الموضوع: عايز أطلع برة مصر .. إزاي ؟

معلش
استحمل
و صدقني لما تلاقي مكان بره مصر ... مجرد الحلم بيه هايريحك نفسيا
شوف الأماكن اللي ممكن تهاجر لها
- استراليا : اختياري الأول و ترشيحي ليك (جو معتدل - في تواجد اسلامي معقول لو كنت مسلم - و في جنسيات مختلفة شرقية - بها فرص عمل كتيرة)
- كندا : تقريبا زي استراليا و لكن جوها مش ظريف لأنه ثلج معظم السنة
- امريكا: و مش عارف تحب كده وللا لأ

المهم ادخل على النت و ابحث في المنتديات الأجنبية او المصريين المغتربين عن فرص العمل المتاحة ليك
و كمان ابحث في مواقع الهجرة الحكومية و غير الحكومية للدول دي عن الفرص المتاحة و المؤهلات المطلوبة
و ممكن تكلم مكاتب الهجرة أو فروعها في مصر للتعرف على الاجراءات اكثر و الشهادات المطلوبة .
لو مهتم انا عندي معلومات كويسة عن استراليا و لينكات ممكن تساعدك شوية
بس اعرف ان ده قرار اللي يروح مايرجعش
دور جواك عن اي حاجة حلوة ممكن تربطك بمصر او تخليك تزعل عليها و ممكن تخليك تغير رأيك
صدقني بلاش تفكر في الحاجات الوحشة (لأنها كتيييير) فكر في الحاجات الكويسة اللي ممكن تغير رأيك و خد وقتك
و لو مالاقيتش ........
ساعتها ابدأ اجراءاتك
و ربنا يفك كربك و كربنا

و الله يا احمد انا مضايق اني كتبت كلام زي ده .. مفيش حد يحب يبعد عن صحابه و اهله و الأماكن اللي اتربي فيها .. بس المشكلة ان ابسط الحاجات في الحياة مبقتش عارف اعملها ..

يعني ببقي راجع من الجامعة او من الشغل .. محتاج شوية استرخاء .. الطريق يخليني علي اعصابي اكتر .. و تعب الأعصاب اللي بشوفه في الطريق و انا راجع .. بيخليني اروح اركن و اقعد في البيت! مبعملش اي حاجة تانية لأن مش عايز ارجع للقرف اللي لسة طالع منه

مش عارف افتح الشباك من الدخان و الدوشة و مش عارف امشي من الزحمة و الناس المجانين اللي بتسوق ! مش عارف امشي براحتي بالعربية .. لازم ابقي اسرع من اللي حواليا و الا هلاقيهم زي الملاهي بيلفوا حواليا من اليمين و الشمال ..

مينفعش تخرج الا في اماكن معينة عشان موضوع الركنة .. تنزل تمشي علي رجليك .. تلاقي الناس زي ماهي اخلاقهم مش فارقة عن ما كانوا بيسوقوا .. نفس قلة الذوق و الأنانية ..

زي ما يكون الناس خدت الفهلوة دين استغفر الله العظيم يا رب !!
انا عايز اقولك ان اهلي نفسهم بقوا يقولولي سافر لأنهم شايفين انا قد ايه متدمر
مع ان انا معنديش مشاكل في ايجاد فرصة شغل او مشاكل مادية الحمد لله .. بس مش عارف استمتع بأي حاجة في الدنيا .. ايام عمالة بتضيع و خلاص .. و مش عايز كل الأيام تبقي كدة

فا للأسف السفر بالنسبة لي خطوة ضرورية .. و كدة كدة انا قدامي سنة للتخرج محدش عارف ممكن يحصل فيها ايه

يا ريت تقولي حاجات اكتر عن استراليا و شكرا ليك جدا

لا تحمل نفسك يا سيدي العزيز أكثر من طاقتك كلنا بنعاني من نفس اللي انت بتعاني منه
بس أنا يمكن لقيت حل جزئي للمشكلة يرحمني من قرف السواقة في مصر
أنا ساكن خارج القاهرة و لما بحب أنزل القاهرة لقضاء مصلحة ما (بكون لوحدي مش معايا الأولاد) بسيب العربية و أركب مواصلات سواء كان تاكسي أو مترو الأنفاق و بريح نفسي من قرف السواقة و من مشاكل إيجاد مكان أركن فيه العربية
لو نازل القاهرة بغرض الفسحة و معايا الأولاد بنزل بعد الساعة 11 ليلاً بتكون القاهرة مش زحمة أوي و ممكن تسوق براحتك نوعاً ما و ممكن تلاقي مكان تركن فيه سيارتك
أتمنى لك التوفيق
تقبل تحياتي

يا باشا ولا تزعل إنتا مش بتكره مصر الأرض إنتا بتكره مصر الشعب وده عادي مفيش داعي تخجل منه المهم
بما إنك لسه في مقتبل العمر وده ميزة أقترح عليك التفكير في السفر فوراً وإتخاذ إجراءات إيجابية
لا بد تشوفلك كام لغة تانية غير الإنجليزي يعني 3 كمان ولا حاجة منهم الألماني والفرنساوي
اللغات حاجة أساسية بالنسبة للإعلاميين
كمان سيبك من شهادة الكلية بتاعت مصر ملهاش لازمة لابره ولا جوه
شوفلك كام ماستر معترف بيهم دولياً خدهم هينفعوك حاول تضيف لنفسك بالقراءة والمذاكرة بما إنك بتقعد في البيت كتير حاول تكون سوبر عشان لما تلاقي شغلانة تلاقي واحدة حلوة ومرتاحة وعلى الأقل حتجمل صورة بلدك بره لما تكون محترف
بالنسبة تروح فين مش فارقة أي حته أحسن من هنا
أستراليا وكندا فعلاً أفضل إختياراتك وأمريكا طبعاً أم الدنيا بحق (بلد الوفرة كل حاجة فيها) ولكن أعتقد إنها صعبة جداً كمان الخليج دلوقتي أحسن من أوروبا
متغلطش غلطتنا وتقعد تفكر كتير من غير ما تعمل حاجة لحد ما تكبر وتلاقي خروجك صعب وربنا يوفقك

سؤال بما إنك إعلامي هو ليه المذيعين في الـfm الإنجليزي فيهم أجانب هوا خلاص مصر مفيهاش شباب ينفعوا بدلهم

(لو لم أكن مصرياً لوددت أن أكون أي حاجة تانية أفضل)

هو نفس الشعور الذي أشعر به
اريد وضع مدفع على سطح السيارة ........ و أمشي براحتي شوية ورا العربيات كلها
و كل اللي يعمل حاجة غلط أروح راذعة قنبلة و نخلص منه

---------------------- بس أنا دخلت الماتركس مؤقتا حتى أخرج منها إلى خارج جمهورية المهلبية ---------------

و أحسن مكان ممكن للهجرة هو أستراليا و سيبك من كندا .... دي تلج يا عم
و بعدين هاتلاقي شيكو هناك ............. هي ناقصة مصريين :D :D :D

شيكو باشا ...... أنا بهزر طبعا ...... ده أحنا نتشرف بيك يا جميل :) :)

استراليا فيها فرص أحسن و بعدها كندا قصدي كنكا .... طيب خليها براد و لا أقولك كوباية .... طيب بلاش خليها فنجان :D :D
شوفت الماتركس عملت في أيه ......... :D

و بلاش أمريكا بجد ..... بلاش أمريكا

الأول استراليا و بعدين كندا

اولآ انا أحييك على هذه الجملة
"الموضوع مش موضوع شوية زحمة و ناس اغبية .. الموضوع ان النظام بالكامل منهار .. "

و الله يا dehumanizer انا قريت كلامك و حسيت ان انا بكلم نفسى
كل كلمة انت قلتها انا حاسس بيها بشدة
لإنى خلاص زهقت و تعبت من كل شىء
انا عندى20 سنة و بدرس هندسة فى كلية خاصة فى سنة تانية
وو صلت لمرحة انى بفكر اسيب الكلية دى و دورت على جامعات فى كذا حته عشان اسافر و ابدأ ادرس تانى من اول و جديد لإنى حاسس ان انا مش بتحرك خطوة لقدام ولو عايز احكيلك عن القرف اللى فى الكلية عندنا انا ممكن أكتبلك صفحات

المهم.. فكرت فى ماليزيا فى بداية الأمر .. دولة كويسة وفى طريق التقدم و مجتمع ملتزم ( على حد علمى ) لكن لقيت ان الجامعات مستواها و ترتيبها عالميآ سىء يعنى مش فارق حاجة

و دلوقتى انا مش عارف اروح فين.. انا عايز جامعة تكون على الأقل ترتيبها متوسط على مستوى العالم يعنى 500 مثلآ و تكون فى دولة المعيشة فيها مش مرتفعة

اللى يعرف حاجة بالمواصفات دى إن شالله تكون الكونغو انا موافق