الموضوع: مفيش فايدة

هو عموما ماحدش بقى بيسأل لا على رخص ولا غير رخص

والناس بقت بتخالف عيني عينك وبصراحة انا واحد منهم <<< اه هقول الصراحة انا واحد من الناس دي

اشوف الظابط وممكن اكون لابس الحزام واقلعه متعمد قدامه وامسك الموبايل هتقولي ليه كدة دي مش اخلاق والثورة غيرتنا ومش غيرتنا

هقولك من اللى كانو بيعملوه فينا يستاهلو دلوقتي ان الواحد يعدي من جمبهم ويعمل كدة

انا هحكي موقف واحد حصل معايا لاء موقف ايه ده انا حصل معايا مواقف

مرة كنت رايح اجدد رخصة العربية الرخصة كانت انتهت ورايح اجددها وقفني في كمين بيقولي الرخص طلعلته قالي دي منتهية قلتله مانا حضرتك رايح اهو المرور اجدد قالي معلش بقى لما تستلمها ابقى جددها وسحب مني الرخص ! يمين شمال مافيش فايدة !

وعينك ماتشوف الا النور علما جبتها

طبعا طلعت على مرور بين الثرايات الرخص لسه ماجتش وفضلت اسبوع على الموضوع ده

وفي الاخر وصلت الرخص وقفت في 5 طوابير كل طابور كدة عينك ماتبقاش جايبة اوله من اخره واللى يضحك ان مثلا تقف في اول طابور وتقعد فيه حوالي مثلا ساعة ساعة ونص وفي الاخر الموظف يكتبلك تمن الغرامة ويقولك اقف في طابور تاني عشان تدفعها

وبعدها تقفلك بتاع ساعة علما تدفع ويديلك وصل ويقولك اقف في الطابور اللى هناك ده عشان يمضيلك على الوصل

وبعد ماتمضي على الوصل اقف هناك عشان الموظف يقشر على الوصل

تقف فيه برضوا بتاع ساعتين وفي الاخر يقولك اقف في طابور تاني عشان تختم الوصل طب ما ممكن موظف واحد يعمل القصة دي كلها ويخلصنا ماتبقاش فاهم بيعملو كدة ليه !

وبعد مالوصل استحمى واتظبط واتختم من هنا لهنا اخر طابور بقى بيستلمو فيه الوصلات والراجل عمال ينادي فلان الفلاني لحد اخر وصل قلت ده اكيد انا وقمت رايح بقى عايز اخلص ابص لقيته بينادي اسم تاني

رحتلته قلتله فين الوصل بتاعي قالي مش عارف مافيش قلتله يعني مافيش

قالي معرفش يظهر ضاع قعد يدور كدة حوليه قالي مش عارف مش موجود

انا سمعت الكلمة دي وبقالي اربع ساعات واقف في طوابير عشان يقلي الوصل في الاخر ضاع ورحت فاتح صوتي لقيت المدير جالي وقالي هنعملك بدل فاقد

بعد ماخلصت كل ده وطبعا واقف في طوابير من 8 الصبح لحد 1 الظهر فين ياعم الرخص قالي لاء روح بقى استلمها من مرور فيصل ! ! قلتله هي مش هنا قالي لاء ده هنا الاجراءات بس

طلعت على مرور فيصل كانت الساعة داخلة على 2 قالي تعالى بكرة بقى خلاص خلصنا النهارده

رحت تاني يوم فين ياعم الرخص وقفت في طابور محترم وبعدها خلاص بقى جايب الرخص اول ماشفتها قلت الحمد لله اخيرا خلصت

لقيته بيقولي هات بطاقتك اديتله البطاقة قالي الرخص مش باسمك قلتله عارف باسم ولدي

قالي انت لا تمت بصلة للعربية ! قلتله نعم يعني ايه لا امت بصلة للعربية

قالي يعني العربية مش بتاعتك لازم صاحب الشان يجي يستلم الرخص قلتله ياعم الحج والدي راجل كبير مش بتاع الطوابير والكلام ده

قالي ماعرفش هو كدة طيب ياعم اجيبلك البطاقة بتاعته ونخلص ورحت مطلعله بطاقة والدي كانت معايا عشان كنت عامل حسابي لحاجة زي كدة

قالي لاء انت لا تمت باي صلة للعربية صاحب الشأن يجي !

وفي الاخر جبت واسطة جابهالي وانا قاعد في البيت من غير ماروح هنا ولا هنا

لاء ده جابها وكمان جدد رخصة العربية وانا في البيت ! ! << ايوة جدد الرخص من غير لا فحص ولا اي حاجة والفحص كان حاجة صورية كدة عملته وانا واقف وروحت

-----------

ده كان احد المواقف وبيني وبين مرور فيصل حكايات يتعمل بيها مجلدات عشان كدة فعلا بقول اللى هما فيه دلوقتي يستاهلوه