الموضوع: بشرى لأهالي دمياط .. المصنع هيتنقل للسويس

المشاركة الأصلية كتبت بواسطة CAMARO

معلش ممكن أرد على الأخ mbluethunder الأول .. ؟!



المصنع دة بينتج اليوريا و الأمونيا .. و الصناعة دي من أكثر 10 صناعات ملوثة للبيئة و مضرة للصحة .. دة غير إني قرأت إن خزانات المواد دي المقرر إقامتها في المصنع لو إنفجرت قوتها التفجيرية هتكون أكبر و أشد تأثيراَ من إنفجار قنبلة هيدروجينية - القنبلة الهيدروجينية دي القنبلة النووية بتعتبرجزء منها - .. دة غير الأدخنة اللي بيتم صرفها من مداخن المصنع .. غير المياه اللي بيتم صرفها في البحر و تأثيرها على الثروة السمكية .. دة غير كمان إن الحكومة هتبيع لهم الغاز بسعر مدعم مخفض جداَ ..

أستاذ ناصر الدين نرجع لموضوعنا .. إحنا كنا بنتكلم على الحكومة ..
الحكومة دي عاملة إرهاب للناس بالداخلية يعني أي حد طبعاَ يتكلم أنت عارف هو مكانه فين و الناس بتخاف من كدة ..
و بعدين الشعب المصري دة جبلي عقدة نفسية .. يعني كل واحد رايح على مصالحه و يقول لك أنا مالي و كل دة علشان يلاقي لقمة عيشه .. مع إن الشعب المصري لو إتلم على حل مشاكله و إختيار السلطة الحاكمة المناسبة ..
إن شاء الله كلنا هنعيش في رغد ..

ربنا يخليك يا CAMARO .. نورتني كده :)

بس الموضوع ده بدأ إمتى أصلا... وليه أتنقل من دمياط للسويس.. وليه أصلا أختاروا مصر علشان يقيموا فيه المشروع ده

غير كده.. هل المشروع ده نفعه أكتر من ضرره ولا لأ... كمان مصر هاتستفيد بيه أيه لو قامت ببنائه على أرضها

وليه ماعاملوش المصنع ده في أبعد حته في مصر (زي عمق الصحراء الغربيه) .. ولا حتى راحوا عملوه في السودان

والسويس عامله أيه دلوقتي مع الموضوع ده.. ربنا يكون في عنهم وفي عون البلد

موضوع الغاز اللي بيتباع ببلاش ده .. بجد موضوع محزن جدا

أنا مش عارف البلد ده رايحه على فين بالظيط..

المصنع دة حضرتك ضرره أكبر من نفعه بمليون مرة دة إذا كان ليه نفع أصلاَ لأن إنتاج بالكامل المصنع سيتم تصديره إلى الخارج دة غير إني سمعت إن صاحب المصنع دة أصلاَ يهودي و في حكاية وساطة و كلام كتير كدة ..
أما إقامته في دمياط في رأس البر بالتحديد دة أكبر خطر نظراَ لأن جزيرة رأس البر دي كان في نية إلى إعلانها محمية طبيعية سياحية . و هي أصلاَ مزار سياحي لكل فئات الشعب يعني تخيل أنك رايح تصيف هناك و تشم جو جميل و هوا نظيف فبدل كدة هتشم أدخنة و بلاوي سودة و طبعاَ الكلام دة كله مضر بالبيئة و بالصحة ..
و موضوع الأدخنة دي فيه معارضة من دول جنوب أوروبا لأن الأدخنة اللي هتنتج من المصنع دة هتأثر عليهم اللي هما أصلاَ بعيد عننا بمئات الكيلومترات .. فتخيل بقى المحافظات اللي جنب دمياط و حتى المحافظات البعيدة و أنت نازل ..
ليه بقى عملوا المصنع دة هنا لأن على حسب أستاذ نصر الدين ما بيقول المصنع محتاج مياه عذبة للتبريد علشان كدة عاملينه جنب النيل و برضه يكون جنب ميناء دمياط للتصدير دون دفع رسوم المرور بقناة السويس مع إني حسب ما سمعت إن طالما المصنع مقام في مصر يبقى صناعة مصرية و مبيدفعش عليها رسوم مرور في القناة .. دة بالإضافة إلى أهم حاجتين أولهما إن المصانع دي ممنوع إقامتها في الدول المتقدمة علشان التلوث اللي بتسببه أما السبب الثاتي إن اليد العاملة هنا أرخص من العمالة في الخارج - من أرخصها - ..
أما حكاية نقله السويس دي شكلها طلعت ضحك على الدقون لأن الأستاذ ناصر الدين بيقول إنهم لسة شغالين في الموقع و مفيش توقف ..
و طبعاَ مينفعش يتعمل في حتة صحراء ب\عيدة علشان المياه اللازمة للتبريد أثناء عمليات الإنتاج ..

ربنا يكون في عون أهالي دمياط

يا رب ..
:):)

المشاركة الأصلية كتبت بواسطة CAMARO

ليه بقى عملوا المصنع دة هنا لأن على حسب أستاذ نصر الدين ما بيقول المصنع محتاج مياه عذبة للتبريد علشان كدة عاملينه جنب النيل و برضه يكون جنب ميناء دمياط للتصدير دون دفع رسوم المرور بقناة السويس مع إني حسب ما سمعت إن طالما المصنع مقام في مصر يبقى صناعة مصرية و مبيدفعش عليها رسوم مرور في القناة .. دة بالإضافة إلى أهم حاجتين أولهما إن المصانع دي ممنوع إقامتها في الدول المتقدمة علشان التلوث اللي بتسببه أما السبب الثاتي إن اليد العاملة هنا أرخص من العمالة في الخارج - من أرخصها - ..
أما حكاية نقله السويس دي شكلها طلعت ضحك على الدقون لأن الأستاذ ناصر الدين بيقول إنهم لسة شغالين في الموقع و مفيش توقف ..
و طبعاَ مينفعش يتعمل في حتة صحراء ب\عيدة علشان المياه اللازمة للتبريد أثناء عمليات الإنتاج ..

ايه يا عم الحج CAMARO هو معاليك مشفتش ومحفظتش في الموضوع ده غير أسمي الحكومة تعمل اللي هي عايزاه ومحدش يفتح بقة احنا من الاول هنقر على بعض انا موااااااااااااااااافق على المشروع ولو مش لقيين مكان انا عندي حتة ارض في الهرم ولو عايزين ميه اديهم خرطوم من عندي من البيت ولو مفيش كهربة اوصلهم سلك ويجعلة عامر
هية دي شهامة ولاد البلد ؟
طالبين منك حتة أرض زعلان ليه هتموت من الأبخرة طب ومالوا الموت علينا حق !
عايزين شوية ميه هتقولهم لاء دي حتة المية ثواب يا أخي انت مش مهم تشرب بس ادي المشروعات اللي جاية تعمر بلدك شوية ميه يا أخي وبلاش اسراف انت و أهلك استحمو مرتين في السنة كفاية ؟
عايزين شوية طاقة مدعمة اديهم علشان يدعموا اقتصاد بلدك ايه انتم مش بتحسوا ؟
بس ياتري هيدفعوا زبالة على الفواتير مش مهم مش بيخرج منهم حاجة وحشة شوية كيماويات بسيطة مش بتإذي بتموت بس !؟
عايزين شوية غاز اديهم ومن غير عدادات الناس دي بتشأى علشان احنا نعيش وانت شيل الانبوبة سوري على قفاك ؟
عايزين ايه هدومنا ادينا داخلين ع الصيف ومش محتجينها ؟
مش لازم كل ما تيجي الحكومة المظلومة مع الشعب المفتري ده تعملة مشروع قومي نلاقي الناس الوحشة تتكلم لازم أي حرب يكون فيها ضحايا والحكومة بتحارب الشعب اللي مش فاهم مصلحته علشان عجلة التقدم تسير مش مهم هتسير فين بس لازم تسير ومش علشان شوية بشر عددهم لا يتخطي 74999000 مواطن مش فاهمين مصلحتهم الحكومة هتوقف العجلة دي متظلموش الحكومة هي غالباً العجلة مفيهاش فرامل بس لازم نستحمل علشان باقي ال 75000000يعيشوا في سعادة ويقدروا يصرفوا على اولادهم وندعملهم كل شيء ياريت متبصش للفراغ اللي في الكوباية ولكن انظر بدقة وهتلاقي نقطة مياه موجودة في قعر الكوباية بلاش التشائم ده ايه يعني مصنع هيإذي شوية بشر أيه يعني قمح مسرطن أيه إيدز النخيل أيه يعني تسوية أرض نجع حمادي بالليزر إللي بوز محصول القصب لعدة سنوات أيه يعني تشجيع زراعة الفاكهة على حساب القمح أيه يعني بيع أرض سيناء لمسثمرين أجانب يتضح بعد ذلك أنهم يهود أيه يعني بيع أهم المصانع الحيوية في البلد مصانع التعدين أيه يعني تدمير جميع مكاسب الثورة من بيع مصانع والسماح للأجانب وبالتملك في مصر كان زماااان حق انتفاع فقط لكن الان يتملكون أيه يعني .... أيه يعني.......أيه يعني ....... ايه يعني ....... أيه يعني لما تستحمل شوية أيه يعني كان هيحصلك لو متجبش سيرتي في التحقيق ؟؟
والسلام عليكم ورحمة الله وبركاته
اللهم ولي علينا من يصلح .. وأصلح من وليته علينا
قال رسول الله صلى الله عليه وسلم ( اللهم من ولي من أمر أمتي شيئاً فشق عليهم فأشقق عليه ، ومن ولي من أمر أمتي شيئاً فرفق بهم فأرفق به ) صدق رسول الله صلى الله عليه وسلم
اللهم إغفر لي ولوالدي وللمؤمنين يوم يقوم الحساب
والسلام عليكم ورحمة الله وبركاته