الموضوع: قابلت صينيين ركبين شيرى (اسبيرانزا) عند سمير ريان

كنت النهارده عند سمير ريان فشوفت جماعة من الصين (ولدين و بنت) نزلين من عربيه اسبيرانزا
انا الاول ما كنتش عارف انهم من الصين لكن لما سمعت واحد منهم بيتكلم عربي مكسر مع مندوب المبيعات عند سمير ريان قلت يمكن طلبه فى الازهر الشريف فرحت على طول سلمت على اللى بيتكلم عربى و قلت له العربيه الاسبيرانزا دى بتاعتكم ؟
رد: نعم
قلت له العربيه دى حلوه
رد : بكل ثقه هز راسه و قال نعم
و قالى احنا جبناها من الصين معانا عربية الشغل (ففهمت انهم من الصين مش من دوله اسياويه تانيه و العربية شيرى مستوردهA5)
قلت له فى الصين احسن عربيه ايه هى ؟
رد: احسن عربيه هى دى (شيرى اسبيرانزا 516)
فكنت مندهش
قلت أحسن من BYD
رد : byd احسن فى عربيات الكهربه
سألته احسن من بريليانس
فكان الرد: ما عرفش ايه هى بريليانس اظاهر بتتنطق بشكل مختلف عندهم
سألته عن الموتور قوى
هز راسه بالايجاب و قال قوى
التكييف قوى
رد نعم
كان فى عربيه m12 معروضه قلت له ايه رايك فيه
فكان الصدمه قال لا
قلت له ليه
فكان على وشه انطباع سلبى
فقلت ليه تانى و انا مندهش
قال ضيقة ( مع انهم كانت اجسمهم صغيرة)
كان فى عربيه لوجان ليسه جايه امبارح فى الدفعه الجديدة المغربى
فشافوها فكان انطباعهم يظهر عليه عدم الاقتناع بيها مش عارف ليه
اللى بيتكلم عربي كل سؤال بسأله بيجيب و يتأكد من زميله بالصينى و يرد عليا بالعربى
عرفت منهم انهم بيشتغلو فى شركة تتبع شركة هاواوى اللى بتزود شركة الموبيل اتصالات بأجهزة الاتصالات
و هما بيشتغلوا فى مولدات الديزل اللى بتزود محطات الموبيل بالكهرباء و العربيه الشيرى A5 (اسبيرانزا 516 )
عربية الشغل
بعد ما سلمت عليه و شكرته
جه فى راسى سؤال
ايه اللى يخلى الصينيين يجو من الصين و معاهم شيرى A5 ( اسبيرانزا 516 ) بالذات علشان يشغلوها معاهم
الا اذا هى فلا عربيه كويسه (الصينى)
طب المصرى فيه ناس بتشتكى منها ليه؟
هل الناس بتظلم العربيه الصينى كونها صينى بالسمعه القديمه عن فوانيس رمضان
ام هى عيوب التقفيل اللى هتفضل ملازمه صناعة السيارات المصريه و الى متى سيظل هذا العيب
ام عيوب مكونات التجميع فى العربيه المصرى
على العموم انا نقلت لكم اللى دار بينى و بينهم
و الله على ما أقوله شهيد

بص يا باشا
الاسبرانزا عربية زى البطيخة (رغم انها زيرو)
واحد صاحبى جاب 516 موديل 2006 زيرو طاير بيها السما وواحد صاحبى تانى جابها 2009 كلها مشاكل من الزيرو وخصوصا الكهربة (لمبات التابلوة بتنور وتطفئ لوحدها)
نفس الكلام ينطبق على الصغيرة 113 واحد جاب 2009 عجباة جدا
والتانى جاب 2011 وفى شهر 12 اللى فات ( يعنى كان مستلم العربية بقالة شهر ونص) كان بيلاقى مياة خضراء على الدواسة تحت رجلية ولما راح التوكيل قالوا له ان دا عيبك مش عيب صناعة
الراجل اتخانق هناك ومسك فى مهندس وبعد ما الدنيا هديت اكتشفوا انه عيب صناعة ( سربنتينة التكييف) دا غير انه اكتشف بعد كدة وجود عيب ايضا فة المساعد اليمين امامى
الراجل كرة العربية واى حد يقول له العربية عاملة اية يلعب ابو العربية على التوكيل (التوكيل اللى فى ابو رواش دايو سابقا)