استشارة فنية من عمالقة الدايو
السلام عليكم
والله انا عندى مشكلة فى عربية اخت المدام ، وانا اللى مدبس فيها عشان جوزها مسافر دائما ، و كنت عايز مساعدتكم عشان انا تعبت من العربية دى ، الموضوع باختصار
العربية لانوس 99 اتوماتيك
من شهر قالتلى ان العربية مبتسحبش خالص ، روحت بصيت عليها لاقيت فى بقعة زيت فتيس تحتها ، والعربية مبتاخدش غيارتها صح ، وديت العربية للميكانيكى ، قاللى اويل سيل قربة الفتيس ، المهم فك الفتيس وغير الجوان والعربية بقيت بتسحب كويس جدا
بعد اقل من يومين لاقيت نفس بقعة الزيت ، والعربية بطلت تسحب ، روحتله تانى فك واكتشف انها نفس المشكلة وقالى ان الاويل سيل اللى جبناه مضروب وهو اللى عمل المشكلة ، المهم غيره على حسابة ، والعربية ظبطت .
وبعد يومين تانى نفس المشكلة ، روحتله اكتشفنا ان الزور بتاع الاربة وحش وهو ده اللى بيبوظ الاويل سيل !!
جبنا قربة استيراد والمشكلة انتهت تماما
ولسوء الحظ ، بعد اسبوع تانى دخلت فى بلاعة فى الطريق بوظيت كاتيرة زيت الفتيس ، والزيت كلة وقع على الارض ، جبنا كارتيره وحطينا زيت تانى للمره الرابعه
ومن ساعتها والمشكلة الكبيرة ظهرت ، لمبة ال pwr بتاعة الفتيس اللى فى التابلوه بتنور وتطفى علطول ، و العربية مبتسحبش ، واكتشفت ان الفتيس ماشى على الغيار التالت علطول ، عملت ريستارت كذا مره يشتغل بعدها 10 دقائق وبعدين يرجع نفس العيب ، ده بالاضافه ان شامم ريحت شياط فى زيت الفتيس ، ان شاكك ان يكون المره الاخيرة اللى غبرت فيها الزيت يكون مضروب ، بس خايف اغيرة تانى على الفاضى لان التكلفة كده عليت اوى.
كلمت الميكانيكى قالى انت كده فى الغالب هتحتاج فتيس
فأرجو منكم النصيحة لو حد واجهتة المشكة دى قبل كد وحلها ازاى
ولو حد يعرف ميكانيكى دايو او اوتوماتيك كويس ، ويا سلام لو فى مدينة نصر .
وسعر الفتيس الاوتوماتيك استيراد كام تقريبا واجيبة منين
اسف على الاطالة بس حبي اشرح كل تفاصيل الموضوع.