الموضوع: انا والصنى والسبع ... كلاكيت 40.000 كم

الزمان:
الساعة 8:15 صباحا يوم الخميس 30-6-2011
المكان:
السبع اتوسيرفيس - زهراء المعادى
الحدث :
صيانة النيسان صنى 40.000 كم

مقدمة:
بعد ما لقيت نفسى قربت على ال40 الف كم وكمان نهاية شهر يونيو آخر ميعاد
تركيب فلتر التكييف المجانى قولت أخد اجازة من الشغل يوم الخميس
واتصلت يوم الثلاثاء بالسبع وحجزت ميعاد الصيانة الساعة 9 صباحا
لأنى عارف ان دى اكبر صيانة وهاتحتاج وقت وكمان هروبا من زحمة
السبت المعروفة فى التوكيلات علاوة على وجود بعض المشاكل فى
العربية هاقولهالكم بعدين

مشهد (1): نهار خارجى
اتحركت الساعة 6:15 صباحا من البيت خارج القاهرة وقولت عشان
اوصل بدرى عن ميعادى باذن الله لكن المفاجآة انى لقيت الطريق
الزراعى ولا كأنه 6 مساءا ما بتفرقش المهم الطريق خد ساعتين
بالتمام والكمال وكنت اول من وصل السبع وركنت الساعة 8:15
ومالقتش حد خالص غير الامن بيخرجوا العربيات البايتة فى المركز
وعمال النضافة وبس قعدت طبعا فى العربية اسمع راديو مصر لحد اما
الناس تيجى
شوية ولقيت اتنين جايين بعدى واحد بعربية اكس ترايل والتانى صنى
شكل قديم وغيرهم كتير اغلبهم من غير حجز

مشهد (2): نهار داخلى
بعد ما عدد العملاء والعربيات زاد برة عند الساعة 8:50 نزلت
ودخلت الصالة
الساعة 8:55 بالزبط ظهر مهندسين الاستقبال وكل العاملين مرة
واحدة - قمة الانضباط - واولهم موظف ترتيب ادوار العملاء اللى
سأل عن اول عميل جه بعربيته من اللى حاجزين - طبعا انا بايت من امبارح - وعند سؤال احد
العملاء غير الحاجزين عن السبب والمفترض ياخد باسبقية الحضور بغض
النظر عن الحجز
رد عليه ما تقلقش فيه مكان لدخول 20 عربية مرة واحدة
المهم الساعة 9:00 بالتمام كنت اول عميل يتقدم لمقابلة مهندس
الاستقبال اللى كان من حسن حظى وتوفيق الله انه طلع المهندس/خالد
وهو نفس الشخص اللى كان عملى الفحص المجانى فى موبيل المقطم
يوم 30-5-2011 فسهل عليا كتييييييييييييير اوووووووووى وانا
باقوله الاعطال والمشاكل اللى سمعها منى قبل كده وافتكر ايه اللى دار
بينا من حوار وقتها
أنا كنت محضرله ورقة بالملاحظات ع العربية لدرجة ان المهندس/محمد
غالى كان جنبه وعلق بهزار ايه ده كله وقاله دبسها فى امر الشغل
والملاحظات كانت كالآتى:
1-عدم انتظام عداد rpm من بعد الزبط بالكومبيوتر كذا مرة
واستمرار تعليقه عند 1500-2000 لفة واصبحت المشكلة دى
متكررة بصورة يومية اعتبارا من يوم 15-6-2011 ... وكان
رده بكل هدوء وعلى وجهه ابتسامة دى ضفيرة الكهرباء وكده لازم
تتغير ما تقلقش انا قولتلك تبلغنى لما تيجى تعمل الصيانة لو استمرت
معاك تانى بعدما زبطهالك بالكومبيوتر فى الفحص المجانى والنهاردة
نركبهالك باذن الله بس اشوفها الاول موجودة ولا لأ وهارد عليك واذا
كانت مش متوفرة النهاردة هاديك ورقة بيها تجيلنا فى خلال اسبوع
لاسبوعين عشان تركب.
ملحوظة: تمن الضفيرة 5000ج واللى ركبت قالى انها يابانى او
تايلاندى مش مصرى
2-سماع صوت تفريغ هواء من المساعد الامامى شمال عند طلوع
المطبات على سرعات منخفضة ... هانشكف عليها وغالبا هاتطلع
كاوتشة مساعد تتغير ب65ج ومصنعية تركيب 85ج.
3-سماع صوت من بلية الدبرياج عند الضغط ع الدواسة عند الوقوف
وبدأ التحرك ع الاول وطقطقة خفيفة من اسفل الرجل الشمال عند بدء
التحرك ... هانكشف على مجموعة الدبرياج.
4-سماع صوت تزييق عند ركوب او نزول اى شخص من العربية
وانا واقف بيها وهى دايرة وشادد فرامل اليد ... رد بابتسامة دى
راجعة لأنك مش بتبقى شادد الفرامل للآخر وده صوت التيل الخلفى مع
الطنابير لتغير مستوى خلوص العربية.
5-تركيب فلتر التكييف مجانى وسلمته الكوبون.
6-تغيير زيت الفتيس ؟ ... قالى انه بيتغير عند 100 او 120
الف كم مش دلوقت خالص
واضاف انه النهاردة هايتم عمل الصيانة العادية مع تغيير الزيت والفلتر
وفلتر الهواء والبوجيهات وتغيير دورة التبريد والسيور وقفل أمر الشغل
وخرج معايا يستلم العربية بعد 15 دقيقة بس من الكلام

مشهد (3):نهار داخلى
بعد استلام العربية وختم كتاب الضمان وفى تمام الساعة 9:30 وانا
قاعد فى الاستراحة باقرا الجرنان لقيت المهندس/خالد جاى يقولى الحمد
لله الضفيرة موجودة وهاتركب النهاردة باذن الله وهاتحس بالفرق
والاختلاف عن دلوقت خالص وقتها سألته عن الوقت المتوقع للصيانة
كليا قالى يعنى هاحاول اخلصهالك بدرى على قد ما اقدر بس كويس
انك بدرى واول واحد وعالعموم ممكن تروح كارفور فى الباص الساعة
10:30 وترجع 12:30 تلاقيها خلصانة قولت تمام
وفى نفس الوقت جالى عامل البوفيه وقالى تشرب ايه يافندم وفضلت
قاعد مع الينسون والجرنان لحد ما الساعة بقت 10:25 قولت اخرج
اشوف الباص

مشهد (4):نهار خارجى
قبل ما اروح كارفور لقيت التليفون بيرن مهندس من داخل الفرع
بيبلغنى انه تم تغيير الزيت والفلاتر والسيور والبوجيهات وبيطلب موافقتى
على تغيير كاوتشات المساعدين الاتنين لقاهم مقطوعين وهايتكلفوا 300ج
(130ج تمن قطع الغيار + 170ج مصنعيات تركيب) قولتله موافق
وطمنى ان تيل الفرامل مش هايحتاج تغيير وطبعا فاضل تغيير الضفيرة.


مشهد (5): نهار داخلى
بعد رجوعى من كارفور فى الساعة 12:45 دخلت على المهندس/
خالد اسأله ع العربية
قالى خلاص كله تمام ويادوب هاتتغسل واسلمهالك وثوانى ابقى معاك
واقفل امر الشغل طبعا شكرته لذوقه واهتمامه وانتظرته وكانت الفاتورة
كالآتى:

::قطع الغيار::
130ج فلتر هواء
50ج فلتر زيت
68ج بوجيهات (4*17)
250ج سيور (150+100)
130ج كاوتشات المساعدين (2*65)
50ج تغيير دورة تبريد المحرك
----------------
678ج اجمالى قطع الغيار
10% خصم
--------------
610ج اجمالى

::مصنعيات::
300ج صيانة 40.000 كم
170ج تغيير كاوتشات تراب المساعدين امامى
--------------------
470ج اجمالى المصنعيات
15% خصم
--------------------
400ج اجمالى
اجمالى الفاتورة 610+400=1010ج
10% ضريبة مبيعات
الحساب كله 1110 ج
والزيت 3 لتر موبيل 1 ب 225ج (3*75)
يبقى كله على بعضه اتكلف 1335ج بالتمام والكمال

طبعا دفعت الفاتورة زى الباشا وخرجت استلم العربية وشكرت المهندس
خالد اللى قالى لو حصل معاك اى حاجة تانى من الضفيرة كلمنى
عالطول ولما طلبت منه يثبت تغيير الضفيرة فى كتاب الضمان قالى مش
مهم لأنه مثبوت فى الجهاز عنده وقدام طلبى واصرارى حرصا على
حفظ تاريخ العربية حتى لو اتباعت وراح صاحبها لمركز تانى غير
السبع قالى هاسألك كده ورجع فعلا ثبتها فى الدفتر بكل سلاسة
بعد كده مشيت بالعربية وانا فى قمة سعادتى ومش متضايق ابدااااااااااا
انى قعدت فى التوكيل من 9 صباحا ل1 ظهرا
المهم حسيت بحق ربنا ان العربية رجعت زيرو تانى وخاصة المساعدين
فى المطبات بقوا انعم من الاول بكتير وانتو عارفين بقى الطريق من
السبع لحد الاتوستراد عامل ازاى !!!!!!
وطبعا شغلت التكييف كمان والفلتر عامل احلى شغل وفرحت ان الفلوس
اللى دفعتها جت بفايدة الحمد لله

وهنا انتهى يومى فى السبع وبدأت رحلة العودة اللى عكر صفوها حاجة
ما كانتش تيجى ع البال ولا الخاطر ابداااااااااااااااا

وده تم لأنى متعود كل مرة صيانة اطلع بعدها اضبط زوايا عند
بريدجستون محطة كالتكس فى عباس العقاد مع مصطفى النحاس وقولت
بالمرة املأ العجل نيتروجين من جديد بعد سنة كاملة و40.000 كم
وهناك كانت الصاعقة !!!!!!!!!!!

لقيت الراجل بيقولى العربية بتحدف معاك يمين وشمال عالطول ؟
قولتله آه
قالى وكمان الكاوتش بيصفر فى الفرامل ؟
قولتله آه فعلا خاصة لو كبست فرامل جامد ... خير يا
دكتوووووووووور
قالى العجلة اليمين قدام يا باشا مرحلة واحد سم الا ربع لورا
ومحتاجة حد بتاع عفشة يعدلها بالزرجينة وهاتهالى تانى عشان تزبط
معاك
قولتله من ايه دى؟ ممكن تكون من ركن الرصيف
قالى آه او خبطة
فجآة افتكرت انى من شهر تقريبا كنت باركن وباحاذى على رصيف
جهة اليمين وماخدتش بالى ان فيه جزء عالى قدام وانا باعدل وش
العربية خبطت فيه وحك جزء من الاكصدام الامامى ووصل للعجلة وده
اللى عملها كده
طبعا اتنكدت ومش عارف اعمل ايه ؟
ولا اروح لمين ؟
بس الراجل طمنى وقالى حاجة بسيطة روح بيها الحرفيين
وانا بصراحة ما روحتاش قبل كده وما اعرفش حد فيها
ياريت حد يفيدنى اعملها فين الحرفيين؟
ولا السبع بعد اما اكلمهم بكرة الصبح ؟
وياترى هاتتكلف كام ؟
وهاترجع زى الاول ولا كده شكرا ؟

ورجعت طبعا عالبيت وانا مقلق امشى بيها ومتنكد طول الطريق الزحمة
لحد اما دخلت البيت الساعة 6 مساءا بعد 12 ساعة مع الصنى فى
شوارع المحروسة
وعاوز احل المشكلة دى بكرة باذن الله السبت فى اجازتى قبل ما ابدأ
اسبوع جديد من السفر والشغل والمشاوير
آسف ع الاطالة بس سردى للاحداث باستفاضة واجب عشان انقلكم
الصورة كاملة كما عشتها

وأخيرا باسجل شكرى واحترامى وفخرى انى راكب عربية محترمة وكنت
عند توكيل محترم جداااااااااا هو السبع

وكل صيانة واحنا جميعا طيبين
ومع الصنى متهنيين

وفى انتظار نصايحكم فى موضوع الزرجينة ده