لمبة الدينامو رجعت ترعش تانى :(

السلام عليكم اخوانى

كنت ذكرت قبل كدة فى موضوع سابق ان كانت لمبة الدنامو فى الاسبرانزا تيجو 1600بترعش والعربية ديرة وواقفة واما ادوس بنزين بتروح
وتم تغيير الدينامو فى الضمان

المهم بعد حوالى 10 شهور من تغيير الدينامو لاقيت انها بدأت ترعش تانى بس المرة دى اما العربية بتسخن يعنى لما مؤشر الحرارة يبقى فى النص بس مش دايما بيحصل ده

واما رحت لكهربائي قالى ان الدينامو بيشحن كويس و زى الفل

ياريت يا جماعة حد يقولنا اذا كان صادف مشكلة زى دى و ايه حلها مع العلم انها مش بتعمل كدة على طول بس اما العربية بستخن بتبتدى ترعش

بص يا سيدى ممكن يكون الفرش الكربونية او بمصطلح الصنيعية الشربون تآكل ومحتاج يتغير فقط ودا تمنة مش غالى بالكتير سعر الفرش دى 10 جنية لوهتجيب حاجة نضيفة + مصنعية الكهربائى.

هو لو انت مغيرة ولسة الدينامو فى الضمان يستحسن تروح التوكيل تانى

كان عندي نفس المشكله في البونتو و كل الناس قالت شربون معادا واحد بس قالي دي كتاوت دينامو و فعلا بعد ما فكينا الدينامو طلع الشربون تمام و الكتاوت بتهيس اشتريتها استيراد و ركبتها و شغال تمام في اعمل حسابك انها حاجه من الاتنين دول

متشكر ليكو اخوانى
ربنا يسهل حبقى اشوف لو فضيت حبقى اروح للتوكيل لان بالنسبة لى لازم اسافر له مخصوص
فالموضوع صعب شوية بالنسبة لى لو مكنش حروح لكهربائى تانى وخلاص

كتاوت الدينامو عن تجربه يامان جبها جديده لو موجوده اواستيراد لو مش موجوده

كتاوت ديناموا داخلي وممكن قاعدة السيلكونات تعمل بردوا العيب ده

متشكر جدا على حسن تعاونكم
انا رحت التوكيل و فك الدينامو , كل اللى عملو نضف البتاع اللى جوة الدنامو اللى بتلف (مش عارف اسمها ايه)
بس الرعشة بتاعت لمبة الدنامو راحت بالرغم انو مغيرش حاجة
مش عارف هل ده حل مؤقت ولا كدة خلاص !!!