يوم الجمعة (إن شاء الله) ميعاد صيانة ال 50 للميجان (بالعبور)

السلام عليكم ورحمة الله وبركاته ،،

بإذن الله حجزت ميعاد لصيانة عربيتي وستكون صيانة الـ 50 ألف في العبور
إتصلت بالتوكيل وسألت هل يمكن تركيب إنذار فقالوا لي لا يوجد تركيب إنذار في التوكيل ويمكن تركيبه في الخارج..

هل حد عنده علم بمكان جيد وما هو السعر تقريباً وهل سيتم برمجة الريموت الحالي؟؟ (حالات سرقة العربيات زادت بشكل ملحوظ وخصوصاً منطقتنا اتسرقت فيها عربيتين)

هل سرقة المانيوال في الميجان أسهل من الأوتوماتيك ولا عادي؟

بدأت أسمع شبه أصوات تزييق في الباب الخلفي يمين أثناء المشي فهل حد عنده حل؟

عندي إحساس إن في حاجة في الجانب الشمال الأمامي عشان بدأت أشعر بخشونه وكأن في حاجه في رلمان البليي بتاع العجله أو حكه أو فيه حاجه في العفشة الأمامية ، فما رأي الخبراء في هذا الموضوع؟؟

سألت قبل ذلك عن: هل يمكن تركيب كاوتش أعرض من 195 في الجانط الحديد الـ 15 بالطاسات ؟

من أين آتي بدلايات خلفيه للميجان وما هو سعرها؟

وهل هناك أحد عايزني أسأله على حاجه في التوكيل؟؟

وجزاكم الله خيرا

عقبال صيانة ال 500 ألف إن شاء الله.

بخصوص الإنذار معرفش مكان متجرب مع الميجان بس أى محل كبير و معروف فى شارع دمشق زى السجان مثلاً.

و ممكن برضه تسأل فى الميكانيكون العرب على موضوع التركيب.

بخصوص السرقة.....المانيوال و الأوتو واحد مش فارقة كتير......بس هى الفكرة هو هيدور العربية إزاى ؟

العربية فيها إيموبيليزر يعنى مينفعش تدور غير بالكارت بتاعها او نسخة منه.

صوت الخشونة مش هقدر أفيدك فيه......محتاج وصف أدق جايز أعرف أفيدك.

تزييق الباب عادى :)
حاول ب wd40 ترش على المفصلات و الكالون.......أو بشحم بس تخف أيدك وأنت بتحط.

الكاوتش ممكن تركب 205 بس تقلل الإرتفاع 5 برضه

يعنى الأصلى 195/65

ركب أنت 205/60
و قراية العداد هتفرق بس مش كتير
يعنى و أنت ماشى على العداد على سرعة 100 هتكون السرعة الحقيقية 98.8 مع المقاس ده.

الدلايات معرفش مكان ليها غير التوكيل....و كانت غالية على ما أذكر فى حدود 300 جم للأتنين.......يعنى لو عاوز 4 هتدخل فى 600 جم.

ممكن تسألى على سعر الفوانيس الأمامية ل 2007 من باب العلم بالشئ فقط ؟

هو أنا عندى الوش الخارجى بايظ من الشمس.....و لو جبتهم هجيبهم من برة مستعملين بس عاوز أعرف سعرهم فى التوكيل......لأن هنا فى الإمارات سعرهم فلكى.

جزاك الله خيرا يا أستاذ أحمد على ردك واهتمامك..

الحمد لله عملت الصيانة وسألت لحضرتك على الفانوس بس للأسف السيستم كان واقع فمعرفش يقول لي سعره..
كل اللي قاله ألف وشويه..

المهم تم الكشف على العربية بالكامل والحمد لله على كل حال..
وجدت إن العربيه كانت مخبوطه في الجانب الشمال الخلفي والمساعد ملووح..
سعر المساعد الخلفي شمال بــ 950 جنيه

قالوا لي العربيه محتاجه علبة دركسيون.. بكام يا عم بــ 3700 جنيه

الفانوس الأمامي شمال كان مكفي لتحت فقلتلهم يكشفوا عليه... طلع موتور فانوس أمامي وسعره 900 جنيه

اللمبتين بتوع الشبورة محروقين، سألت عليهم لقيت الواحده بــ 175 جنيه

وعشان النهاردة كان الجمعة فمعرفتش أعمل حاجة غير الصيانة ، أنا أصلن مكنتش حعمل حاجة بالأسعار دي

قالي العربية محتاجة طقم كاوتشات ضروري..

كل اللي دفعته هو سعر الصيانة كان 604 جنية بالمصنعية

ومفيش تركيب إنذار في التوكيل ولا في الميكانيكيون العرب

همتكم يا أحباب في الإفادة بسعر الحاجات دي خارج التوكيل و مكان أركبهم فيه

(علبة الدركسيون - مساعد خلفي شمال - فوانيس شبوره - موتور فانوس أمامي و طقم مساحات بالمرة)

وجزاكم الله خيرا كثيرا

لا تنسوا اليوم يوم جمعه ، وهناك دعوة مستجابه
وأكثروا من الصلاة والسلام على رسول الله صلى الله عليه وسلم

عليه أفضل الصلاة والسلام

علبة الدركسيون جديدة فى صقر قريش كانت فى حدود ال 1300
مش عارف إستيراد بكام.

مساعد خلفى....للأسف هتجيب أتنين خلفى مش واحد
أعتقد بس غير متأكد أن الأستيراد بيعمل فى حدود ال 800 للأتنين
و الجديد من برة التوكيل هيكون فى حدود ال 1000 للأتنين ( و برضه مش متأكد.........ده توقع بس )

فوانيس شبورة.........أنت عاوز فوانيس و لا لمبات ؟؟؟؟؟؟؟
أصل فوانيس الشبورة كانت فى 2006 و 2007 تعمل حوالى 500 جم للواحد فى التوكيل :)
كنت رحت مع العقيد خالد و أحمد كمال الحرفيين مرة علشان فانوس شبورة لعربية أحمد كمال......و أعتقد خلصناه على 120 تقريباً ( ساعتها كان فى حدود ال 500 فى التوكيل للواحد )

موتور الفانوس.......مش عارف بيتباع لوحده بره و لا لأ......بس هو غالباً مش هتلاقيه إستيراد لأنه مش هيبوظ فانوس علشان يديك الموتور....إلا لو عنده فانوس مكسور و لا حاجة.

عموماً الفانوس إستيراد أعتقد برضه أنه هيبقى فى حدود 500 و جديد على ما أذكر كان فيه من 450 جم حتى 900 جم ( جديد برة التوكيل......حسب بلد و شركة الصنع )

المساحات حاول تجيب بتاعة ال 2007.....و حاول برضه تجيب المقاس الأكبر فى الناحية اليمين......يعنى تقريباً كان مقاس الريشة 22 بوصة......أنت جيب واحدة 22 و التانية 24 تحطها قدام كرسى الراكب مش السواق......السعر مش فاكره بس الأنواع النضيفة كانت فى حدود ال 80 جم للأتنين من أى موبيل.....ممكن فى شارع دمشق تلاقى أسعار أرخص.

ربنا يباركلك يا أحمد بيه

مش عارف أشكرك إزاي ، جزاك الله خيرا..

أنا عايز لمبات بس وبفكر إني اركبها لونها أبيض مش أصفر فمشكورا قوللي هي ليها رقم معين ولا إيه ومنين ممكن أجيبها؟؟

أنا هاحاول أنزل شارع دمشق واسأل علي كل دا.. كده كده مش حجيب دلوقتي غير (إنذار ومساحات ولمبات شبورة وموتور فانوس)

أستاذ أحمد عبد المقصود ، جزاك الله خيرا للمرة الثانية