صيانة الـ 40000 في فرع جسر السويس
بسم الله الرحمن الرحيم
السلام عليكم ورحمة الله وبركاته
انا ها اقوم بعمل تقييم سريع لمركز صيانة جسر السويس واللي انا مستغربله انه فيه العديد من الأعضاء مش عارفينه بصراحة :d :d
الموضوع كان كالتالي من يجي 20 يوم العربية كملت حوالي 40 الف !! قولت اكلم التوكيل احجز معاد للصيانة !! لقيت اقرب معاد كان بعد 15 يوم !! ادي اول مسمار في الدماغ !!!! فكرة الحجز ولمدد طويلة جدا كان احد العيوب اللي من وجهة نظري قفلتني مه كبداية كلام ..
وطبعا لما سألت على توكيل الرواس بتاع العبور الناس كلها بصراحة شكرتلي فيه وانا رحت شفت بنفسي المكان وقيمته وهو ممتاز ولكن قولت اعمل الصيانة في فرع جسر السويس بالمرة يالله مع انه الغريبة انه فرع العبور من غير حجز !!! تروح تدخل على طول ..
المهم كان حجزي على يوم الخميس
نزلت من البيت على الساعة 8 بعون الله على شان اوصل على 9 التوكيل والحمد لله قد كان ووصلت كمان هناك على 8.45 ص وكان فيه قبلي عربية تانية وكان فيه موظف امن بيقوم بتسجيل ارقام وصول السيارات لضمان الأسبقية والأحقية بالدخول الأول !!!
الساعة 8.50 دقيقة بالضبط وصل الفنيين جميعا ومعاهم المهندسين بتوع الإستقبال وكل الطقم !!!
على فكرة توكيل gna الخاص بمرسيدس جنبه مباشرة وتوكيل اسبيرانزا برضه جنبه والغريبة انه توكيل مرسيدس غالبا شكله شغال 24 ساعة ههه يعني انا هناك من 8 وبرضه كان شغال سبحان الله !!
المهم المهندس مصطفى من الريسيبشن جه قيم العربية معايا وشاف فيها كل حاجة واستلم مني العربية بكل شئ وتفاصيل كاملة في تشيك ليست من الخرابيش للخدوش لكل تفصيلة
دخلت العربية في تمام الـ الساعة 9.10 بالضبط وسألت قالولي العربية ها تاخد بالضبط حوالي 3 ساعات !! انا قولتلهم براحتكم انا مواريش غيركم النهاردة !!!
العربية دخلت على الكوريك !! محدش بدأ يقولها انتي فين قبل الساعة 9.40 دقيقة !! عقبال ما الصنايعني شرب كوباية الشاي ووراها السيجارة وبعدها بدأ يقول العربية فين يا جماعة !!! قاعة استقبال العملاء النظافة فيها من جيد الى جيد جدا !! ولكن لم ترقة الى مستوى الإمتياز الحقيقة !!
السرعة في انجاز العربية كانت ممتازة الحقيقة والعربية اخدت بالضبط وقت حوالي ساعتين ونص !!!
نزلت بصيت على العربية وكشفت على كل شئ !! وجدت انه تم عمل كل الازم في العربية ما عدا فلتر التكييف كانت حالته مهترئة وزي الزفت !!! وهمة فكوه نظفوه وركبوه تاني ولكن انا طلبت تغييره !!
تم وضع منظر الحقيقة لدورة الإنجيكشن ولكن متحطش الا بعد ما سألوني الحقيقة هوا وفلتر الهواء !! اي حاجة كانت لا تشملها الصيانة تم سؤالي عليها اولا !!
دفعت مبلغ في حوالي 1500 الى 1600 مش متذكر بالتفصيل كان كام !! فلتر البنزين العظيم الحقيقة مش معاده دلوقتي !! مع اني اللي خوفني بقى التالي !! جداول صيانة الرواس لا تطابق جداول صيانة المصرية !! يعني كل حاجة عندهم دول في معاد دول في معاد تاني خالص !!
وده اللي اثار حفيظتي !!
ولكن التقييم كالتالي !!
السرعة في انجاز العمل المطلوب : من جيد جدا الى ممتاز
الدقة في العمل : جيد جدا
النقاط التي تم فحصها دون طلب العميل في تشيك ليست كاملة : ممتاز !! انا بقارن بناء على وقائع اني بعمل صيانة عربيتي التانية فعارف ظروف التوكيلات ايه .. يعني الكشف على كافة السوائل دي مش بالطبيعة في كل التوكيلات وبيشلوني ساعات فيها ..
الأسعار : تعتبر جيدة جدا والفروقات بين الرواس والمصرية في قطع الغيار في كل قطعة لا يتعدى الـ 5 او الـ 10 جنيه في كل سلعة مرة لصالح ده ومرة لصالح ده !!
العيوب : طول فترة الحجز !!
وعلى فكرة ملحوظة مهمة جدا !!
ضايقني جدا !! اني كنت في التلفون عمال اقوله انا محتاج العربية بشكل سريع فعلا مفيش معاد قريب يقولي معلش يا فندم فيه حجوزات كتير !!! ولما رحت كان يوم الخميس فيه مثلا 40 حجز لى سبيل المثال جه منهم 7 والباقي محدش جه !! الموظف قالي دي سياسة تطبيق انتا ممكن تيجي والـ 40 يجوا وممكن تيجي من غير حجز زي النهاردة ادخلك على طول مهو مفيش حد جه !!!! فأنا الحقيقة دي اثارت برضوا حفيظتي انه موضوع الحجز محتاج تنسيق اكثر من كده مع العملاء العملاء بتحجز ومش بتيجي وده بيخلي عميل عنده جدية بتبعت في معاد ما يعلم بيه الا رب العباد كمان شهر ولا حاجة !!!!
ولكن التقييم العام !!! المكان جيد جدا وممكن ببعض التحسينات يصل لمرتبة الإمتياز !! وجاري ان شاء الله تجربة بقى الرواس في الـ 50 بعون الله :d :d
وما يزال لغز التيل الحائر يسيطر على جماهير الشارك !! كل واحد يقولي غير تيل على كام كده بعون لله :d :d