حول عربيتك لخرده فى فتره بسيطه

**houras1010** · 30-06-2011 02:23 AM

السلام عليكم - دى مجموعه نصايح لمن يريد تحويل عربيته نمليه صاج
1- دور المارش مده طويله وانت دايس بنزين جامد
2- فى بدايه حركه العربيه دوس بنزين وخليك دايس على الدبرياج فى نفس الوقت
3- خليك ماشى على السرعه الأولى مده طويله وبسرعه عاليه لغايه ما تشم ريحه شياط
4- العدادات والأمبيرات ولمبات البيان الموجوده فى التابلوه ملهاش قيمه وعشان كده لا تتابعها على فترات
5- حط زيت فى العربيه من ارخص نوع وزوده من غير ما تغيره لغايه ما يسد طلمبه وفتحات الزيت
6- مستوى المياه فى الردياتير ملكش دعوه بيه
7- الحاجه اللى تبوظ فى العربيه سبيها زى ماهيه عشان تأثر على الياقى
8- وانت بتشتري قطعه الغير اهم حاجه تكون رخيصه ومش مهم الجوده ولا اذا كانت بتاعت العربيه فى الأصل
9- اعمل شغل الميكانيكا عند العفشجى واعمل العفشه عند السمكري
10- نضف العربيه بفوطه زفره عشان ذرات الرمل تجرح فى البويه وتخربش فى الزجاج وفى الليل تعمل انعكاسات نور شديده
11- روح للصنايعى وقول لملى الموضوع مش عايز اغير حاجه
12- اغسل العربيه وسيب الميه تركن فى اماكن تاخد وقت كبير عشان تجف
13- اغسل الموتور بالجاز عشان تشيل الشحم من رولمان بلى الدينامو وكباس التكييف والطرمبه وتخليهم يقفشوا وشقق كاوتش و خرطيم الميه والبنزين والكهربا والخ ....
14- سيب العربيه مده طويله من غير ما تدورها او تحركها من مكانها
15- لو الكاوتش ريح منك امشى على الجنط لغايه ما توصل لأقرب بتاع كاوتش
16- اجري فى الشوارع المكسره والمطب اللى فى سكتك خده
17- لو فى خابطه فى الصاج وفر ومتسمكرش خلى بتاع الدوكو يكبسها معجون عشان تتدارى
18- دايما اشترى قطع غير قديمه حتى لو الجديد موجود
19- فى حاجات مجوز فى العربيه متغيرهمش مع بعد غير واحده بس زى فرده كاوتش مقص مساعد يعنى نوع
20- فى حاجات كتير العربيه تمشى من غيرها عشان دى رفاهيه زى فلاتر الهواء وحاجات تانيه الصنيعيه هتعرفهالك لما تلاقى حاجات مدلدله من العربيه او مرجعهاش تانى مكانها ولما تسأله هيقولك دى زياده او ملهاش لزمه عشان كده اوعى ترجعها لأصلها
21- سيب العربيه على طول فى الشمس عشان التابلوه والفرش الشمس تاكلهم
22- بعد ما تكونت عملت الحاجات دى كلها ومش لاقى حاجه تانى تعملها اعمل اعلان واكتب فى الشاذه والوحيده من نوعها والحكايه والفابريكه بره وجوه ----للبيع

**mazagngi2010** · 30-06-2011 03:56 AM

برنس بصراحه
بس اول مره اعرف ان الفوطه الزفره غلط

**kamatsho** · 30-06-2011 04:37 AM

يا باشا المفروض الموضوع ده يتكتب جنبه ( متجدد بأستمرار )

عشان النصائح دى تـَـعــٌم على كل الاعضاء الكرام

ههههههههههههه موضوع جاااااااامد وتسلم ايدك بجد

**sherif_m72** · 30-06-2011 04:50 AM

هههههههههه
قادم جديد وبقوه
شكرا على الموضوع والله ينور على الاسلوب

**yyy** · 30-06-2011 05:45 AM

المشاركة الأصلية كتبت بواسطة houras1010

السلام عليكم - دى مجموعه نصايح لمن يريد تحويل عربيته نمليه صاج
1- دور المارش مده طويله وانت دايس بنزين جامد
عادى بيحصل ماهى لما تزرجن لازم تاخد على دماغها
2- فى بدايه حركه العربيه دوس بنزين وخليك دايس على الدبرياج فى نفس الوقتبرضة عادى اية المشكلة وهاقولك على حاجة احسن سيب الدبرياج بحيث ان العربية تكون شبة هاتتحرك وثبتة على كدة وعلى بنزين علشان العربية تتحرك
3- خليك ماشى على السرعه الأولى مده طويله وبسرعه عاليه لغايه ما تشم ريحه شياط ما بلحقش اشم الشياط لان الموتور بيكون جاب اخرة وهاينفجر مش هايشيط
4- العدادات والأمبيرات ولمبات البيان الموجوده فى التابلوه ملهاش قيمه وعشان كده لا تتابعها على فترات ماهى فعلا على فترات يعنى هابص على الطريق ولا على العدادات؟؟؟
5- حط زيت فى العربيه من ارخص نوع وزوده من غير ما تغيره لغايه ما يسد طلمبه وفتحات الزيت الزيت لازم تحط نوع كويس وينفع للموتور بس عادى ممكن تنسى تغيرة وما تفتكرش الا لما يتحرقوتلاقى العربية صوتها على وتقعد تفكر اية اللى عمل كدة لغاية ما تفتكر انك ماغيرتش الزيت
6- مستوى المياه فى الردياتير ملكش دعوه بيه
ما بابصش علية الا لما العربية تسخن
7- الحاجه اللى تبوظ فى العربيه سبيها زى ماهيه عشان تأثر على الياقى
لو مالهاش لازمة سيبها
8- وانت بتشتري قطعه الغير اهم حاجه تكون رخيصه ومش مهم الجوده ولا اذا كانت بتاعت العربيه فى الأصل دى باقى ماقدرش اعملها لازم قطعة الغيار تبقى اصلا
9- اعمل شغل الميكانيكا عند العفشجى واعمل العفشه عند السمكري هو كلة عند الميكانيكى
10- نضف العربيه بفوطه زفره عشان ذرات الرمل تجرح فى البويه وتخربش فى الزجاج وفى الليل تعمل انعكاسات نور شديده وانت لية تنضفها.. و الازاز شغل المساحات ومن غير مية(بس مش انا اللى بعمل الحركة دى)
11- روح للصنايعى وقول لملى الموضوع مش عايز اغير حاجه
12- اغسل العربيه وسيب الميه تركن فى اماكن تاخد وقت كبير عشان تجف بيحصل
13- اغسل الموتور بالجاز عشان تشيل الشحم من رولمان بلى الدينامو وكباس التكييف والطرمبه وتخليهم يقفشوا وشقق كاوتش و خرطيم الميه والبنزين والكهربا والخ ....دة اذا اتغسل اصلا
14- سيب العربيه مده طويله من غير ما تدورها او تحركها من مكانها
15- لو الكاوتش ريح منك امشى على الجنط لغايه ما توصل لأقرب بتاع كاوتش لو مريح بس عادى(بس اعمل حسابك انة هايضرب سلك) لو على الجنط بضطر اسفا اركب الاستبن
16- اجري فى الشوارع المكسره والمطب اللى فى سكتك خده عادى بتحصل كتير
17- لو فى خابطه فى الصاج وفر ومتسمكرش خلى بتاع الدوكو يكبسها معجون عشان تتدارىولية اروح لبتاع الدوكو اصلا ما تسيبها زى ما هى حتى بتدى احترام للعربية فى الشارع
18- دايما اشترى قطع غير قديمه حتى لو الجديد موجود ما قولنا دى الحاجة الوحيدة تقريبا اللى ما بعملهاش لازم الاصلى
19- فى حاجات مجوز فى العربيه متغيرهمش مع بعد غير واحده بس زى فرده كاوتش مقص مساعد يعنى نوعالمساعدين لازم مع بعض مع الاسف
20- فى حاجات كتير العربيه تمشى من غيرها عشان دى رفاهيه زى فلاتر الهواء وحاجات تانيه الصنيعيه هتعرفهالك لما تلاقى حاجات مدلدله من العربيه او مرجعهاش تانى مكانها ولما تسأله هيقولك دى زياده او ملهاش لزمه عشان كده اوعى ترجعها لأصلهاودى كمان لا...لازم الحاجة اللى تتفك تركب زى ما اتفكت بالظبط
21- سيب العربيه على طول فى الشمس عشان التابلوه والفرش الشمس تاكلهم دة العادى هو انا ها جيبلها ضلة منين؟؟؟
22- بعد ما تكونت عملت الحاجات دى كلها ومش لاقى حاجه تانى تعملها اعمل اعلان واكتب فى الشاذه والوحيده من نوعها والحكايه والفابريكه بره وجوه ----للبيع هى فعلا حالة شاذة والوحيدة من نوعها وفابريكة برة وجوة بس مش للبيع