اختراع جديد للقضاء على المطبات
من ساعة ونص كدة..عالساعة 12 ونص صباحا ...كنت رايح مشوار صد رد وماصدقت فتحوا الطريق بعد الحفر اللى بقاله اكتر من سنة تقريبا وفرحان جدا ان الطريق اتفتح واتفاجئ بمطب من اياهم عالى بطريقة مستفزة ومش هتصدقونى لو قلتلكوا انه ضارب فى 35 سنتى تقريبا وعرضه نص متر مش هيزيد عن كدة وبالاسمنت كمان
فى اللحظة دى رحت راجع بالعربية لانى عارف انى مش هاعرف اعديه والعربية تطلع سليمة ...جيت الف من شارع تانى لاقيته بقى ساحلى كله بالكامل مية رحت راجع للمطب ونزلت من العربية ولسه هانزل اشتم بصوت عالى عشان اصحى اللى النايم ومأنتخ فوق من غير مايحترم البنى ادمين وبعدين قلت عيب خصوصا انى كنت محضر رصة شتايم كانت هتبقى اول مرة انطقها فى حياتى وخت المطب واللى كان كان ووانا راجع جتلى فكرة جامدة طحن
مارضيتش امشى من طريق تانى ورجعت للمطب تانى وتمنيت انه لو يكون اعلى من كدة وعديته على راحتى خاااااالص وكل ماكان اعلى كل ماهياخد وقت...استنوا!!!!! نسيت اقولكوا سر الاختراع.....ايدى عالكلاكس دا كله وبصورة استفزتنى انا شخصيا وبعد ماعديت المطب نزلت من العربية وقلت بصوت عالى "كل يوم من دا لغاية ما المطب دا يتشال" ...وكل يوم هاعمل كدة لغاية مايشيلوه من نفسهم
وكل واحد فى المنطقة شاف المطب دا وهو بيتعمل وسكت يبقى يستاهل اللى يجراله لانه تقريبا اوحش مطب شوفته فى حياتى لدرجة انى خفت ليخبط اكصدام العربية من قدام...بعنى المفروض اللى معندوش عربية يفهم ان ده حاجز اسمنتى مش مطب
انا ممكن اكون جرحت العربية"اللى متجرحة اصلا" من تحت بس ان شاء الله مش هيدوم لانهم يا إما يشيلوه يا إما هيسهروا عشان يعملولى كمين وفى الحالتين يانعيش عيشة فل يانموت احنا الكل