اتخبطت النهاردة وانا سايق

**tamatemo** · 30-06-2011 09:34 PM

السلام عليكم يا اخونا يا حلوين

وانا راجع من الشغل النهاردة وعلي الطريق الزراعي
ماشي في الشمال وفيه الطريق بيقف ويهدي علشان النقل

فاديت اشارة يمين علشان اخد الحارة اللي في النص

وانا في وسط الحركة دي انا لاقتي كلاكس من عربية كورلا في الحارة اللي في النص جاي بسرعة علشان يقفل عليا

المهم رجعتي حارتي ولقيته بيهدي ويتنرفز ويزعق

انا الحمد لله كعادي قولته مدي اشارة وشايف المراية وداخل

المهم البيه اتنرفز وحدف عليا وهوا ماشي خبطني خبطة خفيفة في الرفرف اليمين وطاير

بصراحة انا دمي اتحرق وضغطي علي جدا وقولت والله لا اكون ملبسه في حيطة او في عربية

المهم كل ما اجي جنبه علشان اعاتبه واشوف اخره يحاول يخبطني لغاية ماعرفت اجي قدامه وحدفت عليه من غير ما اجي اجنبه وطلعت قدامه وهديت

جه الافندي جنبي فلقيت معاه والده ووالدته

فبقوله دي المرجلة يعني يا دكر فلاقيته بيشتم وواحد طالعلي من الشباك اللي ورا بيقولي والله لا اورك اركن وانا اوريك

قولت يا سلام نركن وفعلا ركنت علي الزراعي بعد نزلة كوبري قها ب 2 كم تقريبا

ونازل اشوف العربية من الخبطة واشوف البهوات

اللحق يتقال والدهم نزل جري عليا بس الولدين نزلو يتخانقو معايا

وفعلا شدني واحد من القميص ونزلت ايده ونتفاهم وهو هاتك يا خناق والده جه خدني بعيد و ولاده مش محترمينه عمالين عاوزين يتخانقوا لغاية واححد فيهم ضربني في كتفيس وابوه بيشدني بعيد

انا والله كبرت للراجل بس ولاده مش محترمين

المهم لما لقيت الموضوع بيزيد وانا مبردش وابوهم مش بيغلطهم انا قومت مطلع الايكتريك وقولت يا روح ما بعدها روح و

وخالص انا جهزته وهامسك واحد هموته من الضرب والكهربا

لقيت الناس مسكتني ووالدتهم واقفة قرب مننا وخايفة جدا

انا لقيت نفسي قومت مدخل الاليكتريك وقافلة وموطي واخد مفتاح عربيتي من الارض وقولتهم ربنا يسامحكم
ولناس بعدت ما بينا وركبت عربيتي ومشيت

انا مفيش حاجة هزتني قد منظر امهم وهيا خايفة عليهم
ماتخيلتش اني علشان خاطر الاب والام دول كان ممكن اسكت نهائي ولا اضرب ولا اعمل اي رد فعلا

انا معرفش ايه اللي حصلي يا جماعه بس فعلا انا مشيت بالعربية وقولت حتي لو رخم عليا تاني مش هاجي ناحيته
رغم الشيطان كان بيلعب في دماغي جدا اني استناه بعدين واخبطه بالعربية وانزله في قلب الزراعات

بس والله معرفش انا هديت ازاي ومعملتش كدا ومش مشيت بسرعة اكتر من 80 كم بعدها

هوا ايه اللي حصلي دا؟؟؟ علشان انا مش فاهم

**ahmedsrs** · 30-06-2011 09:47 PM

معدش فى اخلاق والسواقة بقت بالدراع اهم حاجة فى المواقف دى تمسك اعصابك ومتحولش تشد مع حد وخلى الى عاوز يجرى يجرى ومسيره يلبس

**Eng.Geo** · 30-06-2011 09:49 PM

الحمد لله انها جت علي قد كدة
لما الواحد بتقفل معاه بيبقي دماغة مافيهاش غير الأذي
النهاردة برضه علي الدائري وعربية ميكروباص يميني ورا وانا في الشمال وماليش نفس أجري
عربية ورايا عايزة تجري
وسعت وجيت قدام الميكروباص
بس في نقل كان هييجي قدام الميكروباص
فانا مابينهم وعايز أعدي العربية من شمالي
كنت بهدي شوية عشان النقل وعايز أرد تاني مكاني شمال
ببص لقيت الميكروباص خد شمال من ورايا بشكل غبي جدا جدا جدا
وجه جمبي
يشتم
فاهم اني جاي قدامه أرخم عليه !
وكمان عايز يلبسني في النقل
والزباين معاه متدايقين بقي .. مانا عطلتهم
ماشيين 100 ومعطلهم !
قعد يلعب بالعربية عشان يخبطني
سقطت نقلتين وطلعت خليت عربية قفلت عليه لغاية ما كان هيلبس في الحاجز الخرساني
مش عارف الغباء اللي عاش فيه ده ليه !
وانا برضه مكانش لازم أتعصب كدة
الحمد لله
وأقرا ده كدة
http://www.nilemotors.net/Nile/222525-a.html

**matrix_it** · 30-06-2011 09:59 PM

الحياة خبرات

**waleedraafat** · 30-06-2011 10:12 PM

انا مش هقدر اقول لكم اهدوا ، علشان انا من النوع العصبي جدا وبتنرفز من اقل حاجة وعندي استعداد انزل اتخانق مع التخين ،،،
بس هدوا اللعب اليومين دولم ، العملية مش ناقصة

ونصيحة تانية يا شباب بلاش التوهان او السرحان او الهدوء الزائد اثناء القيادة ، ممكن يخليك ترخم علي حد وانت مش واخد بالك وخصوصا لو هو مستعجل وانت مش فارق معاك وقافل عليه الطريق وعايش مع نفسك وهو عمال يغلي كلكسات وانت ولا معبره ، انت كده بتجننه وبتستعدية وبتدفعه للتعامل بجنون (جرب تكون مستعجل بجد وواحد قدامك وقافل عليك وانت عمل تكلكس له وهو مش راضي يوسع ولا حتي يدوس سنة بنزين ويعديك ويا سلام بقي لو بيرغي مع الي جنبه او بيتكلم في الموبايل ومنفض لك، واتحداك لو ما اتعصبتش)
لازم يا جماعة نراعي بعض ، والي يغلط اشارة بسيطة من ايده مع ابتسامة اسف هتقفل الموضوع (عن تجربه)

وربنا ينجينا جميعا من المشاكل

**Ahmod** · 30-06-2011 11:56 PM

والله يا باشا فعلا زي ماقال وليد

اليومين دول مافيش حاجة مضمونة واحد يخبطلك عربيتك تنزل تتخانق تلاقيه حرامي ورافع عليك مطوة ولا حاجة ويسرق العربية ويجري وحصلت مع ناس كتير

ربنا يسترها معانا الزعيق والخناق عمره ماهيرجع الخبطة ولا هيحصلها اللى حصل حصل وخليها على الله