المشاركة الأصلية كتبت بواسطة benmatar
السلام عليكم
استخراج رخصة ونقل ملكية
سكودا فيليشيا 1300 سنة 1997
- شهادة مخالفات (لاتوجد مخالفات) --- 5ج.م مش عارف ليه !!!
- تسجيل في الشهر العقاري --- 330ج.م الموضوع تم بعد المرور وأخذ التأشيرات والشخبطة من حوالي 7-8 موظفين قاعدين في مساحة لا تزيد عن 40-50 متر مربع، والكتابة في دفاتر وأوراق بالية وإيصالات من أيام الأفلام الصامتة، وكل واحد أمامه كمبيوتر بشاشة lcd بيلعب عليها كوتشينة. علما بان سيادتك اللي بتكتب البيانات والموظف بيمليك بالعافية.
- التوجه للمرور
- شراء دوسيه كارتون أثري وجواه 5 ورقات مقاس كف الإيد--- 8ج.م
- شراء ملف ( ده غير الدوسيه) لفحص المركبة --- 50ج.م (التجديد لمدة 3 سنين وكنت أتمنى ألاقي تجديد لمدة 30 سنة عشان الواحد مايرجعلهومش تاني)
- التوجه لطابور طويل انتظارا للدخول لمكتب السيد الرائد واقفا أمامه لإمضاء بالتاريخ إيذانا بالبدء في خوض معركة الفحص والترخيص.
- الانطلاق لمكتب التأمين الاجباري--- 283ج.م (3 سنوات) والحصول على وثيقة التأمين الإكراهي قصدي الإجباري عن المسؤولية المدنية الناشئة عن حوادث مركبات النقل السريع داخل ج.م.ع
- ملء البيانات بنفسك والتوجه لعم حسن لأخذ البصمة--- إكرامية 5ج.م (الراجل متواضع)
- شراء حقيبة اسعافات أولية معتمدة منهم وليس من غيرهم حتى لو أحضرت حقيبة من استشاري بالقصر العيني بالإضافة لمثلث عاكس رديء الصنع مع الحقيبة رغم أن لديك مثلث (مستورد) ولكن لن يعتد به.--- 71.5ج.م
- ختم ورق الطفاية--- إكرامية بالإكراه 20ج.م لعم ربيع عشان الطفاية الجديدة ياباشا ب 120ج.م وطفايتك شكلها كده متركب لها الأمان بالمقلوب !!!
- البحث عن السيد المهندس المحترم في غمار وأروقة وساحات الإدارة لمعاينة سيارتك والبحث عن القطط الفاطسة.
- انتظار السيد المهندس في كرفان مكتبه للتأشير على أوراقك التي بدأت في التآكل بعد البصمة
- التوجه للسيد الرائد للإمضاء والختم مع المعاونة في البحث عن حبارة وما شابه.
- الرجوع لشباك الموظف (المختص) لمراجعة الأوراق.
- التوجه للخزينة (بعد ما اتصاحبت على الموظف لأنك رايح جاي عليه) وسداد الضريبة--- 668ج.م ومشاركة السادة المواطنين في البحث عن 10 جنيه فكة وذلك لفك زنقة 3 مواطنين انت مش منهم. بس هتتعطل لبكرة معاهم.
- الرجوع للسيد المختص قصدي الموظف المختص، لترتيب الأوراق وماجعتها للمرة 12 وتسليمها للسيد المراجع.
- لشغل وقت الفراغ التوجه لمركبتك وفك اللوحات القديمة والعودة لانتظار سماع الاسم. (ومش هتسمعه)
- تتعالى الأصوات والاعتراضات وظهور بعض الصرخات من مين مش عارف وفجأة يأتي صوت من أدنى الصالة: يا جماعة واحدة واحدة السيستم واقع!!
- الحمد لله، إيه لقيتوه؟ آه رجع تاني.. والوقعة جامدة؟؟ لأ لأ حصل خير!!!
- أيـــــــــــــــــــــــ ـــــوة أنا، تمام يا فندم
- خد الورقة دي وسلم اللوحات القديمة
- تمام كده؟ آه اتفضل استنى اسمك عشان الرخصة
- أيـــــــــــــــــــــــ ـــــوة أنا، تمام يا فندم
- اتفضل وروح شباك 5 عشان تتغلف.
- التوجه لنفس السيد أمين الشرطة اللي أخذ اللوحات القديمة، واستلام اللوحات الجديدة. والإمضاء.
- ألف نهار أبيض...............مبروك
- إييييييييييييييييه؟؟؟؟ تصريح 6 شهور ليييييييه؟؟؟؟؟
- قالو كله بيطلع له 6 شهور اليومين دول عشان السرقات والحوادث ودياولو...
وعمــــــــــــــــــــــ ـــــــــــــــــار يا مصر