ال 2.5 وأخدوا 390 بس :))