الموضوع: طريقك لتسقيط مواتير الكرستالة

المشاركة الأصلية كتبت بواسطة محمد الجرجاوي

يعني القصة دي تخش في 10 الاف جنيه بالجنوط والكاوتش

ده لو كده يبقى تمام انا لغاية دلوقتى ماشفتش الاسعار دى طبعا الاخ الكريم صادق فى كل كلامه بس غريبة جدا الموتور بحاجته ب6300 يابلاش فرق بينه وبين ال1500 2000 جنيه بس حاجة محترمة جدا ولو على موضوع الميكانيكى والكهربائى انااعرف واحد ميكانيكى باخد 500 واخوه كهربائى بياخد 350 جنيه والشكمان بقى على حسب وزيه التكييف والله كده كويس جدا

المشاركة الأصلية كتبت بواسطة koke_lancer

بسم الله الرحمن الرحيم
ان شاء الله فى الموضوع دة هنتكلم عن عربية شهيرة جدا فى بلدنا الحبيبة و تعتبر معشوقة الشعب المصرى على مدار ثلاثة عشر عاما الا وهى لانسر موديل (1996-2000) و المسماة بالكرستالة
هنتكلم عن التسقيط بالنسبة للمواتير واكثرها شيوعا هنا فى مصر
اولا هذة السيارة نزلت مصر بموتورين الاول 1.3 لتر و الثانى 1.6 لتر
بالنسبة للتسقيط فى مصر هناك ثلاث مواتير
1- 1.5 لتر
2- 1.6 لتر مايفك
3- 2000 الايفو

بالنسبة ليا انا سقطت المايفك هتكلم علية بالتفصيل الممل و بالاسعار فى الاول و بعد كدة هنتكلم عن باقى المواتير تباعا
الموتور دة سهل جدا فى تسقيطه و بيدى 172 حصان
مدة التسقيط يومان وتم تسليمى السيارة فى اليوم الثالث ظهرا
ازاى تسقط صح دى نقطة لازم تكون عارفها لازم تكون عارف الاحتياجات الى هتاخدها من التاجر
الموتور بيجى بعفشته بواقعدة و بالعفشة و العدادات و التانك و ضفيرة الكهرباء و كنترول الماكنة و كنترول الفتيس فى حالة الاستيبترونك و على فكرة مش بتنزل اتوماتيك بتنزل يا مانول يا استيبترونيك
التكلفة كل الحاجات الى قولنا عليها (موتور عفشة فتيس عدادات تانك ضفيرة كنترولات ولازم تجيب شداد الى بيمسك المساعدين من عند البطاحات و طنابير العربية المايفك الى هى مع العفشة )
التكلفة 6300 جنية
المصنعية انت و شطارتك بس لو حد فاهم وسقط قبل كدة كتيير و فاهم كويس اوى هياخد منك 1000 جنية بالكتير اوى
و انت بتسقط هيبقى فى حوالى 500 زيت موتور و زيت فتيس و منظفات و اكراميات
نيجى بقى بعد كدة لحاجة انا شايف ان عمر حد ما اتكلم عليها بس هى مهمة جدة
الشكمان و دة تكلفته على حدسب الخامات الى انت بتطلبها
و بيبقى فى حدود 1000 جنية او اقل ولازم تكون المواسير 2.5 بوصة الموتور بيبقى جى بشكمانوا لحد السوستة يعنى الهيدر
الجنوط لو عندك جنوط الكرستالة الاصلية مش هينفع تركب لان ابعاد الاخرام بتاعتها 4 *100
اما طنابير المايفك 4*114 زى ابعاد البومة ال 1600
سعر الجنوط والكاوتش مش هنتكلم لانو كل واحد بيختار المقاس و الصناعة و الجودة و الاسعار كتير
و بعد 1000كم بنعمل سيرفيس للموتور هنشوف السيور و نغير زيت و فلتر و بوجيهات
بالنسبة لقطع الغيار هى متوفرة عند اولاد جابر فى الحرفيين و عندو الاصلى و اليابانى و الكورى
دة بالنسبة للمايفك و على فكرة قطع غيار كتيرة اوى زى ال 1300 سى سى مفيش اختلاف بينهم
و البقية تباعا

اخى الكريم الف الف مبروك على التسقيط وربنا يستر طريقك بس معلش عندى شويه اسئلة لو تقبلت مرورى انت جايب الموتور من عند مين وبالنسبة لقطع الغيار ممكن تقولنا ايه هيا القطع اللى انت لقيتها يعنى زى ايه اللى محتاجه ولقيته للمكنة اخبار التسارع ايه الاستهلاك الفرامل يعنى كلمنا اكتر بس الاهم من ده كله من عند مين الموتور ده وبالنسبة للورق انت اخد ورق شكله ايه علشان انا برضوا مسقط بس لسة مرخصتش وعايز اعرف الراجل مدينى الورق صح والا لا تحياتى وانا كمان كنت وعدت الاستاذ صبحى انى اعمل موضوعى عن التسقيط فى قسم ميتسوبيشى بالتفصيل الممل تحياتى

وليا تعقيب بسيط هية الكريستالة نزلت 1600 والا حضرتك قصدك 1500 اللى هيا الجامبو ؟ والميراج

الجامبوا 1600
بالنسبة للورق هما ورقتيين الفاتورة و الورقة التانية صورة الافراج بتاع الموتور و بيبقى مكتوب فيها رقم الموتور و النوع (ميتسوبيشى)
المكنة القديمة انت و شطارتك بس دالاسعار دى من غير ماياخد اى حاجة من القديمة
ال1500 دى الخليجى و الميراج

التسارع بتاعها ممتاز جدا
الاستهلاك مش بتاكل بنزين لو مش هتقرص جامد 9.9 كم لكل 1 لتر
الفرامل انا قولت هنجيب العفشة علشان بيبقى معاها الطنابير الى هيا الفرامل
اه فى حاجة نسيت اقول عليها السيرفو بتاخدوا مع الحاجة و مش بتدفع فلوس زيادة اسامى الناس ينفع اكتبها عادى ولا دة ممكن الادارة تفتكروا اعلان يا ريت المشرف يجاوبنى وانا هكتب اسامى ناس وارقامهم
بس الاسعارممكن تختلف تقل شوية او تزيد شوية على حسب السوق

بص الميكانيكى واخد منى 700 غير الاكرامية و دة تبع التاجر لانى حبيت انو هو الى يسقط علشان لو فى حاجة هو الى يشيلها
الترخيص هتروح بصورة الافراج المرورو الى مبعوت عليه الى هو بيبقى المرور الرئيسى فى المحافظة وليكن الكلام على محافظة القاهرة
اولا هتروح الدراسة بصورة الافراج هتديها للموظف هيقولك وصل ولا لأ لو وصل حاول تاخد تاريخ تسجيلو فى الدفتر و رقم التسجيل و تقولو يسلموا لمندوب المرور بتاعك المندوب دة تقريبا بيروح الدراسة يوميا
و ياريت لو ترجع للمرور بتاعك و تشوف المندوب و تديلوا الارقام دى بالصورة بس لازم يبقى معاك صورة شايلها المندوب هيروح يجبها و ترجع
المرور تانى يوم و تسال ان الافراج الصل وصل لو وصل طلع الفاتورة و ابتدى ظبط واثبت الموتور الجديد على العفشة و مبروك