تيل الفرامل و سنينه السوداء
صباح الخير يا حضرات
موضوع اليوم من أهم المواضيع أللي تهم حياة راكبي البايك
تخيل نفسك داخل عل ميدان علي سرعة 100كم مثلا و تكتشف فجأة أن الفرامل عطلت لسبب أو لأخر
حاتعمل أيه يا عسل ؟ ربنا يستر طريقكم بس أكيد الموضوع حيبقي فيه جبس و شاش و خلافه ربنا يبعد عنا
طيب أزاي نعمل صيانة للفرامل ؟ و هل في طريقة لرفع قدرة الفرامل؟
واحدة واحدة يا معلم
النهاردة نتكلم عن الصيانة الوقائية و المرة القادمة نتكلم علي تعديلات رفع أداء الفرامل
أوكي..............
توكلنا علي ألله
أهم سؤال هو أزاي الفرامل بتشتغل؟ لو فهمنا الأجابة كويس ده أكيد حايريح الجميع
الفرامل بتكون عبارة عن مادة أحتكاكية تلامس سطح ديسك الفرامل (و يطلق عليها طنابير) و كل ما تزيد الضغط علي بدال الفرامل كل ما الأحتكاك يزيد و بالتالي يتوقف البايك
طيب هنا نفهم أن كل ما المادة الأحتكاكية تزيد جودتها يبقي أكيد تتحسن الفرملة
عملية الأحتكاك يتولد عنها حرارة شديدة علشان كده الديسكات بتكون مخرمة لسهولة تبديد الحرارة و برضه علشان تبعد أي برادة متخلفة من المادة الأحتكاكية علي الديسكات
يبقي كده طبيعي أن المادة الأحتكاكية (يطلق عليها تيل الفرامل) تتأكل مع الأستعمال و برضه الديسكات (الطنابير) تتأكل مع الأستعمال بس بنسبة تأكل أقل من التيل
عملية نقل الحركة من بدال الفرامل الي التيل تتم عن طريق زيت هيدروليك (زيت الباكم) ينضغط في مواسير (أو خراطيم) محكمة و تتحمل الضغط . في السيارات يكون هناك جهاز سيرفو للمؤازرة حيث أن الزيت يجب أن يضغط علي العجلات الأربعة
كل أللي فات ده كان مقدمة لطريقة عمل الفرامل
طيب أيه الأجزاء المحتاجة صيانة وقائية؟
أول الأجزاء التي ينتهي عمرها الأفتراضي بتكون لقم التيل (المادة الأحتكاكية) و خد بالك أن لقم التيل لو تأكلت و فضلت ماشي بالبايك يبقي الديسكات كمان حتبوظ و دي غالية جدا
لذا من الأفضل الكشف علي تيل الفرامل مع كل صيانة تجري للبايك و تغيير التيل أذا قارب علي النفاذ قبل ما يؤدي لتلف الديسكات
طبعا التيل بيعيش علي حسب طريقة أستعمالك للفرامل و علي نوع التيل المستخدم
حاجة أخري مهمة جدا جدا و كثير من الناس لا تعلمها : زيت الفرامل لازم يتغيير كل سنتين لأنه يمتص بخار الماء و يفقد لزوجته و يؤدي لتلف كاوتش الماستر و أحيانا بستم الماستر نفسه
معلومة أخري برضه مهمة : خراطيم الفرامل عمرها الأفتراضي حوالي ثلاث سنوات لأنها تتشقق من العوامل الجوية و قد تنفجر من ضغط الزيت داخلها و بالذات عن فرملة فجائية
الديسكات أو الطنابير عموما عمرها طويل بس لازم تراجع لو بها جروح أو تأكل
سؤال هام : هل تزويد او ملئ التيل ينفع ؟؟
أنا لا أنصح أبدا بهذا لو حاتهزر يبقي هزر بعيد عن الفرامل
التيل الأصلي مافيش أحسن منه أو علي الأقل الماركات المعروفة مثل brembo or EBC
طيب لو غير موجود و مافيش أي حل غير الملئ؟
يبقي تدور علي حد يقوم بلزق التيل و ليس البرشام و تدور علي المادة السوداء الشبيهة بالفحم لأن هذه المادة طرية علي الطنابير و تتأكل هي بدل ما تأكل الديسكات
المرة القادمة نتكلم عن التعديلات لرفع كفاءة الفرامل
و شكرا
