الموضوع: فلتر تكيف الفيرنا وصل يا رجااااااااااااااالة

[بسم الله الرحمن الرحيم
والصلاة والسلام على اشرف المرسلين
اما بعد

بعد طول غيابى عن المنتدى رجعتلكوا بمفجأة حتسعد كل اصحاب الفيرنا

طبعا غبور باشا عشان يوفر شايل فلتر التكيف (الله يسامحه ع التراب الى شمناه) المهم فبعد سؤال الاخ العزيز / احمد كار
افادنا ان الفلتر موجود بالفعل بس اكيد مش عند غبور - موجود فى شارع دمشق عند محل اسمه "نافع"

توكلت على الله نزلت روحت لنافع والاقى الناس ادامه تقولش شبراوى اتارى عنده من قطع الغيار على كل شكل ولون.

وسط الزحام وعن اذنك يا فندم لو سمحت يا برنس كوعك يا اسطى قدرت اوصل للبياع وهنا كنت نسيت انا كنت عايز ايه اللهم صلى ع النبى انا ايه الى جابنى هنا ؟!!!!!! اه افتكرت وعلى استحياء قولت " فلتر تكيف الفيرنا موجود" وكنت متوقع الرد الجهنمى الى سمعته 900 مرة مفيش فلتر للفيرنا اصلا - لقيت الراجل سرح بفكره ويأكن نزل عليه الوحى وراح بكل ثقة لافف ومد ايده وطلع علبه وادهانى قولت يا واد متتبسطش اوى كدة لحسن يطلع مش بتاعها وتنزل على مفيش سالته دا بيركب فى الفيرنا المصرى صح ؟؟ قالى اه بـ 50 جنيه رحت فاتح العلبة وكنت حاخد الفتر بالحضن هوووووووووووووو ده يا كرم الله الحمد لله
ودا منظر العلبة



قولت اكيد صينى ومبصتش على العلبة وبعد ما روحت بصيت تانى كنت المفجأة انه كورى.



نبدأ الشغل على بركة الله

مكان الفلتر ورا درج التابلوه ولذلك لازم نفك التابلوه

اول : حاجة فضى التبلوه من كل الى فيه.
تانى حاجة : امسك التابلوه من الجنبين مرة من اليمين ومرة من الشمال وشد لجوه – متقلقش مش حيتكسر حتلاقيه بيتشد معاك لحد ما تخرج الجزء الى بيمسكه برة المجرة بتاعته حتلاقى الدرج نط فى ايدك بكل سلاسة.

الصورة دى من الجنب اليمين – عشان كنت فكيت الشمال خلاص.


ودا منظر عام للدرج بعد ما يتفك.



حتلاقى مكان الدايرة الحمرا دى سلك ماسك عاشق ومعشوق شده لفوق حتلاقيه طلع على طول.


ونفس السلك ماسك من على اليمين ذى الصورة كدة – برضو لفوق حيطلع على طول.



وبعدين الجزء الى فكيت منه السلك (الاول) بيتفك



هو راكب هو على بنز من تحت وكلبس من فوق فتمشى ايدك عليه لفوق حتلاقى الكلبس تدوس عليه وتشد لبرة حتطلع فى ايدك ويبان الفراغ الى الفتلر حيركب فيه.

لو تقدر تنضف الجزء بتاع الفلتر الى جوة يبقى احسن وعلى الاقل شغال المروحة على 4 وانت فاتح حتلاقى دفعة تراب محترمة طلعت فى وشك – انا مليش دعوة كل واحد ياخد بالو عشان الى حيقولى التراب دخل فى عينى حقوله قد اعذر من انذر – وبما انى بقالى 4 سنين فانا طلعت من جوة مش تراب لا طينة على ورق شجر على كلاب وقطط وما خفى كان اعظم.

دا شكل الفلتر – مكون من جزئين.



كل فلتر فيه جنب بارز وجنب داخل لجوة زى كدة


وتاخد بالك تركب البارز فى المجرى
مش البارز على البارز او المجرى على المجرى.

تبص جوة المكان الى حتحط فيه الفلتر حتلاقى فى مجرى تحت دى الفلتر بيبات فيها عشان ميتحركش يمين شمال.
حتدخل اول جزء وحيبقى الى تحت – وتتاكد انه دخل فى المجرى بتاعته
وبعدين تركب الجزء الى فوق حتلاقيه لو الاول مظبوط حيدخل بسلالة ويبات فى المجرى بتاعته هو كمان.
وتلاحظ فى جزء من الفتلر بارز ده بيبقى اتجاهه برة زى الصورة مش جوة.


وبس كدة نرجع بالعكس نركب الجزء الى بيقفل على الفلتر
مع ملاحظة ان تركيب الجزء دا رخم للى ايده مش متمرسة عشان المكان ضيق
حتركب الاول الجزء الثابت الى تحت ( البنز ) وبعدين تركب الى فوق وتسمع صوت الكلبس يبقى كدة ركب تمام

وبعدين تشغل التكيف عشان تشوف فى تسريب ولا الهواء كله طالع ع الهوايات لو فى تسريب فك الجزء الاخير (ابو بنز وكلبس) وركبه تانى واضغط عليه بعد ما تركب وجرب تانى.

وتركب الجزء الى ع اليمين بتاع السلك الى فكناه فى الاول والجزء الى ع الشمال.

وترجع الدرج برضو شد لجوة ودخله يمين وشمال.

اول ملاحظة بعد تركيب الفلتر ان الهواء الى طالع من الهوايات قل شوية (الوضع الطبيعى) بس متكتمش خالص متقلقوش.

وبس كدة

اتمنى اكون قدرت اوصلكم الخطوات بالشكل المناسب
ومتنسوناش فى صالح دعائكم

والسلام عليكم ورحمة الله وبركاته