الموضوع: تحذير:::: سائق ميكروباص فورد بيسوق بطرف صناعى ... وبيلعب لعبه السيارات المتصادمه

السلام عليكم ورحمة الله وبركاته
سائق ميكروباص فورد بيسوق بطرف صناعى ... وبيلعب لعبه السيارات المتصادمه
امبارح كان الطريق فيه اختناقات مرورية بالقرب من موقف ميكروباصات
كان قدامى ميكروباص فورد من القدام جدا شبه اللى فى الصورة
اضغط هنا لمشاهدة الصورة بالحجم الطبيعي.



شايفين الإكصدامات الصلب الغبيه اللى راكبه فيه
المهم .... فيه سواقين ملاكى اتزنقوا من اليمين علشان يعدوه
فيه ناس نجحت
وواحد حظه المهبب سواق الميكروباس كسر عليه
فكله اكصدام العربيه بالكامل
بس هيه كانت عربيه قديمة ومتهالكة
فضلت بعيد عنه لحد ما بدأ يتحرك والطريق يمشى بقيت بمشى وراه بحذر
بعد ما مشى شويه
المتخلف سواق الدبابه ديه
قرر فجأة يرجع لورا مش يبص ولا يرجع براحه
لا
راجع بسرعه وبغباء منقطع النظير
أدى كلاكسات انادى مفيش فايده
لبس بإكصدامه المهبب فيا من قدام
طبقلى الإكصدام الجديد اللى لسه راكب من كام اسبوع
والشبكة دخلت لجوه
وجزء صغير من طرف الكبوت قد قبضه اليد اتعوج
وزجاج الفانوس الأمامى كان مشروخ اصلا من زمان
كمل عليه بشروخ جديده
العربيه كانت مقعره من قدام بطريقه غريبه
نزلت شوفت المنظر اديته اللى فيه النصيب
وكنت هتجنن من غباءه
ناس جاتلى قالولى ده عاجز ومتفتروش عليه ياجدعان !!!!!
مركب طرف صناعى فى ايده
بالذمة مين اللى مفترى !!!!!
كده الحصيله عربيتين خبطهم فى نفس المكان والزمان
الغبى ده مشى 30 متر ولطش عربيه ثالثه فيات 124 أو 125
الملاكى اللى الناس بتشتريهم تشغلهم تكسيات
شكله لسه راشة جديد .. لطشه وجرحلوا البابين
3 عربيات فى 3 دقائق
فى أقل من 30 متر مربع
بنتخانق معاه بنقول له مبتعرفش تسوق بتسوق ليه ؟
مصمم ان احنا اللى غلطانين
وهو محترف معاه رخصه درجة أولى !!!!
والله لو مكنش راجل كبير كنت اديته بجزمتى
ربنا ينتقم منه ومن أمثاله
كان موقف غريب
كوميديا سوداء ومهببه
والله ماكنت عارف اضحك ولا اتعصب
كنت حاسس انى فى ماجيك لاند ولا فى السندباد
بتفرج على لعبه السيارات المتصادمة
ولا اتخانق ولا اضرب
ولا اكسرله الميكروباص على دماغه ولا اسامحه
بس احلى حاجه عجبتنى فى الموضوع ده الإكصدام التركى اللى انا لسه مركبه
بعد ما شوفته متطبق قولت عليه العوض ومنه العوض
بعد ما مشيت شويه نزلت ببص عليه لاقيته رد لوحده ومفهوش خربوش
طبعا الإكصدام المصرى كان ليا تجربه معاه كتبتها أول امبارح
بالنسبة للشبكة اتردت بالإيد بس العلامة وقعت
عاوزه تتلزق
روحت للسمكرى وانا متغلت وقرفان علشان منظر الكبوت
فك الكبوت وخبطله خبطتين ورده على البارد
البوهيه موجوده بس فيها شقوق
ولما اترد مرجعش زى الأول فيه تعاريج ونتؤات
السمكرى بيقولى مش هقدر اعمله اكتر من كده علشان متحتجش رش
أنا من النوع المحافظ جدا فى سواقتى
وبحب أحافظ على حاجتى جدا
اى جهاز أو اى حاجه معايا بتعيش عمر طويل جدا وبتفضل بحالتها
سواء موبايل أو كمبيوتر أو ساعه أو حتى هدوم
أنا معايا ساعه كنت شاريها من وأنا فى أولى ثانوى
عايشه معايا بقالها 17 سنة ولسه بحالتها

العربيه بحافظ جدا جداااااااااااااا
لو لاقيت فيها خربوش بتضايق جدا
دائما بركنها فى أماكن آمنه وبعيده عن الأطفال
وبغطيها على طول حتى ولو هعقد ساعه أو نص ساعه
ممكن فى اليوم اغطيها واشيل الغطا 10 مرات
مش مشكلة بس احافظ عليها
الجزء الصغير اللى فى وسط الكبوت ده مزهقنى
حتى بعد ما اترد
شكله مش عاجبنى
ديه صورته بعد السمكرة

وديه صورة كمان عن قرب علشان الحبايب

وديه صوره نمرة الميكروباص

لو شوفتها سيبوا الشارع كله وأدخلوا اى شارع تانى
بسرررررررررررررعه
اجررررررررررررى

اقول ايه بس
الحمد لله .... قدر الله وماشاء فعل
وحسبى الله ونعم الوكيل