الموضوع: فوايد البنوك حرام و لا حلال, و لو حلال, أنهى أفضل بنك ؟؟؟

السلام عليكم و رحمة الله و بركاته

فيه كلام كتير عن أن فوايد البنوك حرام رغم أن الأزهر أيام النظام القديم أقر بأنها حلال و مش حرام و أنا بكون حاسس أن الأزهر فى العهد السابق كان بيقول الكلام اللى الحكومة عاوزاه, ايه بأه القول الفصل فى الموضوع ده ؟؟؟؟؟

و لو كانت حلال, أنهى أحسن بنك من حيث الفايدة و المعاملة و كده يعنى لأن شايف من الاعلانات أن الفايدة وصلت ل12% زى البنك العربى مثلا؟؟؟

شكرا و جزاكم الله كل خير .

السلام عليكم و رحمة الله و بركاته

و الله, أن فعلا محتار, لأنى بتعامل مع المصرف المتحد, فرع المعاملات الاسلامية اللى فى المنصورة عند المحافظة و كنت أتمنى أن حال البلد ينصلح و يكون هناك فرصة للاستثمار الجيد فى البلد, بحيث أن اللى عاوز يستثمر فلوسه, يكون آمن عليها و ماتروحش منه أدراج الرياح عشان فيه مثلا رجل أعمال محتكر و لا عشان غياب الأمن و ألاقى بلطجية ييجوا يستولوا على مالى و حاجتى, أنا كنت فكرت أنى أشترى قطعة أرض فى احدى المدن الجديدة و أبنيها و أؤجرها كسكن, بس لقيت أن ممكن و أنا بشترى الأرض يتنصب عليا و ممكن بعد ما أبنى, ييجى بلطجية يحطوا ايدهم عالبيت و أنا أحتاس بأه و ممكن بعد ما أخلص كوووووووول حاجة, مالقيش اللى يأجر, يعنى شغلانة مش أد كده, ده غير أنى ماعنديش خبرة فى المبانى و كده.

هل ممكن ربنا ييسر الأحوال و شركات توظيف الأموال ترجع تشتغل تانى و أنا متهيألى أنها هتكون اختيار جيد, لأنها لا تقرض و لا تقترض و مشاريعها واضحة و معروفة أودامنا و نسبة أرباحها عالية لأن نسبة أرباح البنوك الاسلامية قليلة جدا و لا تتوازى مع الغلاء اللى بيحصل يوم بعد يوم و كمان لما تطلع منها ال2,5% بتوع الزكاة, يعنى بنك زى فيصل بيدى فى السنة 6%, بعد ماتطلع منهم الزكاة, يتبقى 3-3,5 %, هل النسبة دة تتوازى مع الغلاء اللى بيحصل حوالينا فى كل حاجة, النسبة دى ماشى ممكن تكون كويسة فى البلاد الغربية, اللى بيكون فيها معدل الغلاء و ارتفاع الأسعار يكاد يكون معدوم مع الوقت و فيها مناخ استثمار آمن جدا و هناك بصراحة, الدنيا غير الدنيا و اللى يحط فلوسه فى البنك عشان نسبة ربح 2% يبقى غلطان.

ربنا ييسر الأحوال و نشوف الأمور هتمشى ازاى .