جمعية خيرية لعمل مطبات بالشوارع
السلام عليكم
اللي هيمشي في طريق مصر أسيوط الزراعي اللي بيربط ثمانية محافظات فيها حوالي ثلاثين مليون - ممكن يعد في مائة كل كيلو حوالي خمسة وأربعين مطب صناعي - رقم حقيقي بدون مبالغة
طبعا لو فكرنا هل الناس عملت المطبات دي هزار مثلا - اكيد لا لأن الناس فعلا بيعانوا من حوادث الطرق ودهس السيارات لأبناءهم وخصوصا في الطرق السريعة اللي بتمر داخل المدن والقرى
وفي الإمارات المشهورة بنضافة طرقها هنلاقي داخل المدن كمية مطبات لا حصر لها - تقريبا في كل تقاطع مطبات على الجهات الأربع - وكمان فيه طرق سريعة بيبقى فيها مطبات بس لأهداف محددة وبمواصفات مختلفة
طيب إيه الحل : الحل في رأيي إنه تتعمل هيئة عامة أو جمعيات أهلية لإنشاء مطبات صناعية لكن بطريقة هندسية محسوبة
يعني نعمل مطبات تمنع دهس الناس وكمان ما تساعدش على تكسير العربيات وانقلابها وأي حوادث من نوع آخر
وأنا فكرت إن ممكن كل محافظة أو مدينة يقوم مجموعة من الشباب فيها بعمل جمعية خيرية تتكفل بعمل مطبات قياسية زي أي دولة في العالم ويبقى الإهتمام برعاية وإصلاح الطرق بيشارك فيها جانب أهلي بدل ما ننتظر الحكومة في الظروف دي تحللنا كل مشاكلنا مرة واحدة
مش لازم نصلح ولا نسفلت الشوارع دلوقتي لأن دي مهمة صعبة جدا ومحتاجة الحكومة
لكن المطبات القياسية محتاجة تمويل صغير وممكن يكون عن طريق التبرعات أو فرض رسوم رمزية على شريحة معينة من السيارات بالتنسيق مع إدارة المرور والجهاز المركزي للمحاسبات - زي معونة الشتا كده مثلا
على فكره كل هدف وله مطب بمواصفات خاصة
يعني فيه فرق بين مطب بينبه السواق إنه داخل على مفترق طرق مثلا أو دوار ( صينية )
وفيه مطب علشان يجبر السيارات في إتجاه معين بالتوقف عند مفترق الطرق للسماح بالمار في العمودي إنه يمشي بدون توقف
وفيه مطب ممكن يتعمل بحيث يسمح بمرور المشاه فوقه وبيكون بعرض حوالي أربعة امتار والسيارة بمجرد دخول منطقته بتهدي وتعدي أثناء مرور المارة بالتنسيق العفوي بينهم
وفيه مطب منخفض يتعمل علشان ينبه السواق إن فيه مطب أعلى هو داخل عليه بحيث إنه حتى لو كل المطب الأول من غير ما يلاحظه عربيته مش هتتكسر ولا هتطير لكن هيفهم ويهدي علشان المطب الأعلى اللي بعه
وفيه مطبات بشكل متكرر وبعدد كبير بيوصل لخمسين ومئة مطب وبتتعمل بمواد كيميائية زي الدهانات المقاومة للإحتكاك علشان تخلي السائق يهدي ولو نايم يفوق لأنه داخل على منحدر او ملف حاد
وفيه مطبات بتتعمل بالخرسانة وأخرى بالدهانات وثالثة بالأسفلت وفيه كمان مطبات وهمية بتلصق في الأرض وتوهم السائق إن فيه مطب او حفرة جامدة قدامه
وفيه مطبات محتاجة لوحة تنبيهية ومطبات تانية مش محتاجة
الموضوع علم لكن سهل في نفس الوقت
بس أنا شايف إن أي مجهود هيتم فيه هيكون له فوائد لا تحصى سواء على مستوى حماية حياة المارة أو تحسين أداء السيارات
هي طبعا فكرة ممكن تكون سهلة وممكن تكون مستحيلة وما أعرفش مدى قانونية إن جهة اهلية تتولى عمل المطبات وإيه الإجراءات المطلوبة
وأنا للأسف خارج مصر حاليا لكن لو واحد فكر يعمل الموضوع ده انا مستعد أكون أول مشارك فيه